బీజేపీలో చేరిన మలయాళీ నటుడు దేవన్‌

తిరువనంతపురంలో బీజేపీ ఆధ్వర్యంలో చేపట్టిన కేరళ విజయ యాత్రలో పాల్గొన్న కేంద్ర హోంమంత్రి అమిత్‌షా సమక్షంలో ఆయన బిజెపి తీర్ధం పుచ్చుకున్నారు. శంఖుముఖం బీచ్‌లో నిర్వహించిన బహిరంగసభలో దేవన్‌ బీజేపీ కండువా కప్పుకున్నారు. త్రిస్సూర్‌లో జన్మించని దేవన్‌ పూర్తిపేరు దేవన్‌ శ్రీనివాసన్‌. బుల్లితెర నటుడిగా ఆరంగేట్రం చేసిన దేవన్‌.. పలు సినిమాల్లో నటించడమే కాకుండా నిర్మాతగా పలు సినిమాలను తెరకెక్కించారు. మళయాలంతో పాటు కన్నడ, తెలుగు సినిమాల్లో కూడా నటించి మంచి పేరు సంపాదించుకున్నారు.

కాలేజీ రోజుల్లో కాంగ్రెస్‌ అభిమానిగా ఉన్న దేవన్‌.. అనంతర కాలంలో కేరళ పీపుల్స్ పార్టీని స్థాపించారు. ప్రస్తుతం కేరళ అసెంబ్లీకి ఎన్నికలు జరుగుతున్న సమయంలో దేవన్‌ బీజేపీలో చేరడం తమకు లాభిస్తుందని పలువురు బీజేపీ నాయకులు భావిస్తున్నారు. ఈ సందర్భంగా కేరళ బీజేపీలో ఇటీవల చేరిన మెట్రో శ్రీధరన్‌ మాట్లాడుతూ.. బీజేపీ ఒక్కటే కేరళను కాపాడుతుందని భావిస్తున్నట్లు చెప్పారు. తాను ఎన్నో ప్రాజెక్టులను విజయవంతంగా పూర్తిచేశానని, ఇప్పుడు కేరళ అభివృద్ధిని కాంక్షించి బీజేపీలో చేరానని శ్రీధరన్‌ స్పష్టంచేశారు.