దేశవ్యాప్త జాతీయ పౌర రిజిస్టర్ కోసం ఆర్‌ఎస్‌ఎస్ పిలుపు

ఓటర్ల జాబితాల ప్రత్యేక సమగ్ర సవరణ (ఎస్ఐఆర్), జనాభా గణన ప్రక్రియలు జరుగుతున్న తరుణంలో, దేశవ్యాప్తంగా ‘జాతీయ పౌర రిజిస్టర్’ (ఎన్‌ఆర్‌సి)ను అమలు చేయాలని ఆర్‌ఎస్‌ఎస్ పిలుపునిచ్చింది. “జనాభా అసమతుల్యత” సమస్యను పరిష్కరించడానికి, దేశ “ఐక్యత, సమగ్రత, భద్రత”ను కాపాడటానికి పౌరులను గుర్తించడం అవసరమని ఆ సంస్థ పేర్కొంది.

ఇందిరా గాంధీ నేషనల్ సెంటర్ ఫర్ ది ఆర్ట్స్ లో జరిగిన ఒక కార్యక్రమంలో ఆర్‌ఎస్‌ఎస్ ప్రచార ప్రముఖ్ సునీల్ అంబేకర్ మాట్లాడుతూ, ఓటర్ల జాబితాలో “తప్పుగా చేర్చిన” వారిని గుర్తించడం, అలాగే పౌరసత్వ సవరణ చట్టం (సిఏఏ) కింద పొరుగు దేశాల నుండి భారత్‌కు వచ్చిన వారికి పౌరసత్వం కల్పించడం అవసరమని తెలిపారు. “జనాభా అసమతుల్యతకు పరిష్కారాల గురించి చర్చించినప్పుడు, జాతీయ పౌర రిజిస్టర్ (ఎన్‌ఆర్‌సి) ఉండాలనే అంశం ప్రస్తావనకు వస్తుంది,” అని పేర్కొన్న అంబేకర్, గతంలో జనాభా అసమతుల్యత కారణంగానే భారతదేశ విభజన జరిగిందని గుర్తుచేశారు.

1947 తర్వాత ఇస్లామిక్ దేశాలుగా మారిన మన పొరుగు దేశాలలో, అక్కడే ఉండిపోయిన వారిలో చాలామంది ఎస్సీ/ఎస్టీ, ఆర్థికంగా వెనుకబడిన వర్గాలకు చెందినవారని, వారు నిరంతరం వేధింపులకు గురవుతున్నారని ఆయన తెలిపారు. “తిరిగి వచ్చిన వారికి సిఏఏ ద్వారా పౌరసత్వం కల్పించడం అవసరం. అటువంటి వారిని ఎన్‌ఆర్‌సి ద్వారా గుర్తించడం కూడా అవసరం. అలాగే, ఓటర్ల జాబితాలో ఎవరైనా తప్పుగా చేర్చబడి ఉంటే, వారిని గుర్తించాల్సిన బాధ్యత ఉంది,” అని ఆయన స్పష్టం చేశారు.

ఈ ప్రక్రియపై వచ్చే అభ్యంతరాలను న్యాయస్థానాలతో సహా ప్రస్తుతం అందుబాటులో ఉన్న చట్టపరమైన విధానాల ద్వారా పరిష్కరించవచ్చని అంబేకర్ చెప్పారు. అయితే, “కేవలం రాజకీయ కారణాల కోసం” పౌరులు కాని వారిని పౌరులుగా అంగీకరించడం తప్పు అని ఆయన స్పష్టం చేశారు. జనాభా కూర్పులో మార్పులను జాతీయ భద్రత, సాంస్కృతిక అంశంగా కూడా ఆర్‌ఎస్‌ఎస్ నేత అభివర్ణించారు.

భారతదేశంలో జనాభా కూర్పు మార్పులకు సుదీర్ఘ చరిత్ర ఉందని, అవి ముస్లిం దాడులతోనే ప్రారంభమయ్యాయని ఆయన తెలిపారు. భారతదేశానికి జనాభా సమతుల్యత చాలా ముఖ్యమని ఆయన పేర్కొన్నారు. ఎందుకంటే 1947లో మతం, జనాభా ప్రాతిపదికన దేశ విభజన జరిగింది. “ప్రతి దేశానికి ఒక గుర్తింపు ఉంటుంది. దేశ సంస్కృతిని తమ సొంత సంస్కృతిగా భావించే ప్రజల జనాభా సమతుల్యంగా ఉన్నప్పుడు, ఆ దేశ సాంస్కృతిక గుర్తింపు కాపాడబడుతుంది,” అని ఆయన పేర్కొన్నారు.

అలాగే భారతదేశ సంస్కృతిని కాపాడటాన్ని మతపరమైన చర్యగా పరిగణించలేమని అంబేకర్ తెలిపారు. స్వాతంత్ర్యం వచ్చిన తర్వాత జనాభా, జనాభా గణనపై ఒక “ఖచ్చితమైన విధానాన్ని” రూపొందించకపోవడం పట్ల కూడా అంబేకర్ వరుస ప్రభుత్వాలను విమర్శించారు. ముఖ్యంగా అత్యవసర పరిస్థితి (ఎమర్జెన్సీ)కి ముందు జనాభా నియంత్రణను భారతదేశ సమస్యలకు పరిష్కారంగా చూపినప్పటికీ, అటల్ బిహారీ వాజ్‌పేయి ప్రభుత్వ హయాంలో 2000 సంవత్సరంలో ‘జాతీయ జనాభా కమిషన్’ ఏర్పాటు చేసే వరకు సమగ్ర జనాభా విధానం రూపొందించలేదని ఆయన తెలిపారు.

స్వాతంత్ర్యం తర్వాత ఉన్న చట్టపరమైన విధానాల్లోని వ్యత్యాసాలకు, తాను పేర్కొన్న జనాభా అసమతుల్యతకు మధ్య ఉన్న సంబంధాన్ని కూడా ఆయన ప్రస్తావించారు. వివాహానికి సంబంధించి ఏకరీతి చట్టం లేకపోవడం, విద్యాసంస్థలకు సంబంధించిన ఆర్టికల్స్ 29, 30ల వివరణ, స్థానిక సంస్థల ఎన్నికలకు వర్తించే జనాభా నియంత్రణ నిబంధనలు వంటి అంశాలను ప్రస్తావిస్తూ, లౌకికవాదం పేరుతో రూపొందించిన విధానాలు అసమానతలకు దారితీశాయని ఆయన తెలిపారు.

“కొంతమందికి నలుగురు భార్యలను కలిగి ఉండే వెసులుబాటు కల్పించారు. స్వాతంత్ర్యానికి ముందు అటువంటి చట్టం లేదు. కానీ హిందువులకు మాత్రం ఒకటి కంటే ఎక్కువ వివాహాలు చేసుకుంటే శిక్షార్హమని చెప్పారు. చట్టం అందరికీ సమానంగా ఉండాలి,” అని అంబేకర్ స్పష్టం చేశారు. అక్రమ వలసల నిర్వహణ తీరును కూడా అంబేకర్ విమర్శించారు. ఈ క్రమంలో ఆయన ‘అక్రమ వలసదారుల (ట్రిబ్యునల్స్ ద్వారా గుర్తింపు) చట్టం, 1983’ గురించి ప్రస్తావించారు.

దీనికి వ్యతిరేకంగా అస్సాంలో సుదీర్ఘ ఉద్యమం జరిగిన తర్వాత సుప్రీంకోర్టు దీనిని కొట్టివేసింది. అక్రమ వలసలను విస్మరించడం అనేది లౌకికవాద భావనతో రూపొందించిన విధానంలో ఒక భాగమని ఆయన ఆరోపించారు. దేశవ్యాప్తంగా ఎన్‌ఆర్‌సిని అమలు చేయాలని ఆర్‌ఎస్‌ఎస్చాలా కాలంగా వాదిస్తూ వస్తోంది. 2019లో, అప్పటి ఆర్‌ఎస్‌ఎస్ సర్ కార్యవాహ సురేష్ భయ్యాజీ జోషి మాట్లాడుతూ, భారతీయ పౌరులు కాని వారిని గుర్తించడానికి ఎన్‌ఆర్‌సిని సిద్ధం చేయడం ప్రభుత్వ బాధ్యత అని పేర్కొన్నారు.

ఆర్‌ఎస్‌ఎస్ సర్ సంఘచాలక్ డా. మోహన్ భగవత్ ఆ తర్వాత 2021లో మాట్లాడుతూ, ఎన్‌ఆర్‌సి ఉద్దేశ్యం నిజమైన పౌరులు ఎవరో నిర్ధారించడమేనని, దీనిని హిందూ-ముస్లిం సమస్యగా చూడకూడదని సూచించారు. 2019-20లో సిఏఏ, ప్రతిపాదిత ఎన్‌ఆర్‌సికి వ్యతిరేకంగా దేశవ్యాప్తంగా జరిగిన నిరసనల తర్వాత ఈ అంశం రాజకీయ ఎజెండా నుండి చాలా వరకు మరుగున పడింది.

ప్రస్తుత జనాభా గణన ప్రశ్నాపత్రంలో జాతీయత, తల్లిదండ్రుల వివరాలు, ఆధార్, ఓటర్ ఐడితో సహా 2020 ఎన్‌పిఆర్ షెడ్యూల్‌లో భాగంగా ఉన్న అనేక ప్రశ్నలు ఉన్నాయి. పౌరసత్వం సందేహాస్పదంగా పరిగణించే కేసులను గుర్తించడంతో సహా, భారత పౌరుల జాతీయ రిజిస్టర్ తయారీ కోసం జనాభా రిజిస్టర్‌ను ధృవీకరించడానికి చట్టబద్ధమైన ఫ్రేమ్‌వర్క్ వీలు కల్పిస్తుంది.