అరుణాచల్ భూభాగం చైనా ఆక్రమణ ప్రచారంలో నిజం లేదు!

అంతమాత్రాన మన గ్రామాల్ని చైనా ఆక్రమించుకున్నట్లు కాదని పేర్కొంటూ  మన భూభాగం మీద ఎప్పటినుంచో చైనా దృష్టి ఉందని కేంద్ర మంత్రి చెప్పారు. భారత సరిహద్దు మరింత విస్తరించిందని, ఈ ప్రాంతంలో చైనా వైపు ఉన్న టిబెటన్లు, ఇతర స్థానికులు తమ భూభాగం మరింత దూరం విస్తరించి ఉందని భావించడం వల్ల గందరగోళం ఏర్పడుతోందని కిరణ్ రిజిజు వివరించారు. 

దీన్ని సాకుగా చూపి, అరుణాచల్ ప్రదేశ్‌లోని 60 కిలోమీటర్లు ఆక్రమించుకున్నట్లు ప్రచారం చేస్తున్నారని మండిపడ్డారు. “అవి బంగ్లాదేశ్‌కు సంబంధించిన ఫొటోలు. మన ఆర్మీ, భద్రతా బలగాల్ని తక్కువ చేసేలా తప్పుడు సమాచారాన్ని వ్యాప్తి చేస్తున్నారు. దీంతో దేశంలో గందరగోళం ఏర్పడుతోంది’’ అని కిరణ్ రిజిజు విచారం వ్యక్తం చేశారు. 

“కొన్ని ప్రాంతాల్లో చైనా కార్యకలాపాలు పెరిగాయి, గ్రామస్తుల ఆందోళనలను తప్పక పరిగణనలోకి తీసుకోవాలి. అయితే, బంగ్లాదేశ్‌కు సంబంధించిన వాటితో సహా తప్పుడు వీడియోలు, ఆరోపణలను ప్రచారం చేయడం సరికాదు. ఇది సాయుధ దళాల మనోధైర్యాన్ని దెబ్బతీస్తుంది మరియు దేశంలో గందరగోళాన్ని సృష్టిస్తుంది” అని ఆయన హెచ్చరించారు. 

రిజిజు ప్రకారం, అసలు సమస్య ఏమిటంటే చైనా సరిహద్దు ప్రాంతాల్లో చాలా కాలం క్రితమే రహదారుల నిర్మాణాన్ని ప్రారంభించింది. “ఆ సమయంలో కాంగ్రెస్ అధికారంలో ఉంది. అప్పటి రక్షణ మంత్రి ఏకే ఆంటోనీ, సరిహద్దు వెంబడి మౌలిక సదుపాయాలను నిర్మించకూడదన్నదే భారతదేశ విధానమని పార్లమెంటులో చెప్పారు. అదే సమయంలో, చైనా మాత్రం రహదారులు, మౌలిక సదుపాయాల నిర్మాణాన్ని కొనసాగించింది” అని ఆయన పేర్కొన్నారు. 

“మనం రహదారిని నిర్మించడంలో విఫలమైనప్పుడు చైనా విజయం సాధించింది. తద్వారా చైనా సైన్యం ఎత్తైన ప్రాంతాలను ఆక్రమించి, సరిహద్దు మౌలిక సదుపాయాలను నిర్మించుకుంది” అని తెలిపారు. అయితే, 2014 తర్వాత పరిస్థితి మారిందని, ప్రభుత్వం సరిహద్దు మౌలిక సదుపాయాల అభివృద్ధిని వేగవంతం చేసిందని రిజిజు తెలిపారు. 1947 నుండి ఎటువంటి అభివృద్ధి జరగని మారుమూల సరిహద్దు ప్రాంతాల్లో కూడా ప్రస్తుత ప్రభుత్వం రహదారులను నిర్మించిందని ఆయన గుర్తుచేశారు. 

సరిహద్దులో భద్రతను మరింత కట్టుదిట్టం చేస్తున్నట్లు వెల్లడించారు. చైనా సరిహద్దులో భారతీయ సైన్యంపాటు ఇండో-టిబెటన్ బోర్డర్ పోలీసులు కూడా పహారా కాస్తున్నట్లు తెలిపారు.