స‌ర్‌ను వ్య‌తిరేకించ‌డ‌మే దేశ ద్రోహం.. రాహుల్ రాజకీయ పరిజ్ఞానం `సున్నా’

* సీఈసీ తీరుపై రాహుల్ గాంధీ- బిజెపి మాటల యుద్ధం!

ఎన్నికల సంఘం పనితీరు, ‘స్పెషల్ ఇంటెన్సివ్ రివిజన్’ (ఎస్ఐఆర్) ప్రక్రియపై ఇద్దరు ఎన్నికల కమిషనర్లు లేవనెత్తిన అభ్యంతరాలకు సంబంధించి ‘ది ఇండియన్ ఎక్స్‌ప్రెస్’ ప్రచురించిన కథనంపై కాంగ్రెస్ నేత రాహుల్ గాంధీ విలేకరుల సమావేశం నిర్వహించి చీఫ్ ఎల‌క్ష‌న్ క‌మిష‌న‌ర్‌ రాజీనామా చేయాల‌ని డిమాండ్ చేసిన నేపథ్యంలో, ఆయనకు రాజకీయ పరిజ్ఞానం “సున్నా” అని పేర్కొంటూ భారతీయ జనతా పార్టీ కాంగ్రెస్‌పై తీవ్రస్థాయిలో విరుచుకుపడింది.

పైగా, ప్రజాస్వామ్యాన్ని కాపాడాల్సిన అవసరాన్ని ప్రస్తావిస్తూ, ప్రధాన ఎన్నికల కమిషనర్ జ్ఞానేశ్ కుమార్ ‘అప్రూవర్’గా మారాలని రాహుల్ గాంధీ పిలుపునిచ్చారు. “మన ఎన్నికల వ్యవస్థలో ప్రాథమికంగానే లోపాలు ఉన్నాయి. ఎన్నికల పట్ల ఉన్న “పవిత్రమైన నమ్మకం” సన్నగిల్లుతోంది. ఒకవేళ రేపు బీజేపీ ఎన్నికల్లో ఘనవిజయం సాధించినా, ఎవరూ దానిని నమ్మరు” అని ఆయన తెలిపారు.

ఎస్ఐఆర్ ప్రక్రియను నిర్వహించే అధికారం కేంద్ర ఎన్నికల సంఘానికి ఉందని బీజేపీ అధికార ప్రతినిధి, రాజ్యసభ సభ్యుడు సుధాన్షు త్రివేది గుర్తు చేస్తూ ఈ ప్రక్రియను వద్దంటే దేశద్రోహానికి పాల్పడినట్లేనని సుధాన్షు స్పష్టం చేశారు. ఎస్ఐఆర్ ప్రక్రియపై సుప్రీంకోర్టు సంతృప్తి వ్యక్తంచేసిందని గుర్తుచేస్తూ ఆ ప్రక్రియలో అక్రమాలు, అవకతవకలు జరిగినట్లు ఎలాంటి ఆరోపణలు లేవని తెలిపారు.

అస్సాం, బెంగాల్‌లో సర్ ద్వారా ఓట్లు తొలగించారని చెబుతూ నిజాలు తెలియకుండా రాహుల్ గాంధీ ఇష్టానుసారంగా మాట్లాడుతున్నారని సుధాన్షు మండిపడ్డారు. రాహుల్, ఆయన చెల్లి ప్రియాంక గాంధీ వాద్రాకు సొంత రాష్ట్రంలో గెలిచే దమ్ము లేదని ఎద్దేవా చేశారు. అందుకే వయనాడ్‌లో ముస్లిం లీగ్ మద్దతుతో ఆ ఇద్దరూ గెలిచారని పేర్కొన్నారు. కాంగ్రెస్ హయాంలో భారీ ఎత్తున‌ రిగ్గింగ్, ఎన్నికల అక్రమాలు జరిగాయని ఆరోపించారు.

కాంగ్రెస్ పతనానికి సోనియాగాంధీ, రాహుల్‌గాంధీనే కారణమని ఆయన ఆరోపిస్తూ ఎన్నికల సంఘంలో కమిషనర్ల విభేదాలపై ఎన్నికల అధికారులు ఎవరూ కూడా స్పందించలేదని గుర్తు చేశారు. “బెంగాల్‌లో 1977 నుండి, బీహార్‌లో 1990 నుండి, ఉత్తరప్రదేశ్‌లో 1989 నుం, ఒడిశాలో 1999 నుండి కాంగ్రెస్ ప్రభుత్వం అధికారంలో లేదు,” అని త్రివేది పేర్కొన్నారు.

‘ది ఇండియన్ ఎక్స్‌ప్రెస్’ కధనంలో ‘ఎన్నికల కమిషనర్ల నుండి కనీసం అనధికారిక స్పందన కూడా లేదు’ అని పేర్కొంటూ త్రివేది ఆ నివేదికను ప్రశ్నించారు. “ఆ వార్తా కధనంలో ఎన్నికల కమిషన్ నుండి ఏదైనా వ్యాఖ్య ఉందా? ఉందా లేదా? లేకపోతే, ఎన్నికల కమిషనర్ ఇలా అన్నారని ఏ ప్రాతిపదికన చెబుతున్నారు? పత్రికా స్వేచ్ఛను గౌరవిస్తూనే నేను చెబుతున్నాను, ఏ వార్తా నివేదిక విషయంలోనైనా, సంబంధిత వ్యక్తిని సక్రమంగా ప్రశ్నించి వారి వాంగ్మూలాన్ని తీసుకుంటారు. ఆ వాంగ్మూలాన్ని ఉటంకించారా? లేదు. నిర్ణయాలు ఏకగ్రీవంగా లేవని చెప్పే ఒక్క నివేదిక అయినా మీ వద్ద ఉందా? లేదు,” అని ఆయన పేర్కొన్నారు.

“ముగ్గురు (ఎన్నికల) కమిషనర్లు హాజరుకాని ఒక్క పత్రికా సమావేశం అయినా ఉందా? లేదు. మరి దీనికి ఆధారం ఏమిటి? నేను కాంగ్రెస్ పార్టీని సూటిగా ఒక ప్రశ్న అడగాలనుకుంటున్నాను: ఎన్నికల కమిషనర్ నుండి, కనీసం అనధికారికంగా కూడా, ఒక్క వ్యాఖ్య కూడా ప్రస్తావించని నివేదికకు ఆధారం ఏమిటి?” ఆయన బిజెపి నేత ప్రశ్నించారు.

కాగా, ఈ కథనం ప్రచురించడానికి రెండు రోజుల ముందు, సెప్టెంబర్ 21న, ఇద్దరు ఎన్నికల కమిషనర్లు లేవనెత్తిన సమస్యలపై వారి ఆందోళనలను పరిష్కరించడానికి ఏమి చేశారో అడుగుతూఈసీఐకి ఒక ప్రశ్నావళిని పంపినట్లు ‘ది ఇండియన్ ఎక్స్‌ప్రెస్’ శుక్రవారం వెల్లడించింది. అదే రోజు, వారి ఆందోళనలను పరిష్కరించారా? అని అడుగుతూ ఆ ఇద్దరు ఈసీలకు ఈమెయిళ్ళు కూడా పంపారు. ఈ ఈమెయిళ్ళ తర్వాత సోమవారం, మంగళవారం ఫోన్ కాల్స్ కూడా చేశారు. వీటిలో దేనికీ స్పందన రాలేదు.

“మేము మరో విషయం అడగదలచుకున్నాము: రాష్ట్రాల్లో కూడా ఎన్నికల కమిషనర్లను నియమిస్తారు. ఎన్నికల కమిషనర్ ఎంపిక ప్రక్రియలో ప్రతిపక్ష నాయకుడిని భాగస్వాములను చేస్తున్న రాష్ట్రాలు ఎన్ని ఉన్నాయో చెప్పాలని కాంగ్రెస్, ప్రతిపక్ష పార్టీలకు నేను సవాలు విసురుతున్నాను. అలాగే, ఆయా రాష్ట్రాల ప్రధాన న్యాయమూర్తులు ఈ ప్రక్రియలో ఎంతమందిలో భాగస్వాములుగా ఉన్నారు? కానీ ఇక్కడ మాత్రం, ఎన్నికల కమిషనర్ల ఎంపికలో ప్రతిపక్ష నాయకుడు భాగస్వామిగా ఉంటారు,” అని త్రివేది తెలిపారు.

అంతకు ముందు, ఎన్నికల వ్యవస్థపై దాడి చేశారని ఆరోపిస్తూ, ప్రధాన ఎన్నికల కమిషనర్ జ్ఞానేశ్ కుమార్ వెంటనే రాజీనామా చేయాలని రాహుల్ గాంధీ డిమాండ్ చేశారు. ఎస్ఐఆర్ ప్రక్రియపై ఇద్దరు ఎన్నికల కమిషనర్లు అభ్యంతరాలు వ్యక్తం చేయడం ద్వారా ఆ ఇద్దరు ఎన్నికల కమిషనర్లు “తెలివైన పని” చేశారని, వారి చర్యలను తాను అభినందిస్తున్నానని గాంధీ తెలిపారు.

“దీనికి తగిన పరిణామాలు ఉంటాయి. ప్రజాస్వామ్యాన్ని నాశనం కానివ్వం. బాధ్యులైన వారికి శిక్ష పడుతుంది,” అని గాంధీ హెచ్చరించారు. “ఆ ఇద్దరు ఎన్నికల కమిషనర్లు తెలివైన పని చేశారు. నేను దానిని అభినందిస్తున్నాను. మిస్టర్ (జ్ఞానేశ్) కుమార్ అప్రూవర్‌గా మారాలి. అది దేశభక్తితో కూడిన చర్య అవుతుంది. ఏం జరిగిందో మాకు తెలుసు, మేము దానిని బయటపెడతాము,” అని ఆయన తెలిపారు. “జ్ఞానేశ్ కుమార్ వెంటనే రాజీనామా చేయాలని నేను డిమాండ్ చేస్తున్నాను, మీరు ఎన్నికల వ్యవస్థపై దాడి చేశారు,” అని ఆయన పేర్కొన్నారు.