ఎర్ర కోట వేదికగా మణిపూర్​లో శాంతి కోసం మోదీ పిలుపు

77వ స్వాతంత్ర్య దినోత్సవం నేపథ్యంలో ప్రధాని మోదీ మంగళవారం ఉదయం తొలుత రాజ్​ఘాట్​కు వెళ్లారు. మహాత్మా గాంధీకి నివాళులర్పించారు. దేశ క్షేమం కోసం ప్రార్థించారు. అనంతరం రాజ్​ఘాట్​ నుంచి ఎర్ర కోటకు వెళ్లారు మోదీ. రక్షణమంత్రి రాజ్​నాథ్​ సింగ్​ ఆయనకు స్వాగతం పలికారు. కొన్ని క్షణాల తర్వాత ఎర్రకోటపై జాతీయ జెండాను ఆవిష్కరించారు మోదీ. అనంతరం ఐఏఎఫ్​ హెలికాప్టర్​ మువ్వనెల జెండాపై పూల వర్షం కురిపించింది.

అనంతరం ఆయన జాతిని ఉద్దేశించి ప్రసంగిస్తూ మన యువత సొంత ఉపగ్రహాలను కక్షలోకి ప్రవేశ పెడుతోందని, ఆకాశమే హద్దుగా మన యువత అనేక రంగాల్లో సత్తా చాటుతోందని కొనియాడారు. అమృతకాలంలో నవయవ్వన భారతం ఆవిష్కృతమవుతోందని తెలిపారు. అభివృద్ధి మహానగరాలకే కాదని, చిన్న పట్టణాలకు విస్తరిస్తోందని, చిన్న పట్టణాల్లోని యువత సాంకేతికతలో కొత్త మెరుపులు మెరిపిస్తోందని మోదీ వివరించారు. పేద క్రీడాకారులు కూడా సమున్నత స్థానాలను అందుకున్నారని ప్రశంసించారు.

“ప్రపంచంలో మనది పెద్ద ప్రజాస్వామ్య దేశం. మనం విశ్వంలో నంబర్ 1గా ఉన్నాం. ఇంత విశాల దేశం.. 140 కోట్ల మంది జనాభాగా ఇవాళ స్వాతంత్య్ర దినోత్సవం జరుపుకుంటున్నాం. అందరికీ శుభాకాంక్షలు తెలుపుతున్నాను. ఎందరో త్యాగాల ఫలితంగా స్వాతంత్య్రం వచ్చింది. వారికి ధన్యవాదాలు తెలుపుతున్నాను” అని తెలిపారు. 

బాపూజీ చూపిన అహింస మార్గంలో స్వాతంత్య్రం సాధించామని చెబుతూ  ఈ ఏడాది అరవిందుడు, దయానంద సరస్వతి 150వ శతజయంతి జరుపుకుంటున్నామని తెలియజేశారు. రాణి దుర్గావతి, మీరాబాయిని స్మరించుకోవాల్సిన తరుణమిది అని కొనియాడారు.  వ్యవసాయ రంగంలో మన రైతుల కృషి సాటిలేనిదని ప్రధాని ప్రశంసించారు.  ప్రపంచానికి ఆహార ధాన్యాలు అందించే స్థాయికి మన రైతులు ఎదిగారని, భారతీయ శ్రామికవర్గం చెమటొడ్చి జాతి సంపదను పెంచుతోందని ప్రధాని కొనియాడారు. చిన్న పరిశ్రమలు, చిన్న వ్యాపారాలు కొత్త దశాదిశను నిర్దేశిస్తున్నాయని మెచ్చుకున్నారు.