గడ్డిపోచలాగా పీకేస్తా మనుకొంటే… గడ్డపారలాగా నిలబడ్డా

మా దగ్గరున్న సర్పంచులకు బిల్లులు రిలీజ్ చేసినట్లుగా.. తెలంగాణ వ్యాప్తంగా ఉన్న అందరి సర్పంచుల బిల్లులు రిలీజ్ చేయాలని రాజేందర్ డిమాండ్ చేశారు. ఓట్ల  కోసమే హుజురాబాద్ సర్పంచులకు రావాల్సిన బిల్లులు మంజూరు చేస్తున్నారని చెప్పారు. హరీశ్ రావు రాత్రి పూట పల్లెల్లో అడ్డాలు పెట్టి.. నాతో తిరిగేవాళ్లను కలిసి టీఆర్ఎస్ లోకి రావాలని ప్రలోభపెడుతూ.. బేరాలాడుతున్నాడని ఆరోపించారు. 

హరీశ్ ఒకప్పుడు మాట్లాడితే తెలంగాణ పులకించిపోయేది… ఆయన ఇప్పుడు ఎంతకు దిగజారాడో చూస్తున్నారని రాజేందర్ విచారం వ్యక్తం చేశారు. కేసీఆర్ పంపిస్తే.. తన ఉద్యమ సహచరున్నైన తనను బొందపెట్టాలని హరీశ్ చూస్తున్నాడని ఆవేదన వ్యక్తం చేశారు. 

వాళ్లు పంచుతున్న డబ్బుల వెనక, ఇస్తున్న పథకాల జీవో వెనక ప్రజల మీద ప్రేమలేదు.. కేవలం ఓట్లు పొందాలనే కుట్ర ఉందని ఆరోపించారు. నిన్నటి వరకు నాతో కలిసి తిరిగినోడు, కలిసి తిన్నోడు.. తెల్లారితే వాళ్ల దగ్గరికి పోతున్నారు. నాతో తిరగడం వల్లే నాయకుల ధర పెరుగుతోందని.. ధర చెల్లించి వాళ్లను కొనుక్కుపోతున్నారని పేర్కొన్నారు. 

హుజురాబాద్ లో రూ 200 కోట్లు ఖర్చు చేసే శక్తి మీకు ఎలా వచ్చింది? మీది అక్రమ సంపాదన కాదా” అని తెలంగాణ సమాజం మిమ్మల్ని అడగబోతోందని హెచ్చరించారు. అంతేకాదు ఖచ్చితంగా ఈ సమాజం.. కేసీఆర్ ను బోనులో నిలబెట్టి తీరుతుందని, ఈ ఉచ్చునుంచి తప్పించుకోలేరని ఈటెల హెచ్చరించారు.