జమ్మూకశ్మీర్ పాఠ్యపుస్తకాల్లో ఉగ్రవాదులపై పొగడ్తల దుమారం 

పర్సనాలిటీ అండ్ లెజెండ్స్ ఆఫ్ జమ్మూ అండ్ కశ్మీర్, గ్రేట్ పర్సనాలిటీస్ ఆఫ్ జమ్మూ అండ్ కశ్మీర్ అనే రెండు పుస్తకాలను ఇటీవల ప్రభుత్వం బయటకు తీసుకొచ్చింది. ఈ రెండు పుస్తకాలే ఇప్పుడు తీవ్ర వివాదానాకి కారణమయ్యాయి. దాంతో ప్రభుత్వం ఈ రెండు పుస్తకాలను రద్దు చేసింది. జమ్మూ కశ్మీర్ లెఫ్టినెంట్ గవర్నర్ మనోజ్ సిన్హా ఆదేశాల మేరకు స్కూల్ ఎడ్యుకేషన్ డిపార్ట్‌మెంట్ దీనిపై వెంటనే చర్యలు కూడా చేపట్టింది.

పర్సనాలిటీ అండ్ లెజెండ్స్ ఆఫ్ జమ్మూకశ్మీర్ పుస్తకాన్ని హిలాల్ అహ్మద్, సంతోష్ మీనా రచించగా, ఒబెరాయ్ బుక్ సర్మీస్ ప్రచురించింది. గ్రేట్ పర్సనాలిటీస్ ఆఫ్ జమ్మూకశ్మీర్ పుస్తకాన్ని సుశాంత్ గిరి రచించగా, ఢిల్లీలోని అనురాగ్ ప్రకాశ్ సంస్థ ప్రచురించింది. ఈ పుస్తకాలలో వేర్పాటువాద నాయకులు, ఉగ్రవాదానికి సంబంధించిన వ్యక్తులైన మక్బూల్ భట్, సయ్యద్ అలీ షా గిలానీ, మసరత్ ఆలమ్, హురియత్ నేత మీర్వైజ్ ఉమర్ ఫరూఖ్‌లను గొప్ప వ్యక్తులుగా, ఆదర్శ నాయకులుగా చిత్రీకరించినట్లు ఆరోపణలు వచ్చాయి.

ఓ పుస్తకం జేకేఎల్ఎఫ్ ఉగ్రవాది మక్బూల్ భట్‌ను ‘షహీద్’గా అభివర్ణించిందని, అలాగే కరడుగట్టిన పాకిస్థాన్ అనుకూల వేర్పాటువాదులైన సయ్యద్ అలీ షా గీలనీ, మసరత్ ఆలంలను కీర్తిస్తోందని ఆరోపణలు ఉన్నాయి. 2008 ముంబై ఉగ్రదాడుల సూత్రధారి అయిన హఫీజ్ సయీద్‌ను కూడా ఈ పుస్తకం పొగుడుతోందని బీజేపీ ఆరోపించింది.

జమ్మూ కాశ్మీర్‌ను ‘ఇండియన్ హెల్డ్ కాశ్మీర్’, ‘ఇండియన్ ఆక్యుపైడ్ కాశ్మీర్’ అని పేర్కొనడంపై కూడా ఈ ప్రచురణ విమర్శలను ఎదుర్కొంది. ఈ పుస్తకంపై ‘సమగ్ర శిక్ష, జమ్మూ కాశ్మీర్’ లోగో ఉన్నందున, ప్రభుత్వ పాఠశాలల గ్రంథాలయాలకు దీనికి ఎలా అనుమతి లభించిందనే దానిపై కూడా ప్రశ్నలు తలెత్తాయి.

ప్రభుత్వ పాఠశాలల గ్రంథాలయాల్లోకి దేశ వ్యతిరేక సామగ్రిని అనుమతిస్తున్నారని బీజేపీ యంత్రాంగంపై ఆరోపణలు చేసి, బాధ్యులపై చర్యలు తీసుకోవాలని డిమాండ్ చేయడంతో ఈ వివాదం మరింత ముదిరింది. కేంద్రపాలిత ప్రాంతంలోని పాఠశాలలకు ఈ పుస్తకాలను పంపిణీ చేశామని జమ్మూ కాశ్మీర్ అసెంబ్లీ ప్రతిపక్ష నాయకుడు సునీల్ శర్మ తెలిపారు.

“ఈ పుస్తకాలను జమ్మూ కాశ్మీర్‌లోని అనేక పాఠశాలల గ్రంథాలయాలకు పంపిణీ చేశారు. ఇది తీవ్రమైన నేరం. 2008 ముంబై దాడుల సూత్రధారి అయిన హఫీజ్ సయీద్‌ను పొగిడే పుస్తకం; జమ్మూ కాశ్మీర్‌ను ‘భారత ఆక్రమిత కాశ్మీర్’గా పేర్కొనే పుస్తకం – ఇలాంటి పుస్తకం అభ్యంతరకరమైనది, వివాదాస్పదమైనది. దీనిని తక్షణమే నిషేధించాలి,” అని శర్మ స్పష్టం చేశారు.

 “రచయిత, ప్రచురణకర్త, నిపుణుల కమిటీలతో పాటు విద్యాశాఖ మంత్రి కూడా జవాబుదారీగా ఉండాలి. విద్యాశాఖ మంత్రిని తక్షణమే తొలగించడం ప్రభుత్వ అధినేత విధి,” అని ఆయన కోరారు. ఈ ఉదంతాన్ని, విద్యా వ్యవస్థ ద్వారా “యువ మనస్సులను విషపూరితం చేయడానికి”, వేర్పాటువాదాన్ని పునరుద్ధరించడానికి ఉద్దేశపూర్వక ప్రయత్నం జరుగుతోందని శర్మ ఆరోపించారు.

“దీని వెనుక ఒక నిర్దిష్ట ఎజెండా ఉందనడంలో ఎటువంటి సందేహం లేదు; ఇది ఒక భారీ కుట్ర. ఇందులో నేషనల్ కాన్ఫరెన్స్ ప్రభుత్వం పై నుండి క్రింది వరకు పాలుపంచుకుందనడంలో మాకు ఎటువంటి సందేహం లేదు,” అని ఆయన ఆరోపించారు. జమ్మూ కాశ్మీర్ విద్యాశాఖ మంత్రి సకీనా ఇటూను పదవి నుంచి తొలగించాలని బీజేపీ డిమాండ్ చేసింది.

ఈ పుస్తకాలకు ఎలా ఆమోదం తెలిపి, పంపిణీ చేశారనే దానిపై ఉన్నత స్థాయి విచారణ జరపాలని కాంగ్రెస్ కూడా డిమాండ్ చేసింది. “తెలిసిన దాని ప్రకారం, పుస్తకంలో అభ్యంతరకరమైన కంటెంట్ ఉన్నట్లయితే, ఇలాంటి దుశ్చర్యలకు తావు లేదు. పాఠశాలలు, ప్రభుత్వ సంస్థలకు ఈ పుస్తకాన్ని సరఫరా చేయడానికి అనుమతించిన దోషులను గుర్తించడానికి ఉన్నత స్థాయి విచారణ జరపాలి,” అని జమ్మూ కాశ్మీర్ ప్రదేశ్ కాంగ్రెస్ కమిటీ ప్రధాన అధికార ప్రతినిధి రవీందర్ శర్మ డిమాండ్ చేశారు.

విచారణ పూర్తయ్యే వరకు పుస్తకాలపై నిషేధం కొనసాగించాలని, అలాగే “పుస్తక ప్రచురణ వెనుక ఉన్న కుట్రను బయటపెట్టాల్సిన అవసరం ఉందని” ఆయన స్పష్టం చేశారు. జమ్మూ కాశ్మీర్ పీపుల్స్ ఫోరమ్‌తో సహా పలు పౌర సమాజ బృందాలు కూడా ఈ పుస్తకాలను నిషేధించాలని, బాధ్యులపై చర్యలు తీసుకోవాలని ప్రభుత్వాన్ని కోరాయి.

జమ్మూ కాశ్మీర్ మాజీ డైరెక్టర్ జనరల్ ఆఫ్ పోలీస్ ఎస్పీ వైద్ ఈ విషయాన్ని “తీవ్ర ఆందోళన కలిగించే అంశం” అని అభివర్ణించారు. “ఈ పుస్తకం తీవ్రమైన ముప్పును కలిగిస్తుంది, పాఠశాల విద్యార్థులను తీవ్రవాదులుగా మార్చగలదు. ప్రభుత్వం తక్షణమే ఈ పుస్తకాన్ని ఉపసంహరించుకోవాలి. దేశం కోసం ప్రాణాలు అర్పించిన భద్రతా దళాల కుటుంబాలకు క్షమాపణ చెప్పాలి,” అని వైద్ స్పష్టం చేశారు.