నిజాయితీకి నిదర్శనం `ఆంధ్రకేసరి’ టంగుటూరి ప్రకాశం

ఆయన ఉపాధ్యాయుడు హనుమంతరావు రాజమండ్రికి బదిలీపై వెడుతూ అక్కడ ఎక్కువగా చదువుకొనే అవకాశాలు ఉంటాయని ప్రకాశంను కూడా తీసుకెళ్లి చదివించారు. చిన్నప్పటి నుండి న్యాయవాది వృత్తిపట్ల ఆసక్తి ఏర్పర్చుకున్న ఆయన పట్టుదలతో సాధించుకొని, ఆ వృత్తిలో బాగా రాణించారు. అయితే  గాంధీజీ పిలుపుతో తన ప్లీడరు వృత్తిని వదిలి జాతీయోద్యమంలోకి ఉరికారు.

నీయవాదిగా ఎంతోమందిని జైళ్ళనుంచి బైటకు తెచ్చిన ఆయన ప్రజల కోసం తాను స్వచ్చందంగా జైలు శిక్షను అనుభవించాడు.గాంధీజీ ఆశయాల ప్రచారం కోసం ‘స్వరాజ్య’ పత్రికను స్థాపించి గాంధీజీకి నిజమైన అనుచరునిగా ఆయన మెప్పును పొందారు.అదే గాంధీజీ కొందరి చెప్పుడు మాటలు విని ఆయనను తప్పు పట్టుకుంటే గాంధీజీని సైతం నిలదీశాడు.

సైమన్ కమీషన్ కు వ్యతిరేకంగా మద్రాస్ నగరంలో హర్తాళ్ జరిగినప్పుడు తెల్లవాడి తుపాకీకి తన గుండెనే ఎదురు పెట్టారు. ఆనాటి ఉమ్మడి మద్రాస్ రాష్ట్రానికి రెవిన్యూ మంత్రిగా,ముఖ్యమంత్రి గా పనిచేశారు. తెలుగు వారికి ప్రత్యేక రాష్ట్రం ఏర్పడినప్పుడు (1953)తొలి తెలుగు ముఖ్యమంత్రి అయ్యారు.

రాష్ట్ర ఏర్పాటు సందర్భంగా దేశంలోనే తొలిసారిగా ఖైదీలందరినీ విడుదల చేశారు. అంతటి మహనీయుడు తన చరమ దశలో కటిక దారిద్రయాన్ని అనుభవించారు. తనను శాలువతో సత్కరిస్తే ‘ఈ శాలువ నాకెందుకురా! ఆ డబ్బుతో అరటిపళ్ళు కొనిస్తే  ఓ పూట గడిచేది కదురా!!’ అని తన అనుచరునితో అన్నారంటే ఆయన పరిస్థితి అర్థం చేసుకోవచ్చు.

ఆయన మూలంగా అధికారంలోకి వచ్చిన మహా నాయకులందరూ అధికారం కోసం ఆయనకు వెన్నుపోటు పొడిచినా అధికారం కోసం పాకులాడలేదు. 85 సంవత్సరాల వయస్సులో రోహిణీ కార్తె మండుటెండలో వడదెబ్బకు మరణించిన ఇద్దరు ముదుసలుల కుటుంబ పరామర్శ కోసం వెళ్ళి తాను వడదెబ్బకు గురై 1957 మే 20న మృతిచెందారు.