అసలు మునుగోడు ఉపఎన్నిక ఎందుకు?

2018 శాసనసభ ఎన్నికల తర్వాత ఇది ఐదవ ఉప ఎన్నిక.  ఇంతకు ముందు జరిగిన 4 ఉప ఎన్నికలలో తెరాస ఒకటి (హుజూర్ నగర్) గెల్చుకుంది, ఒకటి (నాగార్జున సాగర్) నిలుపుకొంది, రెండు (దుబ్బాక, హుజూరాబాద్) చేజార్చుకొంది. కాంగ్రెసు ఒకటి (హుజూర్ నగర్) చేజార్చుకొంది.  కాగా భాజపా రెండు గెల్చుకుంది (దుబ్బాక, హుజూరాబాద్). ఇప్పుడు మునుగోడును తెరాస గెల్చుకొంటే, ఆ పార్టీ గెలుచుకున్నది రెండు అవుతాయి. కోల్పోయిన రెండింటిని కూడదీసుకొన్నట్లవుతుంది.

అధికార పక్షంగా తెరాసకు ఇక్కడ గెలుపు అనివార్యం. ఇక్కడ ఓడిపోతే ఇక ప్రజల మధ్యకు రావడానికి మొహం చెల్లదు. తమ శాసన సభ్యులతో సహా వివిధ స్థాయిలలో ఉన్న నాయకులు, కార్యకర్తలు పార్టీ ని వదిలేసి పోయే ప్రమాదం పొంచి ఉంది.

మునుగోడును గనుక కాంగ్రెస్ గెలుచుకున్నట్లయితే, ఆ పార్టీకి పోయిన ప్రాణం లేచివచ్చినట్లవుతుంది.  కాగా భాజపా గెల్చుకొన్నట్లయితే, ఆ పార్టీకి ఇది మూడవ వరుస విజయమవుతుంది. తర్వాత జరిగే శాసనసభ ఎన్నికల్లో భాజపా విజయం సునిశ్చయం అన్న అభిప్రాయం తిరుగులేని విధంగా బలపడుతుంది.

 ఆ దృష్ట్యా మునుగోడు లో విజయం మూడు పార్టీలకూ ఎంతో కీలకమైంది. ఐదు ఆటల సీరియస్ లో రెండు పాయింట్లు ఇప్పటికే తమ ఖాతాలో వేసికొని భాజపా అందరికంటే ముందున్నది. మునుగోడు కూడా గెలిస్తే భాజపాకు ఆపైన అంతా అప్రతిహత పురోగమనమే. ఈ నేపధ్యంలో ఎవరు ఎలా తమ సామర్థ్యాలు ఋజువు చేసుకుంటారో చూద్దాం.