పోలవరం నిర్వాసితులకు కొత్త ఆర్ ఆర్ ప్లాన్ ప్రకటించాలి

పోలవరం నిర్వాసితుల కోసం తాజాగా సర్వే నిర్వహించి కొత్త ఆర్ ఆర్ ప్లాన్ ప్రకటించి, అమలు జరపాలని ఆంధ్ర ప్రదేశ్ ఎస్సి,  ఎస్టీ హక్కుల సంక్షేమ వేదిక డిమాండ్ చేసింది. నిర్వాసితుల కాలనీలోకి,  వరద రాదని భావించిన గ్రామాలలోకి కూడా ముంపు నీరు రావడంతో ప్రభుత్వ అంచనాలు, ప్రయత్నాలు, ప్రయత్నాలపై అనుమానాలు వ్యక్తం అవుతున్నట్లు ఆందోళన వెలుబుచ్చారు.

రెండు రోజుల పాటు విజయవాడలో జరిగిన సమావేశాలలో ఆమోదించిన సమావేశంలో పోలవరం బహుళార్ధకసార్ధక ప్రాజెక్ట్ కారణంగా అల్లూరి సీతారామరాజు జిల్లాలోని ఎనిమిది మండలాల పరిధిలోని 343 గ్రామాలకు చెందిన 2 లక్షల మందికి పైగా ప్రజలు నిర్వాసితులయ్యారని తెలిపింది. వీరిలో సగం మందికి పైగా వనవాసీయులే అని పేర్కొన్నది.

గోదావరి వరదల కారణంగా ఈ ప్రాంతాల ప్రజలు ఉన్నఫలంగా కొండలు, గుట్టలు ఎక్కవలసి వచ్చిందని, వారికి ఆహారం కాదు గదా తాగునీరు కూడా దొరకని పరిస్థితి నెలకొందని వివరించింది. పోలవరం ప్రాజెక్ట్ తొలిదశలో 41.15 మీటర్ల ఎత్తులో నిర్మిస్తున్నందున, ఎంతమేర అప్పుడే నీరు నిల్వ చేయకపోవడంతో తొలుత 34 గ్రామాల ప్రజలు మాత్రమే ముంపుకు గురవుతారని అంచనా వేశారని గుర్తు చేసింది.

ఆ మేరకు ప్రజలను తరలించి, పునరావాస కాలనీల ఏర్పాట్లు ప్రారంభించారు. అయితే, ప్రభుత్వ అంచనాలను తలకిందులు చేస్తూ, ఆ మేరకు కాకుండా కనీస స్థాయిలో కూడా నీటి మట్టం చేరుకోకుండానే 343కు పైగా గ్రామాలు నీట మునిగాయని వేదిక ఆందోళన వ్యక్తం చేసింది.  పోలవరం మండలంలో 19, కుక్కునూరు మండలంలో 73, వేలేరుపాడు మండలంలో 36, చింతూరు మండలంలో 24, ఎటపాకలో 40, కూనవరం 78, వర రామచంద్రాపురంలో 73 ముంపుకు గురయ్యాయి. భద్రాచలం వద్ద నీటి మట్టం 60 అడుగులకు చేరగానే వరదలు ఉధృతం అయ్యాయి.

పైగా, కొత్తగా నిర్మించిన కాలనీలు కూడా నీట మునిగితే వీటిని  ఏ ఉద్దేశ్యంతో  నిర్మించారనే ప్రశ్న తలెత్తుతున్నదని వేదిక స్పష్టం చేసింది. ఆ ప్రాజెక్ట్ పూర్తయి నీటిని నిల్వచేస్తే తమ పరిస్థితి ఏమిటనే గిరిజనులు భయాందోళనలకు గురవుతున్నట్లు తెలిపింది.  ఇటీవల వచ్చిన వరదలను ఓ గుణపాఠంగా ప్రభుత్వం తీసుకొని, ఎత్తైన సురక్షిత ప్రాంతాలలో పునరావాస కాలనీలను నిర్మించాలని ఎస్సి,  ఎస్టీ హక్కుల సంక్షేమ వేదిక డిమాండ్ చేసింది. కొత్తగా కాంటూరు సర్వే జరిపి కాంటూరు పరిధిలోని గ్రామాల సంఖ్యను పెంచాలని సూచించింది.