ముంబైలో సిపిజెకు పోటీగా ‘జెన్ నెక్స్ట్ ముంబై’ నిరసనలు

ముంబైలో, ప్రధాన ఎన్నికల కమిషనర్ జ్ఞానేష్ కుమార్‌కు వ్యతిరేకంగా ‘కాక్‌రోచ్ జనతా పార్టీ’ (సిజెపి) చేపట్టిన ఆందోళనకు పోటీగా ‘జెన్ నెక్స్ట్ ముంబై’ సభ్యులుగా చెప్పుకునే ఒక బృందం ఎదురు నిరసన చేపట్టింది. అభిజీత్ దిప్కే వంటి వ్యక్తులు రాజ్యాంగాన్ని నిర్వీర్యం చేయడం గురించి మాట్లాడుతున్నారని ఆరోపించిన ఒక నిరసనకారుడు, రాజ్యాంగాన్ని గౌరవించడానికి, రక్షించడానికి తాము శాంతియుత నిరసన కోసం ఇక్కడ సమావేశమయ్యామని పేర్కొన్నారు.

“అభిజీత్ దిప్కే వంటి వారు రాజ్యాంగాన్ని నిర్వీర్యం చేయడం గురించి మాట్లాడుతుంటారు. కానీ ఈ రోజు, మేము బాబాసాహెబ్ అంబేద్కర్ విగ్రహం వద్ద నిలబడి ఉన్నాము. ఎందుకంటే రాజ్యాంగాన్ని ఎలా రక్షించాలో, గౌరవించాలో మాకు తెలుసు. అందుకే మేము శాంతియుత నిరసన కోసం ఇక్కడ సమావేశమయ్యాము; కాక్‌రోచ్ జనతా పార్టీ ప్రవర్తనను సహించబోము,” అని ఆ నిరసనకారుడు స్పష్టం చేశారు.

మరోవైపు, ఎన్నికల కమిషన్‌కు వ్యతిరేకంగా, ‘స్పెషల్ ఇంటెన్సివ్ రివిజన్’ (ఎస్ఐఆర్) ప్రక్రియలో జరిగినట్లు ఆరోపిస్తున్న అక్రమాలకు నిరసనగా, సిజెపి, ఇతర పౌర సమాజ సంస్థల కార్యకర్తలు శుక్రవారం ముంబైలోని శివాజీ పార్క్ వద్ద నిరసన చేపట్టారు. నిరసన పిలుపు నేపథ్యంలో ముంబైలోని శివాజీ పార్క్ వద్ద భారీగా పోలీసు బలగాలను మోహరించారు.

ఢిల్లీలో, ప్రతిపాదిత నిరసనకు పోలీసులు అనుమతి నిరాకరించడంతో పాటు ‘భారతీయ నాగరిక్ సురక్షా సంహిత’ (బిఎన్ఎస్ఎస్) 2023లోని సెక్షన్ 163 కింద నిషేధాజ్ఞలు విధించడంతో మధ్య ఢిల్లీలో భద్రతను కట్టుదిట్టం చేశారు. ప్రధాన ఎన్నికల కమిషనర్ జ్ఞానేష్ కుమార్ ఒక “దేశద్రోహి” అని, ఆయనే “అసలైన దేశ వ్యతిరేకి” అని సిజెపి ప్రతినిధి సౌరవ్ దాస్ ఆరోపించారు.

ముంబైలో జరుగుతున్న ఈ నిరసనకు దేశవ్యాప్తంగా ప్రజల మద్దతు లభిస్తుందని ఆయన పేర్కొన్నారు. “గతంలో ధర్మేంద్ర ప్రధాన్ రాజీనామా కోసం దేశవ్యాప్తంగా యువత, యువ తరమంతా బయటకు వచ్చారు. ఇప్పుడు దేశద్రోహి అయిన జ్ఞానేష్ కుమార్ విషయంలోనూ అదే జరగబోతోంది. ముంబై యువత మళ్లీ వీధుల్లోకి వస్తున్నారు. ఈ రోజు శివాజీ పార్క్ వద్ద భారీ నిరసన జరగబోతోంది,” అని దాస్ తెలిపారు.

ముంబైలో సిజెపి చేపట్టిన నిరసనపై స్పందిస్తూ, ఎన్నికల కమిషన్‌పై వస్తున్న ఆరోపణలకు అప్పటికే సమాధానం ఇవ్వడం జరిగిందని మహారాష్ట్ర ముఖ్యమంత్రి దేవేంద్ర ఫడ్నవీస్ గుర్తు చేశారు. “ఈ వ్యవహారం మొత్తం బయటపడింది. ముగ్గురు ఎన్నికల కమిషనర్లు నిర్వహించిన విలేకరుల సమావేశం తర్వాత, వారు సృష్టించిన తప్పుడు కథనం బట్టబయలైంది. అయినప్పటికీ, ఆ తప్పుడు కథనాన్ని ప్రచారం చేసే ప్రయత్నాలు ఇంకా జరుగుతూనే ఉన్నాయి. ఇందులో వారు విజయం సాధించలేరు,” అని ఫడ్నవీస్ ధ్వజమెత్తారు.