`శుద్ధి’ వివాదంపై కాంగ్రెస్ నేతల ‘మౌనం’ పట్ల ఖర్గే ‘వేదన’

త‌న‌ను రక్షించండి అని ఎవరినీ అడగలేదని, త‌న‌కు పోరాడే శక్తి ఉందని, పోరాడుతూనే ఉంటానని అంటూ ఈ సందర్భంగా స్పష్టం చేశారు. కానీ హల్ద్వానీలో వేదికను శుద్ధి చేయడంవల్ల తాను అంటరానితనం బాధను అనుభవించానని ఖర్గే పేర్కొన్నారు. ఈ ఘటనకు బాధ్యులపై అంటరానితనం నిరోధక చట్టం కింద కేసు నమోదుచేసి అరెస్టు చేయాలని ఆయన డిమాండ్‌ చేశారు. 

ఖర్గే వ్యాఖ్యలపై రాజ్యసభలో కేంద్ర మంత్రి జేపీ నడ్డా స్పందించారు. హల్ద్వానీ ఘటన దురదృష్టకరమని పేర్కొంటూ  ఈ ఘటనతో బీజేపీ నేతలు, కార్యకర్తలకు సంబంధం లేదని చెప్పారు. దీనిపై విచారణ జరుపుతామని హామీ ఇచ్చారు.  మరోవైపు కాంగ్రెస్‌ మాత్రం శుద్ధీకరణ కార్యక్రమం నిర్వహించిన వారికి బీజేపీ, ఆర్‌ఎస్‌ఎస్‌తో సంబంధాలు ఉన్నాయని ఆరోపించింది. ఈ ఘటన వెనుక దళితులపట్ల వివక్షతో కూడిన ఆలోచనా ధోరణి ఉందని విమర్శించింది. బీజేపీ మాత్రం ఆ కార్యక్రమానికి దూరంగా ఉంటూ శుద్ధీకరణ చర్యను ఖండించింది.

ఇదే సమయంలో, ఖర్గేకు ప్రతిపక్ష నాయకుల నుంచి మద్దతు లభించింది.  బీఎస్పీ అధినేత్రి మాయావతి ఈ విషయంలో పోలీసు చర్య తీసుకోవాలని కోరారు. “ఈ వ్యవహారం తీవ్రంగా ఖండించదగినది.  ఎంతో ఆందోళనకరమైనది” అని ఉత్తరప్రదేశ్ మాజీ ముఖ్యమంత్రి  ఎక్స్ వేదికగా చేసిన ఒక పోస్ట్‌లో పేర్కొన్నారు.