విద్యుత్ కోత‌లు, ఎరువుల కొర‌త లేకుండా చేసింది మోదీనే

కేంద్రంలో మోదీ సర్కార్ రాకముందు దేశ వ్యాప్తంగా విద్యుత్ కొరత ఉండేదని, ఇప్పుడు వ్యవసాయ రంగానికి దేశంలో ఎక్కడ విద్యుత్ కోతలు లేవని కేంద్ర‌మంత్రి, రాష్త్ర బీజేపీ అధ్యక్షుడు జి. కిష‌న్ రెడ్డి తెలిపారు.  హైద‌రాబాద్ నాంప‌ల్లి గ్రౌండ్ లో ఏర్పాటు చేసిన రైతు స‌ద‌స్సులో ఆయ‌న మాట్లాడుతూ, రామగుండం ఎన్టీపీసీకి మోదీనే శంఖుస్థాపన చేశార‌ని, ఆయ‌నే దానిని ప్రారంభం కూడా చేశారని గుర్తు చేశారు.

ఎరువుల సమస్యను తీర్చింది మోదీనేనని అంటూ కొరత, కోతలు లేని నూతన భారతావనిని మోదీ ఆవిష్కరించారని పేర్కొన్నారు. 10 ఎకరాలు ఉన్న రైతుకు ఎరువుల మీద రూ. 2 లక్షల సబ్సిడీ కేంద్రం ఇస్తుందని తెలిపారు. ఎరువుల పరిశ్రమ, ఎన్టీపీసీ ప్రాజెక్ట్ ప్రారంభానికి మోదీ వస్తే కేసీఆర్ ఫాంహౌస్, ప్రగతి భవన్ లో పడుకున్నాడని విమర్శించారు.

కొడుకు సీఎం, అయన జాతీయ నేత కావాలని శ్రద్ద తప్ప కేసీఆర్ కి తెలంగాణ ప్రజల పై లేదని కిషన్ రెడ్డి ధ్వజమెత్తారు. ఓట్ల పైన ధ్యాస తప్ప తెలంగాణ అభివృద్ది పై ఆయనకు చితశుద్ది లేదని మండిపడ్డారు. కాళేశ్వరం ప్రాజెక్ట్ ఫిజిబిలిటీ కాదు, దాన్ని నిర్వహింపలేమని  అంటున్నారని తెలిపారు. 

ఇంజనీర్లను పక్కన పెట్టి ఫాంహౌస్ ఇంజనీర్ గా మారి తెలంగాణ ప్రాజెక్ట్ లను కేసీఆర్ ముంచుతున్నాడని కేంద్ర మంత్రి ఆందోళన వ్యక్తం చేశారు. కృష్ణా ట్రిబ్యునల్ ఆలస్యానికి కారణం కేసీఆరేనని కిషన్ రెడ్డి పేర్కొన్నారు. తెలంగాణ సస్యశ్యామలం కావాలి అంటే నదుల అనుసంధానం జరగాలని స్పష్టం చేశారు. సాగునీటి ప్రాజెక్టులు కేసీఆర్ కుటుంబానికి ఏటీఎంలుగా మారాయని విమర్శించారు.