ఆసియా పారా క్రీడల్లో 114 పతకాలతో భారత్ సరికొత్త రికార్డు!

* పారా-అథ్లెట్ల‌పై ప్రధాని ప్రశంసల వ‌ర్షం

జపాన్‌లోని ఐచి-నాగోయాలో జరిగిన ఆసియా పారా గేమ్స్ 2026లో భారత పారా అథ్లెట్లు చారిత్రాత్మక ప్రదర్శనతో తమ ప్ర‌యాణాన్ని ముగించారు. ప్రపంచ రికార్డులు, అద్భుత విజయాలు, క్లీన్ స్వీప్‌లతో రాణించి ఏకంగా 114 పతకాలు సాధించి రికార్డు సృష్టించారు. ఇందులో 30 స్వర్ణాలు, 35 రజతాలు , 49 కాంస్య పతకాలు ఉన్నాయి. గతంలో హాంగ్‌జౌలో జరిగిన ఆసియా పారా గేమ్స్‌లో భారత్ సాధించిన 108 పతకాల (తొలుత 111 పతకాలు రాగా, డోపింగ్ కారణాల వల్ల మూడు రద్దయ్యాయి) రికార్డును ఈసారి తిరగరాశారు.

ఫలితంగా పతకాల పట్టికలో భారత్‌ నాలుగో స్థానంలో నిలిచింది. అయితే, దక్షిణ కొరియా ప్రదర్శనను బట్టి తుది ర్యాంకులో మార్పు ఉండే అవకాశం ఉంది. ఈసారి భారత బృందం ప్రదర్శన విశ్లేషకులను సైతం ఆశ్చర్యపరిచింది. గత ఎడిషన్‌లో 309 మంది అథ్లెట్లు పాల్గొనగా, ఈసారి కేవలం 168 మంది అథ్లెట్లు మాత్రమే పోటీపడ్డారు. పోటీపడిన ప్రతినిధుల సంఖ్య గణనీయంగా తగ్గినప్పటికీ, పతకాల సంఖ్య పెరగడం విశేషం.

ఆసియా పారా క్రీడల్లో అద్భుతమైన ప్రదర్శన కనబరిచి, పతకాలు సాధించిన భారతీయ పారా క్రీడాకారులను ప్రధాన మంత్రి నరేంద్ర మోదీ అభినందించారు. బ్యాడ్మింటన్, ఆర్చరీ, పారా-అథ్లెటిక్స్, షూటింగ్, స్విమ్మింగ్‌తో సహా వివిధ క్రీడా విభాగాల్లో భారతీయ క్రీడాకారులు సాధించిన విజయాలను ఆయన కొనియాడారు. ప్రధాని మోదీ ‘ఎక్స్’ వేదికగా ఈ ఖండాంతర క్రీడా ఈవెంట్‌లో గెలుచుకున్న పతకాలతో పాటు, క్రీడాకారులు నెలకొల్పిన ప్రపంచ రికార్డులను, సాధించిన చారిత్రాత్మక విజయాలను ప్రత్యేకంగా ప్రస్తావించారు.

భారత్ 100 పతకాల మార్కును దాటడంపై పారాలింపిక్ కమిటీ ఆఫ్ ఇండియా అధ్యక్షుడు దేవేంద్ర జజారియా సంతోషం వ్యక్తం చేశారు. “114 పతకాలు సాధించడం భారత పారా క్రీడలకు గర్వకారణం. ఇది మన అథ్లెట్ల కృషి, ధైర్యం, పట్టుదలకు నిదర్శనం. ప్రధానమంత్రి నరేంద్ర మోదీ కల్పించిన ప్రోత్సాహం, మద్దతు వల్లే ఈ చారిత్రాత్మక ఫలితాలు సాధ్యమయ్యాయి,” అని ఆయన పేర్కొన్నారు.

పోటీల చివరి రోజున భారత అథ్లెట్లు అద్భుత ప్రదర్శన చేశారు. పురుషుల జావెలిన్‌ త్రోలో సుమిత్‌ ఆంటిల్‌ 72.46 మీటర్ల దూరం విసిరి స్వర్ణం సాధించాడు. ఇదే విభాగంలో మహేంద్ర గుర్జర్‌ రజతం, సందీప్‌ సర్గర్‌ కాంస్యం గెలుచుకున్నారు. పురుషుల క్లబ్‌ త్రో ఎఫ్‌51 విభాగంలో ప్రణవ్‌ సూర్మా 32.87 మీటర్లతో ఆసియా పారా క్రీడల రికార్డు నెలకొల్పి స్వర్ణం సాధించాడు. ఈ పోటీల్లో అతడికి ఇది రెండో స్వర్ణం. ధరం‌బీర్‌ కాంస్య పతకంతో సత్తా చాటాడు.

పురుషుల జావెలిన్‌ త్రో ఎఫ్‌40/ఎఫ్‌41 విభాగంలో నవదీప్‌ సింగ్‌ 42.55 మీటర్ల దూరం విసిరి కాంస్యం సాధించాడు. పురుషుల 100 మీటర్ల టీ44 విభాగంలో సందీప్‌ 11.67 సెకన్లలో లక్ష్యాన్ని చేరి కాంస్య పతకం గెలుచుకున్నాడు. అంతకుముందు 400 మీటర్ల టీ44 విభాగంలో స్వర్ణం సాధించిన సందీప్‌.. ఈ పోటీల్లో రెండో పతకాన్ని తన ఖాతాలో వేసుకున్నాడు.

పారా బ్యాడ్మింటన్‌లో భారత క్రీడాకారులు కీలక విజయాలు అందించారు. పురుషుల సింగిల్స్‌ ఎస్‌ఎల్‌3 ఫైనల్లో నితేశ్‌ కుమార్‌ 21-18, 21-16తో సహచరుడు ప్రమోద్‌ భగత్‌పై గెలిచి స్వర్ణం సాధించాడు. ఇదే పోటీలో ప్రమోద్‌కు రజతం దక్కింది. పురుషుల సింగిల్స్‌ ఎస్‌ఎల్‌4 విభాగంలో నవీన్‌ శివకుమార్‌ 21-9, 21-17తో ఇండోనేసియాకు చెందిన ఫెర్డీ సెటియావాన్‌ను ఓడించి స్వర్ణం గెలుచుకున్నాడు.

మహిళల డబుల్స్‌ ఎస్‌ఎల్‌3-ఎస్‌యూ5 ఫైనల్లో తులసిమతి మురుగేశన్‌, మానసి జోషి జోడీ 21-16, 21-13తో చైనాకు చెందిన యాంగ్‌ క్విక్సియా, జియావో జుజియాన్‌ జంటను ఓడించి పసిడి పతకాన్ని సొంతం చేసుకుంది. మిక్స్‌డ్‌ డబుల్స్‌ ఎస్‌ఎల్‌3-ఎస్‌యూ5 ఫైనల్లో తులసిమతి మురుగేశన్‌, నితేశ్‌ కుమార్‌ జోడీ రజతంతో సరిపెట్టుకుంది. మహిళల 50 మీటర్ల రైఫిల్‌ 3 పొజిషన్స్‌ ఎస్‌హెచ్‌1 విభాగంలో మోనా అగర్వాల్‌ ప్రపంచ రికార్డు ప్రదర్శనతో స్వర్ణ పతకం సాధించింది. 357.5 పాయింట్లతో అగ్రస్థానంలో నిలిచిన ఆమె.. ఈ క్రీడల్లో రెండో స్వర్ణాన్ని అందుకుంది. ఇదే పోటీలో అవనీ లేఖరా నాలుగో స్థానంలో నిలిచి పతకాన్ని చేజార్చుకుంది.

పురుషుల 400 మీటర్ల టీ44 విభాగంలో సందీప్‌ కుమార్‌ 52.28 సెకన్లలో లక్ష్యాన్ని చేరి ప్రపంచ రికార్డుతో స్వర్ణం సాధించాడు. అజయ్‌ కుమార్‌ 53.61 సెకన్లతో కాంస్యం గెలుచుకున్నాడు. జావెలిన్‌ త్రో ఎఫ్‌37 విభాగంలో హనేయ్‌ 60.49 మీటర్ల దూరం విసిరి ప్రపంచ రికార్డుతో పసిడి పతకం సాధించాడు. పురుషుల రికర్వ్‌ టీమ్‌ ఈవెంట్‌లో హర్విందర్‌ సింగ్‌, విజయ్‌ సుండి జోడీ చైనాను 5-1తో ఓడించి స్వర్ణం గెలుచుకుంది. మహిళల రికర్వ్‌ విభాగంలో భారత జోడీ రజతం సాధించింది. ఈసారి పారా అథ్లెటిక్స్‌లో భారత్‌ మొత్తం 65 పతకాలు సాధించడం విశేషం.