యూపీఐ లావాదేవీలపై ఎండీఆర్‌ విధింపుపై స్టేకు సుప్రీం నిరాకరణ

రూ. 2,000 దాటిన యూపీఐ చెల్లింపులపై ఎం.డి.ఆర్ (మర్చంట్ డిస్కౌంట్ రేట్) విధించాలన్న కేంద్రం నిర్ణయంపై స్టే ఇవ్వడానికి సుప్రీంకోర్టు సోమవారం నిరాకరించింది. అయితే, రూ. 2,000 దాటిన వాణిజ్య యూపీఐ వ్యక్తి-నుండి-వ్యాపారి లావాదేవీలపై ఛార్జీలను ప్రకటించిన గెజిట్ నోటిఫికేషన్లను సవాలు చేస్తూ దాఖలైన పిటిషన్‌పై కేంద్రానికి, రిజర్వ్ బ్యాంక్ ఆఫ్ ఇండియా (ఆర్‌బిఐ), నేషనల్ పేమెంట్స్ కార్పొరేషన్ ఆఫ్ ఇండియా (ఎన్‌పిసిఐ), యూపీఐ స్టీరింగ్ కమిటీకి అత్యున్నత న్యాయస్థానం నోటీసులు జారీ చేసింది.

“ఇది చట్టపరమైన సమస్య కన్నా ఎక్కువగా సాంకేతిక సమస్య,” అని భారత ప్రధాన న్యాయమూర్తి సూర్యకాంత్, జస్టిస్‌లు జయమల్య బాగ్చి, వి. మోహనలతో కూడిన ధర్మాసనం వ్యాఖ్యానించింది. కేంద్రం తరఫున హాజరైన అదనపు సొలిసిటర్ జనరల్ ఎన్. వెంకటరామన్, గేట్‌వేను ఉపయోగించే వారిలో 96 శాతం మందికి మినహాయింపు ఉందని ధర్మాసనానికి తెలిపారు.

న్యాయవాది అంజన్ దత్తా దాఖలు చేసిన ప్రజా ప్రయోజన వ్యాజ్యం (పిఐఎల్), కేంద్రం సెప్టెంబర్ 14 నోటిఫికేషన్‌ను, సెప్టెంబర్ 15న ప్రకటించిన ఎం.డి.ఆర్ ఫ్రేమ్‌వర్క్‌ను సవాలు చేసింది. తగిన చట్టబద్ధమైన రక్షణలు, పారదర్శకత లేదా ప్రజా సంప్రదింపులు లేకుండా ఈ సుంకాన్ని ప్రవేశపెట్టారని పిటిషన్‌లో ఆరోపించారు.

“సరిగ్గా అధికారం పొంది, ధృవీకరించి, ప్రచురించిన చట్టబద్ధమైన పత్రం లేకుండా, కేవలం ఒక పత్రికా ప్రకటన లేదా తరచుగా అడిగే ప్రశ్నల ఆధారగా ఎటువంటి ఎం.డి.ఆర్ లేదా దానికి సమానమైన తప్పనిసరి ఛార్జీని విధించరాదని లేదా వసూలు చేయరాదని ప్రకటించాలి,” అని అందులో పేర్కొన్నారు. పిటిషనర్, యూపీఐ లావాదేవీలకు, రూపే డెబిట్ కార్డ్ చెల్లింపులకు మధ్య ఉన్న వ్యత్యాసాన్ని కూడా ప్రశ్నించారు.

ఈ నోటిఫికేషన్, ఎలాంటి ద్రవ్య పరిమితి లేకుండా రూపే డెబిట్ కార్డులకు ఛార్జీ రహిత రక్షణను కొనసాగిస్తోందని ఆయన ఎత్తి చూపారు. చిన్న వ్యాపారులపై అదనపు భారం పడే అవకాశం ఉందని పేర్కొన్నారు. భవిష్యత్తులో ఎండీఆర్‌ నిర్ణయించేటప్పుడు వ్యాపారి టర్నోవర్‌, ఎంఎస్‌ఎంఈ స్థాయి, లాభాల మార్జిన్‌ వంటి అంశాలను పరిగణనలోకి తీసుకోవాలని కోరారు.

సుప్రీంకోర్టు నోటీసు జారీ చేసి, నాలుగు వారాల్లోగా తమ కౌంటర్ అఫిడవిట్‌లను దాఖలు చేయాలని ప్రతివాదులను ఆదేశించిన తర్వాత, పిటిషనర్ తరఫు న్యాయవాది, “దయచేసి అప్పటి వరకు దీనిని నిలిపివేయండి” అని ధర్మాసనాన్ని అభ్యర్థించారు. ధర్మాసనం ఎలాంటి మధ్యంతర స్టే ఇవ్వడానికి నిరాకరించింది. ఇక పర్సన్‌-టు-పర్సన్‌ లావాదేవీలకు మాత్రం ఎలాంటి ఛార్జీ ఉండదు. ఇవి యూపీఐ లావాదేవీల పరిమాణంలో 37 శాతం, మొత్తం విలువలో 70 శాతం వాటా కలిగి ఉన్నాయని ప్రభుత్వం తెలిపింది. ప్రస్తుతం సుప్రీంకోర్టు నోటీసులు జారీ చేసినప్పటికీ, అక్టోబర్‌ 15 నుంచి అమలుకానున్న ఎండీఆర్‌ విధానంపై స్టే ఇవ్వలేదు.