రాహుల్ పై పోటీ చేయడంతోనే నా కూతురిపై ఆరోపణలు… స్మ్రితి ఇరానీ

ఆమె తప్పల్లా తన తల్లి రాహుల్‌ గాంధీపై 2014, 2019 లోక్‌సభ ఎన్నికల్లో పోటీగా నిలబడటం,  గాంధీలకు వ్యతిరేకంగా మాట్లాడటమే అని స్పష్టం చేశారు.  గోవా ఎక్సైజ్ శాఖ షోకాజ్ నోటీసును చూపిస్తూ కాంగ్రెస్ పార్టీ తన కూతురి వ్యక్తిత్వాన్ని బహిరంగంగా కించపరుస్తోందని మండిపడుతూ ఆ షోకాజ్ నోటీసులో అసలు తన కూతురి పేరు ఎక్కడుందని స్మృతి ఇరానీ ప్రశ్నించారు.

ఆర్‌టీఐ అప్లికేషన్‌లో వివరాల ఆధారంగా మాట్లాడుతున్నానని కాంగ్రెస్ నేత జైరాం రమేష్ అంటున్నారని, ఆ ఆర్‌టీఐ అప్లికేషన్‌లో తన కూతురి పేరు ఎక్కడుందని ఈ మహిళా కేంద్ర మంత్రి నిలదీశారు. రాహుల్ గాంధీ, సోనియా గాంధీలను తరచూ విమర్శిస్తున్నందుకు 18 ఏళ్ల తన కూతురు గోవాలో అక్రమంగా బార్‌ నడుపుతోందనే ఆరోపణలు చేస్తున్నారని విమర్శించారు. ‘కేంద్రమంత్రి కూతురు కావడమే ఆమె శాపమా?’ అని ప్రశ్నించారు.

తన కూతురుపై వచ్చిన ఈ ఆరోపణలు దురుద్దేశపూర్వకంగా చేసినవేనని, ఆమె వ్యక్తిత్వాన్ని చంపేయడమే కాకుండా.. తనను రాజకీయంగా దెబ్బతీయడం కూడా ఈ ఆరోపణల వెనుక ఉన్న ఉద్దేశమని స్మృతి ఇరానీ చెప్పుకొచ్చారు. ఇదంతా కాంగ్రెస్ అధినాయకత్వంగా చెప్పుకునే గాంధీ కుటుంబం కనుసన్నల్లోనే జరిగిందని ఆమె ఆరోపించారు.

తన కూతురిపై ఆరోపణలు చేసేందుకే పనిగట్టుకుని ప్రెస్‌మీట్ పెట్టించిన గాంధీ కుటుంబానికి ఒక్కటే చెబుతున్నానని అంటూ  రాహుల్ గాంధీపై తాను 2024లో జరిగే లోక్‌సభ ఎన్నికల్లో మళ్లీ అమేథీ నుంచి పోటీ చేస్తానని, మళ్లీ రాహుల్‌ను ఓడిస్తానని ఆమె సవాల్ చేశారు. ఒక బీజేపీ కార్యకర్తగా, ఒక తల్లిగా ఇదే తన శపథం అని  స్మృతి ఇరానీ చెప్పారు.

కాగా, అంతకుముందు స్మృతీ ఇరానీ కూతురు జోయిష్ ఇరానీ గోవాలో రెస్టారెంట్ నడుపుతున్నారని, అందులో ఫేక్ లైసెన్స్‌తో బార్ కూడా ఉందని కాంగ్రెస్‌ నేతలు జైరాం రమేశ్, పవన్ ఖేరా ఆరోపించారు. మోదీ ప్రభుత్వం స్మృతి ఇరానీని వెంటనే పదవి నుంచి తొలగించాలని డిమాండ్ చేశారు.

అయితే ఈ ఆరోపణలను జోయిష్ ఇరానీ తరఫు న్యాయవాది కొట్టిపారేశారు. అవి నిరాధారమైనవని, స్మృతి ఇరానీ కూతురు అయినందువల్లే ఆమెపై రాజకీయ దురుద్దేశంతో లేని పోని ఆరోపణలు చేస్తున్నారని పేర్కొన్నారు.