కోల్‌కతాలో బిజెపి కార్యకర్త మృతిపై సిబిఐ దర్యాప్తు..  అమిత్ షా

బెంగాల్‌లో హింస సంస్కృతి, భయానక వాతావరణం  ప్రబలంగా నెలకొందని  అమిత్ షా మండిపడ్డారు. “నిన్ననే టిఎంసి మూడవ సారి అధికారంలోకి వచ్చిన తర్వాత మొదటి వార్షికోత్సవాన్ని జరుపుకుంది.  ఇప్పుడు చౌరాసియాను చంపిన సందర్భం ఉంది” అని హోం మంత్రి మరణించిన వారి కుటుంబ సభ్యులను కలిసిన తర్వాత విలేకరులతో తెలిపారు.  చౌరాసియా మృతిపై కేంద్ర హోం మంత్రిత్వ శాఖ సీరియస్‌గా వ్యవహరిస్తోందని, దీనిపై నివేదిక ఇవ్వాలని రాష్ట్ర ప్రభుత్వాన్ని కోరినదని ఆయన వెల్లడించారు.

మరోవైపు, ఈ హత్యకు అధికార తృణమూల్ కాంగ్రెస్ కారణమని బీజేపీ ఆరోపించింది. చౌరాసియా సమర్ధుడైన పార్టీ కార్యకర్త అని బీజేపీ ప్రతినిధి సమిక్ భట్టాచార్య తెలిపారు. భట్టాచార్య మృతి వార్తతో అమిత్‌షా చాలా మనస్తాపం చెందారని, ఎన్‌ఎస్‌సీ బోస్ విమానాశ్రయంలో తన స్వాగతానికి ఎలాంటి ఏర్పాట్లు చేయవద్దని కూడా అమిత్‌‌షా తమకు సూచించారని బీజేపీ సీనియర్ నేత ఒకరు తెలిపారు.

కోల్‌కతా విమానాశ్రయం నుంచి అమిత్‌షా నేరుగా చౌరాసియా నివాసానికి చేరుకుని అతని కుటుంబ సభ్యులను కలిశారు. అనంతరం మీడియాతో అమిత్‌షా మాట్లాడుతూ, ఇటీవల పలు కేసుల్లో సీబీఐ దర్యాప్తునకు కోల్‌కతా హైకోర్టు  ఆదేశించిందని చెప్పారు. దీనిని  బట్టే రాష్ట్ర ప్రజలు కానీ, న్యాయవ్యవస్థ కానీ  రాష్ట్ర యంత్రాంగం, పోలీసులపై విశ్వాసం కోల్పోయిన విషయం అవగతమవుతోందని ధ్వజమెత్తారు.

హింసాత్మక ఘటనల్లో గత లెఫ్ట్ ఫ్రెంట్ ప్రభుత్వాన్ని కూడా పశ్చిమ బెంగాల్ ప్రభుత్వం మించిపోయిందని అమిత్ షా  విమర్శించారు. రాష్ట్రంలో ప్రస్తుతం చట్టబద్ధ పాలన సాగడం లేదని మండిపడ్డారు.  విపక్ష నేతలు, కార్యకర్తలను అధికార పార్టీ, ప్రభుత్వ యంత్రాంగం నిరంతరం లక్ష్యంగా పెట్టుకుంటుందని చెప్పారు.