`తాజ్’ గదులను తెరవాలని హైకోర్టులో పిటిషన్

బీజేపీ అయోధ్య మీడియా ఇన్‌ఛార్జి డాక్టర్ రజనీశ్ సింగ్ అలహాబాద్ హైకోర్టు లక్నో ధర్మాసనంలో ఈ పిటిషన్‌ను దాఖలు చేశారు.  తాజ్ మహల్ విషయంలో చాలా కాలం నుంచి వివాదం ఉందని డాక్టర్ రజనీశ్ చెప్పారు. ఈ కట్టడంలోని 20 గదులకు తాళాలు వేశారని, వీటిలోకి ఎవరికీ ప్రవేశం కల్పించడం లేదని పేర్కొన్నారు.

వీటిలో హిందూ దేవుళ్ళ విగ్రహాలు, శాసనాలు, రాత ప్రతులు ఉన్నాయనే నమ్మకం ఉందని ఆయన తెలిపారు. వాస్తవాలను తెలుసుకునేందుకు ఈ గదులను తెరవాలని ఎఎస్ఐ ని ఆదేశించాలని తాను హైకోర్టులో పిటిషన్ వేశానని తెలిపారు.

వీటిలో హిందూ దేవుళ్ళ విగ్రహాలు, శాసనాలు, రాత ప్రతులు ఉన్నాయేమో తెలుసుకునేందుకు ఓ కమిటీని ఏర్పాటు చేయాలని ఉత్తర ప్రదేశ్ రాష్ట్ర ప్రభుత్వాన్ని ఆదేశించాలని కోరినట్లు ఆయన తెలిపారు. ఈ గదులను తెరచి, వాటిలో ఏం ఉందో తెలుసుకుంటే, వివాదాలు పరిష్కారమవుతాయని ఆశాభావం వ్యక్తం చేశారు.

ఆ విధంగా చేయడం వల్లన ఎటువంటి హాని జరగబోదని స్పష్టం చేశారు.  తాజ్ మహల్ మొదట్లో తేజో మహాలయ అనే హిందూ దేవాలయం అని పలువురు చాలాకాలంగా వాదిస్తున్నారు. ఇది అసలు శివ దేవాలయం అని పేర్కొంటూ ఆరుగురు న్యాయవాదులు 2015లో ఓ కేసు దాఖలు చేశారు. 2017లో బిజెపి నేత వినయ్ కతియార్ కూడా అదే వాదనను వినిపిస్తూ, అక్కడకు వెళ్లి హిందువుల వాదనలను పరిశీలించమని ముఖ్యమంత్రి యోగి ఆదిత్యనాథ్ ను కోరారు.