కేంద్ర ప్రభుత్వం, కాక్రోచ్ జనతా పార్టీ (సిజెపి) ప్రతినిధి బృందాల మధ్య జరిగిన మూడవ విడత చర్చల అనంతరం, న్యూఢిల్లీలోని ‘కాన్స్టిట్యూషన్ క్లబ్ ఆఫ్ ఇండియా’లో వారు సంయుక్త విలేకరుల సమావేశాన్ని నిర్వహించారు. ఈ సమావేశంలో, ఉద్యమ డిమాండ్లను పరిశీలించడానికి కేంద్రం అంగీకరించిందని సిజెపి ప్రతినిధి సౌరవ్ దాస్ తెలిపారు. నిరసన అధికారికంగా ముగిసిందని ప్రకటించిన దాస్, నిరసనకారులందరూ ఆ స్థలాన్ని ఖాళీ చేయాలని విజ్ఞప్తి చేశారు.
నిరసనకారులెవరిపైనా చట్టపరమైన చర్యలు తీసుకోకూడదని కేంద్రం నిర్ణయించిందని కేంద్ర మంత్రి జె.పి. నడ్డా తెలిపారు. అలాగే, నీట్ పేపర్ లీక్ అయిన తర్వాత ఆత్మహత్య చేసుకున్న విద్యార్థుల కుటుంబాలకు చెల్లించాల్సిన పరిహారం మొత్తాన్ని త్వరలోనే ఖరారు చేస్తామని ఆయన పేర్కొన్నారు. “విద్యా సంస్కరణల కోసం మీరు సమర్పించిన డిమాండ్ల పత్రాన్ని మేము పరిశీలిస్తాము. మీ ప్రతినిధి బృందంతో చర్చలు కూడా జరుపుతాము,” అని కేంద్ర మంత్రి తెలిపారు.
నమోదైన అన్ని ఎఫ్ఐఆర్ కాపీలను ప్రభుత్వం సిజెపితో పంచుకుంటుందని దాస్ చెప్పారు. “దీనిని దృష్టిలో ఉంచుకుని, మేము ప్రభుత్వానికి ఒక ముసాయిదాను అందించాము. అది ఒక లిఖితపూర్వక హామీ. మంగళవారం నాటికి ప్రభుత్వం దీనిని మాకు అందజేస్తామని చెప్పింది. ఈ ఎఫ్ఐఆర్లు, భవిష్యత్తు చర్యలకు సంబంధించి ప్రభుత్వ హామీలు మంగళవారం నాటికి మాకు అందుతాయని మేము ఆశిస్తున్నాము,” అని ఆయన తెలిపారు.
“ప్రభుత్వ ప్రతినిధి బృందంతో మేము మూడు విడతలుగా చర్చలు జరిపాము. జంతర్ మంతర్ వద్ద మేము చేపట్టిన నిరసనలో మూడు ప్రధాన డిమాండ్లు ఉన్నాయి: ధర్మేంద్ర ప్రధాన్ రాజీనామా చేయడం; నిరసనకారులు, నిర్వాహకులపై నమోదైన చట్టపరమైన కేసులను (ఎఫ్ఐఆర్లను) ఉపసంహరించుకోవడం, భవిష్యత్తులో వారిపై ఎటువంటి కేసులు నమోదు చేయకపోవడం; అలాగే నీట్ పేపర్ వ్యవహారం తర్వాత తమ వారిని కోల్పోయిన కుటుంబాలకు రూ. 1 కోటి పరిహారం అందించడం” అని గుర్తు చేశారు.
“కాసేపటి క్రితమే ధర్మేంద్ర ప్రధాన్ రాజీనామా చేశారు. అంటే మా మొదటి డిమాండ్ అంగీకరించబడిందన్నమాట,” అని ప్రభుత్వంతో చర్చల అనంతరం కాక్రోచ్ జనతా పార్టీ జాతీయ ప్రతినిధి అశుతోష్ రంకా తెలిపారు.
కాగా, మీడియా, పోలీసులపై దాడి చేసిన వారు సీజేపీ మద్దతుదారులు కాదని, వారు “అసాంఘిక శక్తులు” అని సీజేపీ అధికార ప్రతినిధి సౌరవ్ దాస్ స్పష్టం చేశారు. నిరసన సందర్భంగా జరిగిన హింసను ఖండిస్తూ, అటువంటి శక్తులు శాంతియుత వాతావరణానికి భంగం కలిగించి, అశాంతిని సృష్టించడానికి ప్రయత్నించాయని ఆయన విమర్శించారు.
సీజేపీ ఆందోళనను విరమించుకున్న అనంతరం సోనమ్ వాంగ్చుక్ మాట్లాడుతూ, “ఇది ప్రజాస్వామ్య విజయం. ఇదే విధంగా భారతదేశ ప్రజాస్వామ్యం కూడా రక్షించబడుతుందని నేను ఆశిస్తున్నాను. శాంతియుత మార్గాల ద్వారా ఈ ఉద్యమానికి నాయకత్వం వహించినందుకు సీజేపీని కూడా నేను అభినందిస్తున్నాను,” అని చెప్పారు.
More Stories
కేంద్ర విద్యామంత్రి ధర్మేంద్ర ప్రధాన్ రాజీనామా
యువతకు ఆదేశాలు కాకుండా అర్ధవంతమైన చర్చ జరపాలి
ఫేషియల్ రికగ్నిషన్ తో ఢిల్లీలో 2,500 మంది దుండగుల గుర్తింపు