సోషల్ మీడియా, డిజిటల్ ప్లాట్ఫారమ్ల నియంత్రణ, యూజర్ల గోప్యత, ప్రజా శాంతిభద్రతల పరిరక్షణ అంశాలపై చర్చించేందుకు పార్లమెంటరీ స్టాండింగ్ కమిటీ కీలక నిర్ణయం తీసుకుంది. ప్రముఖ సామాజిక మాధ్యమాలైన మెటా (ఫేస్బుక్, ఇన్స్టాగ్రామ్, వాట్సాప్), గూగుల్, ఎక్స్, స్నాప్చాట్లతో పాటు కేంద్ర ఎలక్ట్రానిక్స్, ఐటీ మంత్రిత్వ శాఖ, హోం శాఖ ఉన్నతాధికారులకు ఆగస్టు 3న తమ ముందు హాజరు కావాలని సమన్లు జారీ చేసింది.
ఐటీ, కమ్యూనికేషన్స్ పార్లమెంటరీ స్టాండింగ్ కమిటీ చైర్మన్, బీజేపీ ఎంపీ నిషికాంత్ దూబే ఈ వివరాలను వెల్లడించారు. మహిళలు, పిల్లలు, రైతులు, గ్రామీణులు, కార్మికులు, సాధారణ పౌరుల డిజిటల్ గోప్యతను ఈ సంస్థలు ఎలా కాపాడుతున్నాయి? సోషల్ మీడియా వేదికగా తప్పుడు సమాచారం ప్రచారమవ్వకుండా, ప్రభుత్వ శాంతిభద్రతలకు విఘాతం కలగకుండా ఎలాంటి చర్యలు తీసుకుంటున్నారో వివరించాలని ప్యానెల్ స్పష్టం చేసింది.
ఆగస్టు 3వ తేదీన సాయంత్రం 4 గంటలకు ఈ ప్లాట్ఫారమ్ల ప్రతినిధులు కమిటీ ముందు హాజరై వివరణ ఇవ్వాల్సి ఉంటుంది. మంగళవారం మెటా వేదికగా జరిగిన ఒక అనూహ్య పరిణామం ఈ చర్యలకు ప్రధాన కారణమైంది: నీట్ పేపర్ లీక్లపై కఠిన చర్యలు తీసుకుంటామని ప్రధాని నరేంద్ర మోదీ పోస్ట్ చేసిన సెల్ఫీ వీడియోను ఫేస్బుక్ కొద్దిసేపు తొలగించి, ఆ తర్వాత పునరుద్ధరించింది.
కేవలం 24 గంటల్లోనే 303 మిలియన్లకు పైగా వ్యూస్ సాధించి రికార్డు సృష్టించిన ఈ వీడియో హఠాత్తుగా మాయమవ్వడంపై కేంద్ర ఐటీ శాఖ తీవ్ర ఆగ్రహం వ్యక్తం చేస్తూ మెటా, ఇన్స్టాగ్రామ్ గ్లోబల్ హెడ్స్కు సమన్లు ఇచ్చింది.దీనిపై మెటా స్పందిస్తూ ఇది ఉద్దేశపూర్వకంగా చేసింది కాదని, కేవలం ఒక అంతర్గత సాంకేతిక లోపం వల్లే జరిగిందని వివరణ ఇస్తూ కేంద్రానికి క్షమాపణలు చెప్పింది.
మరోవైపు నీట్ పరీక్షల అక్రమాలపై ఢిల్లీలోని జంతర్ మంతర్ వద్ద జరిగిన విద్యార్థుల ఆందోళనలకు సోషల్ మీడియా ప్రధాన వేదికగా మారింది. సిపిజే నేతృత్వంలో జరిగిన ఈ నిరసనల్లో ఇన్స్టాగ్రామ్ను విస్తృతంగా ఉపయోగించారు. లైవ్ అప్డేట్లు, రీల్స్ ఆన్లైన్లో విపరీతంగా వైరల్ అయ్యాయి.దాదాపు 36 రోజుల పాటు సాగిన ఈ నిరసనల అనంతరం కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయడం, ప్రభుత్వం విద్యార్థుల ప్రధాన డిమాండ్లను అంగీకరించడంతో ఆందోళన ముగిసింది.
More Stories
నీట్ లీక్ లో ఎన్టీఎ నిపుణులు, కోచింగ్ సిబ్బంది, దళారుల సిండికేట్
రూ 98 లక్షల సబ్సిడీని తిరిగి చెల్లించిన వ్యవసాయ మంత్రి చౌదరి
‘ఎక్స్’లో బ్యాంకింగ్ సేవలు