రేషన్ కార్డులు లేకుండానే రేవంత్ ఆరు గ్యారంటీలు!

కాంగ్రెస్ పార్టీ ఎన్నికల సమయంలో 200 యూనిట్ల వరకు ఉచిత విద్యుత్ ప్రకటించింది. ఈ గ్యారంటీ అమలుకు రేషన్ కార్డు అర్హత పెడతారా? అనే సందేహం ప్రజల్లో ఉంది. ఢిల్లీ ప్రభుత్వం 200 యూనిట్ల వరకు ఉచిత విద్యుత్ పథకాన్ని అమలు చేస్తుంది. అక్కడ రేషన్ కార్డు అర్హత లేకుండా ఎవరైనా సరే 200 యూనిట్ల లోపు విద్యుత్ వినియోగిస్తే బిల్లులు చెల్లించాల్సిన అవసరంలేదు. తెలంగాణలో కూడా ఇదే తరహాలో అమలు చేయాలని కోరుతున్నారు. 

వీటితో పాటు రూ.500 గ్యాస్ సిలిండర్, మహిళలకు ప్రతి నెల రూ.2500 ఆర్థిక సాయం, రైతు భరోసా కింద రూ.15 వేలు, నిరుద్యోగ భృతి, చేయూత కింద రూ.4 వేల పింఛన్…ఇలా ప్రతి గ్యారంటీపై ప్రజల్లో అనేక సందేహాలు వ్యక్తం అవుతున్నాయి. ఆయా పధకాలను ఏవిధంగా అమలు జరుపుతారో అన్న విషయమై ప్రభుత్వం స్పష్టత ఇవ్వడం లేదు.

కాంగ్రెస్ పార్టీ అధికారం చేపట్టిన వెంటనే పంట పెట్టుబడి సహాయం క్రింద రైతుల ఖాతాల్లో రూ.15 వేలు జమ చేస్తామని చెప్పిన రేవంత్ రెడ్డి ముఖ్యమంత్రిగా పదవి చేపట్టి నెల రోజులు కావస్తున్నా రైతుబంధు నిధుల గురించి ఊసెత్తడం లేదు. అధికారంలోకి వచ్చిన మొదటి నెలలోనే లక్ష ఉద్యోగాల భర్తీ చేస్తామన్న నేతలు ఇంకా ఆ ప్రస్తావన తీసుకు రావడం లేదు. 

పధకాల అమలుకు సంబంధించి అధికారిక నిబంధనలు విడుదల చేయకుండా ముందుగా దరఖాస్తులు స్వీకరించడం చూస్తుంటే ప్రజల దృష్టి మళ్లించడం కోసమే అనే అభిప్రాయం కలుగుతుంది. ముందుగా దరఖాస్తులు తీసుకొని, ఏమేరకు ఆర్థిక భారం మోయాల్సి వస్తుందో అంచనా వేసుకొని, ఆ తర్వాత వీలయినంత భారం తగ్గించుకునేందుకు దారులు వెదుక్కునే విధంగా ప్రభుత్వ ఆలోచనలు ఉన్నట్లు అనుమానాలు కలుగుతున్నాయి.

పైగా, ఫారంలో బ్యాంకు అకౌంట్‌ నంబర్‌ నమోదుకు అవకాశం ఇవ్వలేదు. దీంతో నగదు బదిలీ పథకాలు ఎలా అమలు చేస్తారంటూ అధికారులను ప్రజలు ప్రశ్నిస్తున్నారు. మహిళలకు ప్రతి నెలా రూ.2500 సాయంపై స్పష్టత లేదు.  ఒక ఇంట్లో ఎంత మంది మహిళలు ఉంటే అందరికీ రూ.2500 ఇస్తారా? లేక ఒక్కరికే ఇస్తారా? భర్తకు పింఛన్‌ వస్తే భార్యకు ఇవ్వ రా? రేషన్‌కార్డుల్లో తల్లీకూతుళ్ల పే ర్లుండి, కూతురి పెళ్లయిపోతే అత్తగారింటి వద్ద మహాలక్ష్మి డబ్బులు జమ చేస్తారా? లేక తల్లిగారింటి వద్ద దరఖాస్తు చేసుకోవాలా? అన్న ప్రశ్నలు వినిపించాయి.

ఒంటరి మహిళలు, బీడీ కార్మికులు, వితంతు తదితర పెన్షన్‌ తీసుకుంటున్న మహిళలకు కూడా అదనంగా 2500 ఇస్తారా? లేక ఏదైనా ఒక్క పెన్షన్‌ మాత్రమే ఇస్తారా? అన్న సందేహాలు తలెత్తుతున్నాయి. దరఖాస్తు ఫారాలను ప్రజలకు అధికారులు ఉచితంగా ఇవ్వాలని, వాటిని విక్రయిస్తే కఠిన చర్యలు తీసుకొంటామని హెచ్చరించారు. అయితే, ఈ కార్యక్రమంలో తొలిరోజే అనేక చోట్ల గందరగోళం నెలకొంది. చాలాచోట్ల దరఖాస్తు ఫారాల కొరత ఏర్పడింది. ఇదే అదనుగా జిరాక్స్‌ సెంటర్ల యజమానులు ఒక్కో దరఖాస్తు ఫారం జిరాక్స్‌ తీసేంకు రూ.30 నుంచి రూ.100 వరకు కూడా వసూలు చేశారు.