అమెజాన్‌ మరో ఈస్ట్‌ ఇండియా కంపెనీ:

ఈ-కామర్స్ దిగ్గజం అమెజాన్‌ను “ఈస్ట్ ఇండియా కంపెనీ 2.0” గా ప్రముఖ హిందీ వారపత్రిక  పాంచజన్య అభివర్ణించింది.  ప్రభుత్వ అనుకూలమైన విధానాల కోసం ఈ సంస్థ కోట్లాది రూపాయల లంచాలు చెల్లించిందని ఆరోపించింది. అక్టోబర్ 3 న విడుదల కానున్న దాని తాజా సంచికలో, పాంచజన్య అమెజాన్‌పై తీవ్ర విమర్శలు చేసే కవర్ పేజీ కధనాన్ని ప్రచురించింది.

“18 వ శతాబ్దంలో భారతదేశాన్ని స్వాధీనం చేసుకోవడానికి ఈస్టిండియా కంపెనీ ఏ విధంగా వ్యవహరించిందో, అమెజాన్ కార్యకలాపాలలో అదే విధంగా కనిపిస్తున్నాయి” అని “ఈస్ట్ ఇండియా కంపెనీ 2.0” అనే శీర్షికలో రాసింది. అమెజాన్ భారతీయ మార్కెట్లో తన గుత్తాధిపత్యాన్ని స్థాపించాలని కోరుకుంటున్నట్లు పేర్కొంటూ, “అలా చేయడం కోసం, ఇది భారతీయ పౌరుల ఆర్థిక, రాజకీయ, వ్యక్తిగత స్వేచ్ఛను స్వాధీనం చేసుకోవడానికి చొరవ తీసుకోవడం ప్రారంభించింది” అని ఆరోపించింది.

అమెజాన్ వీడియో ప్లాట్‌ఫారమ్, ప్రైమ్ వీడియోలో భారతీయ సంస్కృతికి విరుద్ధమైన సినిమాలు, టెలివిజన్ సిరీస్‌లను విడుదల చేస్తున్నట్లు కథనం చెబుతోంది. అమెజాన్ అనేక  బినామీ సంస్థలతో పనిచేస్తున్నదని, “తనకు అనుకూలంగా ప్రభుత్వ విధానాలు ఉండేటట్లు ప్రభావితం చేయడం కోసం కోట్ల రూపాయల లంచాలను పంపిణీ చేసినట్లు నివేదికలు ఉన్నాయి” అని కూడా ఇది ఆరోపించింది.

ఫ్యూచర్ గ్రూప్ స్వాధీనంపై అమెజాన్ చట్టపరమైన గొడవలో చిక్కుకుంది. కాంపిటీషన్ కమిషన్ ఆఫ్ ఇండియా (సిసిఐ) విచారణను ఎదుర్కొంటోంది. ఈ అమెరికా ఇ-కామర్స్ దిగ్గజం భారతదేశంలో దాని చట్టపరమైన ప్రతినిధులు చెల్లించిన లంచాలపై దర్యాప్తు చేస్తున్నట్లు నివేదికలు వచ్చాయి.

2018-20 కాలంలో దేశంలో ఉనికిని కొనసాగించడానికి ఇది రూ .8,546 కోట్లు లేదా 1.2 బిలియన్ డాలర్ల చట్టపరమైన ఖర్చులను ఖర్చు చేసింది. ప్రధాన ప్రతిపక్ష పార్టీ కాంగ్రెస్, అమెజాన్‌తో సంబంధం ఉన్న లంచం ఆరోపణలపై సుప్రీంకోర్టు పర్యవేక్షణలో విచారణ జరపాలని డిమాండ్ చేసింది.

అంతకుముందు, స్వదేశీ జాగరణ్ మంచ్ అమెజాన్ వంటి ఇ-కామర్స్ ప్లేయర్‌లపై వ్యాపారుల ప్రయోజనాలకు హాని కలిగించే చట్టాలను ఉల్లంఘించినందుకు, అనైతిక వ్యాపార పద్ధతులకు పాల్పడినందుకు చర్యలు తీసుకోవాలని డిమాండ్ చేసింది.