ఇండియా బ్లాక్ జనపథ్ విందుకు సమాజ్‌వాదీ పార్టీ గైరాజర్!

కాంగ్రెస్ అధ్యక్షుడు మల్లికార్జున్ ఖర్గే జనపథ్‌లోని సాగర్ రత్నలో బుధవారం మధ్యాహ్నం ఏర్పాటు చేసిన భోజన కార్యక్రమానికి ప్రతిపక్ష ఎంపీలు హాజరైనప్పటికీ, అక్కడ సమాజ్‌వాదీ పార్టీ ఎంపీలు కనిపించలేదు. సమాజ్‌వాదీ పార్టీ అధినేత అఖిలేష్ యాదవ్, ఇతర పార్టీ ఎంపీలు హాజరు కాకపోవడం స్పష్టంగా కనిపించింది. మంగళవారం ఎన్నికల సంఘం వ,రకు ఇండియా బ్లాక్ నిర్వహించిన భారీ పాదయాత్రలో యాదవ్, ఇతరులు పాల్గొన్నారు.

కానౌజ్ ఎంపీ అయిన యాదవ్‌ను అదుపులోకి తీసుకుని, ఆ తర్వాత విడుదల చేశారు. బుధవారం నాటి భోజన సమావేశం, ఆ తర్వాత జంతర్ మంతర్ వైపు సాగిన ప్రయాణం, ప్రభుత్వంపై ఒత్తిడిని కొనసాగించడానికి, అలాగే ఓటర్ల జాబితాల ప్రత్యేక విస్తృత సవరణకు సంబంధించిన సమస్యలపై ప్రధాన ఎన్నికల కమిషనర్ జ్ఞానేశ్ కుమార్ రాజీనామా కోసం తమ ప్రచారాన్ని మరింత ఉధృతం చేయడానికి ప్రతిపక్షం అనుసరించిన వ్యూహంగా కనిపించింది.

సమాజ్‌వాదీ పార్టీ ఎంపీలు హాజరుకాకపోవడాన్ని కాంగ్రెస్ తక్కువ చేసి చూపింది. అఖిలేష్ యాదవ్ నేతృత్వంలోని పార్టీకి చెందిన చాలా మంది ఎంపీలు మంగళవారం రాత్రి లేదా బుధవారం ఉదయం ఢిల్లీ నుండి బయలుదేరి వెళ్లడంతో, వారు భోజనానికి, అనంతరం జరిగిన నిరసనలో పాల్గొనలేకపోయారని వారు చెప్పారు. ఇండియా కుంటిమి ఉమ్మడి నిరసన కేవలం ‘అన్నాచెల్లెలి’ సొంత ప్రదర్శనగా మారిపోయిందని కొందరు మిత్రపక్షాల నాయకులు భావిస్తున్నట్లు ఈ సందర్భంగా తెలుస్తున్నది. వాస్తవానికి, ఇతర ఇండియా బ్లాక్ పార్టీలు చాలా వరకు హాజరైన ఆ భోజన కార్యక్రమంలో కూడా ఈ విషయం ప్రస్తావనకు వచ్చింది.

ఈ సమావేశాన్ని సమన్వయం చేసిన కాంగ్రెస్ జనరల్ సెక్రటరీ (ఆర్గనైజేషన్) కేసీ వేణుగోపాల్, సాగర్ రత్నలో ఇండియా బ్లాక్ నాయకులతో మాట్లాడుతూ, తాజా నిరసన ప్రణాళిక కోసం పిలిచే సమయానికే సమాజ్‌వాదీ పార్టీ ఎంపీలు ఢిల్లీ నుండి వెళ్లిపోయారని చెప్పారు. అయితే, కాంగ్రెస్ ఏకపక్ష ధోరణుల కారణంగానే వారు గైరాజరు అయిన్నట్లు తెలుస్తున్నది. ఇండియా కూటమి నిరసనను రాహుల్ గాంధీ, ప్రియాంక గాంధీ నిరసనగా చూపే ప్రయత్నాలపట్ల ఆ పార్టీ నేతలు అసహనం వ్యక్తం చేస్తున్నారు.

“కాంగ్రెస్ వైపు నుండి సరైన సమన్వయం లేకపోవడం వల్ల సమాజ్‌వాదీ పార్టీ వారు ఏర్పాటు చేసిన మధ్యాహ్న భోజనానికి హాజరు కాలేదు” అని ఒక సమాజ్‌వాదీ పార్టీ ఎంపీ ఒకరు స్పష్టం చేశారు. ప్రధాన ఎన్నికల కమిషనర్‌కు వ్యతిరేకంగా జరిగిన నిరసన ముగిసిన తర్వాత, మంగళవారం సాయంత్రం సమాజ్‌వాదీ పార్టీ ఎంపీలు తమ నియోజకవర్గాలకు బయలుదేరారు. అప్పటికి, మధ్యాహ్న భోజనం గురించి ఎలాంటి సమాచారం లేదు.

“ఒకవేళ కాంగ్రెస్ పార్టీ ఈ మధ్యాహ్న భోజన కార్యక్రమం గురించి పార్టీ అధ్యక్షుడు అఖిలేష్ యాదవ్‌కు గానీ, సీనియర్ నాయకుడు రామ్ గోపాల్ యాదవ్‌కు గానీ సరిగ్గా తెలియజేసి ఉంటే, ఢిల్లీ సమీపంలోని నియోజకవర్గాల ఎంపీలను గానీ, లేదా ఇంకా ఢిల్లీలోనే ఉన్న వారిని గానీ ఈ భోజనంలో పాల్గొనమని కోరి ఉండేవారు” అని ఆయన పేర్కొన్నారు.

“నాకు కాంగ్రెస్ నుండి ఎలాంటి ఆహ్వాన ఫోన్ కాల్ రాలేదు, లేదా ఈ విషయంలో సమాజ్‌వాదీ పార్టీ నాయకత్వం నుండి ఎలాంటి ఆదేశాలు అందలేదు” అని ఒక సమాజ్‌వాదీ పార్టీ ప్రతినిధి ఒకరు చెప్పారు. అఖిలేష్ యాదవ్ మంగళవారం రాత్రి లక్నోకు తిరిగి వచ్చారని సమాజ్‌వాదీ పార్టీ అధికార ప్రతినిధి రాజేంద్ర చౌదరి తెలిపారు.

“సమాజ్‌వాదీ పార్టీకి ఆహ్వానం ఆలస్యంగా అంది ఉండవచ్చు. దీని గురించి నాకు పెద్దగా తెలియదు. కానీ ఈరోజు భోజనానికి గైర్హాజరవడానికి ప్రత్యేక కారణం ఏమీ లేదు” అని చెప్పారు. మంగళవారం ఆకాశవాణి భవన్‌లో ధర్నా చేసి, ఇండియా బ్లాక్ మార్చ్‌లో కాంగ్రెస్ నాయకులు రాహుల్ గాంధీ, ప్రియాంక గాంధీ వాద్రా అందరి దృష్టిని ఆకర్షించడంపై కూడా పార్టీ నాయకత్వం, ఎంపీలు అసంతృప్తిగా ఉన్నారని సమాజ్‌వాదీ పార్టీ వర్గాలు తెలిపాయి.

“కానీ ఈరోజు భోజనానికి గైర్హాజరవడానికి అది కారణం కాదు,” అని ఒక పార్టీ ఎంపీ పేర్కొన్నారు. “ఆకాశవాణి భవన్ వద్ద నిరసన విషయంలో కాంగ్రెస్ సమన్వయం లోపించడం పట్ల మేము సంతోషంగా లేమన్నది నిజమే. అది ఇండియా బ్లాక్ ఉమ్మడి నిరసనగా జరగాల్సింది, గాంధీలదిగా కాదు” అని స్పష్టం చేశారు.

మరోవంక, దేశంలో తదుపరి పెద్ద ఎన్నిక ఉత్తర ప్రదేశ్‌లో జరగనుంది. అక్కడ కాంగ్రెస్ కంటే సమాజ్‌వాదీ పార్టీకే ఎక్కువ పట్టు ఉంది. ఈ ఏడాది ఆరంభంలో యూపీలో ఎస్ఐఆర్ సమయంలో కాంగ్రెస్ నాయకత్వం కేవలం ప్రతీకాత్మక చర్యలు మాత్రమే తీసుకోగా, అఖిలేష్ యాదవ్ ఉత్తర ప్రదేశ్‌లో ఎస్ఐఆర్ పై ఆందోళనలను మరింత దూకుడుగా, ప్రభావవంతంగా లేవనెత్తారు.

“కానీ ఢిల్లీలోని కాంగ్రెస్, ‘సార్’ విషయంలో తాము మాత్రమే సీరియస్‌గా ఉన్నామని చిత్రీకరించడానికి ప్రయత్నించింది,” అని ఒక పార్టీ నాయకుడు చెప్పారు. ఎన్నికల సంఘానికి వ్యతిరేకంగా ‘ఇండియా బ్లాక్’ సాగిస్తున్న దాడికి సంబంధించిన పరిణామాలు ఒక కీలకమైన నేపథ్యంలో చోటుచేసుకుంటున్నాయి: అదే ఉత్తర ప్రదేశ్ ఎన్నికలు. రాజకీయంగా అత్యంత ప్రాముఖ్యత కలిగిన ఈ రాష్ట్రంలో, సమాజ్‌వాదీ పార్టీ, కాంగ్రెస్ మిత్రపక్షాలుగా ఉన్నాయి. ఎన్నికలు సమీపిస్తుండటంతో, సీట్ల పంపిణీపై పోరు మొదలైంది.

ఉత్తర ప్రదేశ్‌లోని మొత్తం 403 సీట్లకు గాను, కాంగ్రెస్ సుమారు 150-200 సీట్లు కావాలని డిమాండ్ చేస్తుండటం సమాజ్‌వాదీ పార్టీ నాయకులకు ఆగ్రహం తెప్పిస్తోంది. అంతేకాకుండా, ఇమ్రాన్ మసూద్‌తో సహా కొంతమంది కాంగ్రెస్ నాయకులు చేసిన బహిరంగ ప్రకటనల పట్ల కూడా సమాజ్‌వాదీ పార్టీ అసంతృప్తిగా ఉంది. గత వారం మసూద్ యూపీ కాంగ్రెస్ వర్కింగ్ ప్రెసిడెంట్‌గా నియమితులయ్యారు. ఈ చర్య సమాజ్‌వాదీ పార్టీ నాయకత్వానికి నచ్చలేదని సమాచారం.