హత్య, హత్యాయత్నం, బలవంతపు వసూళ్లు, నేరపూరిత కుట్ర, ఆయుధ చట్టం ఉల్లంఘనలు, చట్టవిరుద్ధ కార్యకలాపాల నివారణ చట్టం (యుఏపిఎ) వంటి 39 కేసుల్లో నిందితుడిగా ఉన్న, నిషేధిత జార్ఖండ్-ఆధారిత సంస్థ ‘తృతీయ ప్రస్తుతి కమిటీ’ (టిపిసి) అధినేత, సీనియర్ నక్సల్ నాయకుడు బ్రిజేష్ గంఝు (అలియాస్ గోపాల్ సింగ్ భోక్తా), ఆదివారం వారణాసిలో ఉత్తరప్రదేశ్ ఏటీఎస్ తో జరిగిన ఎన్కౌంటర్లో హతమయ్యాడని పోలీసులు తెలిపారు.
రూ. 30 లక్షల రివార్డు కలిగిన గంఝుపై జార్ఖండ్లోని సిమారియా, తాండ్వా, లావాలాంగ్, సదర్, పిపర్వార్, పతల్గడ్డా, మయూర్హండ్, గిధౌర్, హంటర్గంజ్, వశిష్ఠ్నగర్ వంటి అనేక పోలీస్ స్టేషన్లలో కేసులు నమోదయ్యాయని పోలీసు రికార్డులు పేర్కొంటున్నాయి. అతనిపై నమోదైన కేసులలో హత్య, హత్యాయత్నం, కిడ్నాప్, అల్లర్లు, ప్రభుత్వ అధికారులపై దాడి, బలవంతపు వసూళ్లు, నేరపూరిత బెదిరింపులు, నేరపూరిత కుట్ర, చట్టవిరుద్ధమైన గుమిగూడటం, ప్రభుత్వ ఆస్తి ధ్వంసం, అక్రమ ఆయుధాలు, పేలుడు పదార్థాల కలిగి ఉండటం/వాడకం, అలాగే ఉగ్రవాద వ్యతిరేక చట్టాల కింద నేరాలు వంటి అభియోగాలు ఉన్నాయి.
దులార్చంద్ గంఝు, సర్దార్, రంజన్ జీ, ఫుల్చంద్ గంఝు వంటి మారుపేర్లతో కూడా పిలువబడే గంఝు, జార్ఖండ్లోని ఛత్రా జిల్లా, లావాలాంగ్ పోలీస్ స్టేషన్ పరిధిలోని లుటు సోహవన్ గ్రామానికి చెందినవాడు. పోలీసు రికార్డుల ప్రకారం, అతనిపై నమోదైన తొలి కేసులు 1996 నాటివి. అనేక కేసులలో నేషనల్ ఇన్వెస్టిగేషన్ ఏజెన్సీ (ఎన్ఐఏ) కూడా గంఝు కోసం గాలిస్తున్నట్లు పోలీసులు తెలిపారు.
అతని అరెస్టుకు దారితీసే సమాచారం అందించిన వారికి జార్ఖండ్ ప్రభుత్వం రూ. 25 లక్షలు, ఎన్ఐఏ రూ. 5 లక్షల రివార్డును ప్రకటించాయి.”వారణాసిలో ఈ ఉదయం జరిగిన ఎన్కౌంటర్లో బ్రిజేష్ గంఝు (అలియాస్ గోపాల్ సింగ్) హతమయ్యాడని మాకు ఐజీ (ఎస్టిఎఫ్) నుండి సమాచారం అందింది,” అని జార్ఖండ్ పోలీస్ ప్రతినిధి, ఐజీ (ఆపరేషన్స్) నరేంద్ర సింగ్ తెలిపారు.
యూపీ ఏటీఎస్ (డిప్యూటీ సూపరింటెండెంట్ ఆఫ్ పోలీస్ విపిన్ రాయ్ తెలిపిన వివరాల ప్రకారం, ఆదివారం తెల్లవారుజామున గంఝు తన సహచరుడితో కలిసి వారణాసిలోని రామ్నగర్ మీదుగా టెంగ్రా మోర్ నుండి మొఘల్సరాయ్ వైపు మోటార్సైకిల్పై వెళ్తుండగా ఈ ఎన్కౌంటర్ జరిగింది.
“ఒక సమాచారకర్త ఇచ్చిన సమాచారం ఆధారంగా, పోలీసులు అతన్ని అడ్డుకుని అరెస్టు చేయడానికి ప్రయత్నించారు. వాహనం ఆపడానికి బదులుగా, అతను వాహనం దిగి పోలీసులపై కాల్పులు జరిపాడు. ఆ తర్వాత జరిగిన ఎదురుకాల్పుల్లో అతను గాయపడి మరణించాడు,” అని రాయ్ చెప్పారు. ఎదురుకాల్పుల సమయంలో, గంఝు జరిపిన కాల్పుల్లోని బుల్లెట్లు యూపీ ఏటీఎస్ డిప్యూటీ ఎస్పీ విపిన్ రాయ్, హెడ్ కానిస్టేబుల్ నితేంద్ర కృష్ణ ధరించిన బుల్లెట్ ప్రూఫ్ జాకెట్లకు తగిలాయి. అయితే, ఇద్దరు అధికారులు సురక్షితంగా బయటపడ్డారని పోలీసులు పేర్కొన్నారు.
“నిషేధిత సంస్థకు చెందిన ఈ నక్సలైట్ కోసం యూపీ బృందం కొంతకాలంగా గాలిస్తోంది. రాత్రిపూట అతను వస్తున్నాడన్న సమాచారం అందడంతో, ఎస్టీఎఫ్ ఒక వ్యూహాన్ని పన్ని బ్రిజేష్ గంజును పట్టుకోవడానికి ప్రయత్నించింది. అయితే, అతను తప్పించుకోవడానికి ప్రయత్నిస్తూ పోలీసు బృందంపై కాల్పులు జరిపాడు. ఎదురుకాల్పుల్లో గాయపడిన అతన్ని ఆసుపత్రికి తరలించగా, అక్కడ వైద్యులు అతను మరణించినట్లు ధృవీకరించారు” అని విపిన్ రాయ్ తెలిపారు.
మావోయిస్టు ఉద్యమం నుండి విడిపోయిన వర్గంగా పరిగణించబడే, జార్ఖండ్కు చెందిన నిషేధిత నక్సల్ సంస్థ ‘టీపీసీ’\కి గంజు కమాండర్గా వ్యవహరిస్తున్నాడని పోలీసులు తెలిపారు. యూపీ ఏటీఎస్ బృందం అతని కదలికలపై నిఘా ఉంచి, వారణాసిలో అతను ఉన్నాడన్న సమాచారం అందిన తర్వాత ఈ ఆపరేషన్ను చేపట్టింది.
More Stories
హమీద్ అన్సారీ `హిందూ మితవాద మతతత్వం’ వాఖ్యల దుమారం
సేవను ధర్మంగా నిర్వహించడమే భారతీయ సంప్రదాయం
టీ20 క్రికెట్ చరిత్రలో అత్యధిక పరుగులతో స్మృతి మందాన సంచలనం