అంటరానితనం గోడలు కూల్చిన రామనుజాచార్యులు

రామనుజాచార్యులు అసమానత్వపు గోడలు కూల్చారని,  వెనుకబడినవారిని పూజారులుగా చేశారని కేంద్ర రక్షణ మంత్రి రాజ్ నాథ్ సింగ్ తెలిపారు. హైదరాబాద్ ముచ్చింతల్ లో శ్రీరామనుజాచార్య సహస్రాబ్ది సమారోహ వేడుకలలో  కుటుంబసమేతంగా సమతామూర్తి కేంద్రాన్ని గురువారం సాయంత్రం దర్శించుకున్న ఆయన అంటరానితనంపై రామనుజాచార్యులు గళమెత్తారన్నారని కొనియాడారు.

లింకన్ వంటి వారు కూడా సమానత్వం కోసం కృషి చేశారని చెబుతూ సమాజంలో అందరూ సమానమే అని చిన్నజీయర్ స్వామి చాటుతున్నారని ప్రశంసించారు. ఆది శంకరచార్యులు సనాతన ధర్మం కోసం అపారమైన కృషి చేశారని గుర్తు చేశారు. ప్రవచన మందిరంలో ప్రసంగించిన రాజ్ నాథ్ సింగ్   శ్రీరామనగరంలోని 216 అడుగుల సమతా మూర్తి ప్రతిమను ఒక మహా విగ్రహంలా కాకుండా, రామనుజాచార్యుల మరో అవతారంగా భావిస్తున్నానని పేర్కొన్నారు.

తనకు గురువు చెప్పిన ముక్తిమంత్రాన్ని గుప్తంగా పెట్టకుండా అందరి ముందూ ఆలపించారని గుర్తు చేశారు. తాను నరకానికి వెళ్లినా ఫర్వాలేదని.. వేలాది మందికి ముక్తి లభిస్తే చాలని చెప్పిన మహనీయుడు రామానుజాచార్యులని  రాజ్‌నాథ్‌ తెలిపారు. లోకకళ్యాణం కోసం హిందువుల ఐక్యత కోసం రామానుజాచార్యులు ఎంతో కృషి చేశారని పేర్కొన్నారు

1000  సంవత్సరాల  క్రింద దేవాలయాల తలుపులు..  అన్నీ కులాల వాళ్ళ కోసం  తెరిచి రామానుజ చార్యులు సమానత్వం చాటారని ఆధ్యాత్మిక గురువు రవి శంకర్ చెప్పారు.  నేటి తరం వారికి మన సంస్కృతి సాంప్రదాయాలు తెలియాలంటే ఇలాంటి కార్యక్రమాలు జరగాలని పేర్కొన్నారు. ముచ్చింతల క్షేత్రం భవిష్యత్తులో పెద్ద ఆధ్యాత్మిక కేంద్రంగా మారుతుందని ఆయన ఆశాభావం వ్యక్తం చేశారు. 

ప్రధాని నరేంద్ర మోదీ హయాంలో శ్రీరామానుజ సహస్రాబ్ది ఉత్సవాలు నిర్వహించుకోవడం శభపరిణామమని శ్రీశ్రీశ్రీ త్రిదండి చిన్నజీయర్‌స్వామీ సంతోషం వ్యక్తం చేశారు. ప్రధాని మోదీ కాశీలో మహదేవుడి ఆలయ పునరుద్ధరించడం, అయోధ్యలో రామ మందిరం పునర్‌ నిర్మిస్తుండటం ద్వారా హిందూ ధర్మం పట్ల తమకు ఉన్న నిబద్ధతను చాటుకున్నారని పేర్కొన్నారు . దేశం గర్వపడేలా కేంద్ర రక్షణ మంత్రి రాజ్‌ నాథ్ సింగ్‌ నిర్ణయాలు తీసుకుంటున్నారని ప్రశంసించారు.  రాజ్‌నాథ్  మార్గనిర్దేశంలో భారత ఆర్మీ మరింత శక్తివంతంగా తయారైందని కొనియాడారు.