రాజమహేంద్రవరం మేయర్ అభ్యర్థిపై బీజేపీకి టీడీపీ ఒత్తిడి!

మరోవంక, వైఎస్ఆర్ కాంగ్రెస్ పార్టీ మేయర్ అభ్యర్థిగా దాసి వెంకట్రావు పేరు ఖరారైంది. ఈ నిర్ణయాన్ని వ్యతిరేకిస్తూ అజ్జరపు వాసు తిరుగుబాటు అభ్యర్థిగా బరిలోకి దిగుతున్నారు. తనకు పార్టీ ద్రోహం చేసిందని, మాజీ ఎంపీ భరత్ దీనికి బాధ్యుడని ఆరోపిస్తున్నారు.

ప్రధాన ప్రత్యర్థిని ఎదుర్కోవాల్సిన సమయంలో వైసీపీకి సొంత పార్టీ అసమ్మతి సవాలుగా మారింది. తిరుగుబాటు అభ్యర్థి పోటీ వల్ల పార్టీ ఓట్లు చీలే ప్రమాదం ఉంది. ఇప్పటికే ఎన్నికల్లో పార్టీ ప్రభావం పరిమితంగానే ఉంటుందన్న అభిప్రాయం ఆ పార్టీ వర్గాల్లో కనిపిస్తుంది. ఈ పరిస్థితి ప్రత్యర్థి కూటమికి అనుకూలంగా మారవచ్చు.

రిజర్వేషన్ల దెబ్బకు పాత నేతలకు షాక్ 

కొత్త డివిజన్ల పునర్వ్యవస్థీకరణతో 72 వార్డుల్లో కేవలం 17 మాత్రమే అన్‌రిజర్వుడు కేటగిరీలో మిగిలాయి. మహిళలకు 19, బీసీలకు 25, ఎస్సీలకు 10, ఎస్టీలకు ఒక డివిజన్ కేటాయించారు. రిజర్వేషన్లు రాజకీయ సమీకరణాలను ఒక్కసారిగా మార్చేశాయి. గతంలో బలమైన నాయకులుగా ఉన్నవారు ఇప్పుడు తమ స్థానాల్లో పోటీ చేయలేని పరిస్థితి ఏర్పడింది.

గ్రామాల విలీనంతో నగర రాజకీయాల పరిధి మారిపోయింది. పాత నగరంతో పాటు కొత్తగా చేరిన గ్రామీణ ప్రాంతాల ఓటర్లు కూడా మేయర్ ఎన్నికలో కీలకం కానున్నారు. కొత్త ప్రాంతాల్లో తాగునీరు, రహదారులు, పారిశుద్ధ్యం, డ్రైనేజీ ప్రధాన ఎన్నికల అంశాలుగా మారే అవకాశం ఉంది. గ్రామీణ ఓటర్ల మద్దతు సాధించిన పార్టీకే అదనపు రాజకీయ ప్రయోజనం దక్కవచ్చు.

తిరుగుబాట్లకు టీడీపీలోనే ఎక్కువ అవకాశం! 

డివిజన్ల పునర్వ్యవస్థీకరణ, రిజర్వేషన్ల మార్పులతో ఆశావహుల్లో అసంతృప్తి పెరుగుతోంది. కూటమిలో ముఖ్యంగా టీడీపీ నుంచి పార్టీ నిర్ణయాన్ని కాదని స్వతంత్రంగా పోటీ చేసే అభ్యర్థులు ఎక్కువగా ఉండవచ్చన్న అంచనాలు వినిపిస్తున్నాయి. మేయర్ అభ్యర్థి ఎంపిక తర్వాతే అసలు రాజకీయ ప్రక్రియ ఊపందుకోనుంది.

కూటమికి ప్రధాన సవాలు ప్రత్యర్థి పార్టీల కంటే సొంత పార్టీల్లోని అసమ్మతి కావచ్చు. టికెట్ దక్కని నేతలు తిరుగుబాటు చేస్తే ఓట్లు చీలే ప్రమాదం ఉంది. బుజ్జగింపులు, రాజీలు, నాయకుల మధ్య సర్దుబాట్లు కీలకం కానున్నాయి. మేయర్ అభ్యర్థి ప్రకటన నుంచి పోలింగ్ వరకు కూటమి ఐక్యతే ఎన్నికల ఫలితాలను ప్రభావితం చేసే ప్రధాన అంశంగా మారనుంది.