బతుకమ్మ, బోనాలు వంటి పండుగలు తెలంగాణ గొప్ప సాంస్కృతిక వారసత్వాన్ని, సామాజిక స్ఫూర్తిని ప్రతిబింబిస్తాయని, అయితే ‘అలయ్ బలయ్’ ఈ సంప్రదాయాలను జరుపుకోవడానికి, భిన్నత్వంలో ఏకత్వాన్ని బలోపేతం చేయడానికి ఒక వేదికను అందిస్తుందని తెలంగాణ గవర్నర్ శివ్ ప్రతాప్ శుక్లా కొనియాడారు.
హైదరాబాద్‌లోని నాంపల్లి ఎగ్జిబిషన్ గ్రౌండ్స్‌లో మాజీ గవర్నర్ బండారు దత్తాత్రేయ నేతృత్వంలో గత పలు సంవత్సరాలుగా దసరా పండుగ సందర్భంగా నిర్వహిస్తున్న ‘అలయ్ బలయ్’ కార్యక్రమంలో ముఖ్యఅతిధిగా పాల్గొంటూ ఈ కార్యక్రమం రాజకీయ విభేదాలకు అతీతంగా ప్రజలను ఏకతాటిపైకి తీసుకువచ్చే సామాజిక సామరస్యానికి, తెలంగాణ గొప్ప సాంస్కృతిక వారసత్వానికి ప్రతీక అని పేర్కొన్నారు.
“భావజాల భేదాలు పరస్పర గౌరవం, స్నేహం, సహకారాన్ని దెబ్బతీయకూడదు,” అని ఆయన హితవు చెప్పారు. ‘అలయ్ బలయ్’అంటే స్నేహానికి, సద్భావనకు చిహ్నంగా ప్రజలు ఒకరినొకరు ఆలింగనం చేసుకోవడం. దీనిని 2005 నుండి హర్యానా మాజీ గవర్నర్, బీజేపీ నాయకుడు బండారు దత్తాత్రేయ, ఆయన కుమార్తె విజయలక్ష్మి నిర్వహిస్తున్నారు.
బండారు దత్తాత్రేయ కుమార్తె విజయలక్ష్మీ ఆధ్వర్యంలో నాంపల్లి ఎగ్జిబిషన్ మైదానంలో ఉదయం 11 గంటలకు శమీ పూజతో అలయ్ బలయ్ ప్రారంభం కాగా అంతకు ముందు తెలంగాణ సంస్కృతి సంప్రదాయాలైన ఆత్మీయుల అలయ్ బలయ్ ఆలింగనాలు, షడ్రుచుల సమ్మేళనం, ఒగ్గుడోలు తాళాల మోత, జొన్నకర్రల జోరు, జమిడిక వాద్యాల హోరు, ఆడబిడ్డల కోలాటాలు, బతుకమ్మ, బోనాలు, గొబ్బెమ్మలు, గౌరమ్మలు, భజన కీర్తనలు, ఢమరుక నాదాలు, డప్పు విన్యాసాలు, చిందు యక్షగానాలు, ఒగ్గు కథలు, సన్నాయి వాద్యాలు ఆలయ్‌ బలయ్‌లో ప్రత్యేక ఆకర్షణగా నిలిచాయి.
పెరుగుతున్న మాదకద్రవ్యాల ముప్పును ప్రస్తావిస్తూ, సింథటిక్ డ్రగ్స్ ముఖ్యంగా యువతకు తీవ్రమైన ముప్పును కలిగిస్తున్నాయని గవర్నర్ హెచ్చరించారు. 2029 నాటికి మాదకద్రవ్య రహిత భారతదేశ లక్ష్యాన్ని సాధించేందుకు ప్రభుత్వాలు, విద్యాసంస్థలు, పౌరులు సమిష్టిగా కృషి చేయాలని ఆయన కోరారు. మాదకద్రవ్యాల దుర్వినియోగం నుండి యువతను కాపాడాల్సిన ఆవశ్యకతను ఆయన నొక్కి చెప్పారు.
సాంస్కృతిక సంప్రదాయాలను గౌరవించాలని, దేశ నిర్మాణానికి దోహదపడాలని శుక్లా యువతను కోరారు. దేశ ప్రగతికి సాంఘిక సామరస్యం, జాతీయ సమైక్యత ఎంతో అవసరమని ఆయన తెలిపారు. ఇదిలా ఉండగా, ‘అలయ్ బలయ్’ కేవలం ఒక పండుగ మాత్రమే కాదని, హృదయాలను ఏకం చేసే ఒక ఆత్మీయ వేదిక అని మాజీ ఉపరాష్ట్రపతి ఎం. వెంకయ్య నాయుడు తెలిపారు. “ఇది కుల, మత, రాజకీయాలకు అతీతంగా ప్రేమ, స్నేహం, సోదరభావాన్ని ప్రోత్సహించే గొప్ప సంప్రదాయం. ఇది ‘వసుధైవ కుటుంబకం’ (ప్రపంచం ఒకే కుటుంబం) అనే భారతీయ సాంస్కృతిక తత్వాన్ని ప్రతిబింబిస్తుంది,” అని ఆయన ప్రశంసించారు.
సాంకేతికత ద్వారా ప్రపంచం మరింత అనుసంధానం అవుతున్నప్పటికీ, మన చుట్టూ ఉన్న ప్రజలకు మనం దూరం కాకూడదని నాయుడు చెప్పారు. జీవితంలో సమాచారం ఎంత అవసరమో, భావోద్వేగ బంధాలు, వ్యక్తిగత సంబంధాలు కూడా అంతే ముఖ్యమని ఆయన జోడించారు. కష్ట సమయాల్లో ఒకరికొకరు అండగా నిలవడమే మానవత్వపు నిజమైన సారం అని కూడా ఆయన నొక్కి చెప్పారు.
“ఆధునికతను స్వీకరిస్తున్నప్పుడు, మనం మన మూలాలను మరచిపోకూడదు. మన భాషను ప్రేమించాలి, మన సంస్కృతిని గౌరవించాలి, మహిళలను గౌరవించాలి, యువతకు అవకాశాలు కల్పించాలి, వృద్ధులను ఆదరించాలి మరియు సమాజంలోని బలహీన వర్గాలకు అండగా నిలవాలి,” అని నాయుడు తెలిపారు. భిన్నత్వంలో ఏకత్వాన్ని నిలబెట్టడం ద్వారా భారతదేశం ప్రపంచానికి ఆదర్శంగా నిలవాలనే సందేశాన్ని ఆలై బలై కార్యక్రమం అందిస్తుందని ఆయన పేర్కొన్నారు.
పండుగలు, సాంస్కృతిక కార్యక్రమాలు ప్రజల మధ్య ఐక్యతను పెంపొందించడంతో పాటు మన సంప్రదాయాల గొప్పతనాన్ని చాటిచెప్పాలని తెలిపారు. పరస్పర కలహాలకు దూరంగా ఉంటూ ప్రేమ, ఆప్యాయత, మానవత్వంతో ముందుకు సాగినప్పుడే అభివృద్ధి చెందిన భారతదేశ నిర్మాణం సాధ్యమవుతుందని వెంకయ్య నాయుడు అభిప్రాయపడ్డారు.
పంజాబ్ ప్రజల తరపున, తన తరుపున దత్తాత్రేయకు అభినందనలు తెలుపుతున్నట్లు పంజాబ్ గవర్నర్ గులాబ్ చంద్ కటారియా తెలిపారు. 2005 నుంచి అలయ్ బలయ్ను విజయవంతంగా నిర్వహిస్తున్నారని కొనియాడారు. కుల, మత ప్రాంతాలకు అతీతంగా ఈ కార్యక్రమం నిర్వహించడం మామూలు విషయం కాదన్నారు. ‘నషా ముక్తి భారత్’ అనేది మన ముందున్న లక్ష్యమన్నారు. పంజాబ్లో అది తన బాధ్యత అని చెప్పారు. దసరా వచ్చిందంటే మనకు గుర్తుకు వచ్చేది అలయ్ బలయ్ అని కేంద్ర మంత్రి కిషన్ రెడ్డి తెలిపారు.
“ప్రధాని మోదీ ఆలోచనకు అనుగుణంగా వికసిత్ భారత్‌లో మనందరి లక్ష్యం కావాలి. నషా ముక్త్‌ భారత్, వికసిత్ భారత్ మనందరి లక్ష్యం. అలయ్ బలయ్ అనేది కులమతాలకు రాజకీయాలకు ప్రాంతాలకు అతీతమైన వేదిక” అని దత్తాత్రేయ తెలిపారు. కుల, మత, ప్రాంతాలకు అతీతంగా ఐక్యంగా అలయ్ బలయ్ జరుపుకుంటున్నామని మాజీమంత్రి జానారెడ్డి తెలిపారు. రాజకీయ వేదిక కాదు.. సిద్ధాంతాల వేదిక కాదు.. మానవత్వాన్ని పెంచే వేదిక అలయ్ బలయ్ అని సీపీఐ రాష్ట్ర కార్యదర్శి, ఎమ్మెల్యే కూనంనేని సాంబశివరావు తెలిపారు.
More Stories
కాశ్మీర్‌లో బిఎంఎస్ మొదటి కార్యాలయం పుల్వామాలో పారంభం
హైదరాబాద్‌ సమీపంలో ఆది మానవుల ఆనవాళ్లు
మినరల్స్ లో సహకారం బలోపేతానికి కిషన్ రెడ్డి ఆస్ట్రేలియా పర్యటన