పాక్ లో 125 ఏళ్ల నాటి సిక్కు గురుద్వారా కూల్చివేత.. భారత్ ఆగ్రహం

పాకిస్థాన్‌లోని పంజాబ్ ప్రాంతంలో మైనారిటీల పవిత్ర స్థలాలు, వారసత్వ కట్టడాల రక్షణ ఎంత దయనీయంగా ఉందో చాటిచెప్పేలా మరో షాకింగ్ ఘటన వెలుగుచూసింది. లాహోర్‌కు సుమారు 70 కిలో మీటర్ల దూరంలో ఉన్న ఫరూరాబాద్‌లో ఏకంగా 125 సంవత్సరాల పురాతనమైన అత్యంత చారిత్రక ‘గురుద్వారా శ్రీ గురు సింగ్ సభ సాహిబ్’ను ఒక స్థానిక వ్యాపారవేత్త రాత్రికి రాత్రే బుల్డోజర్లతో పూర్తిగా కూల్చివేశాడు. 

జూన్ 24వ తేదీ రాత్రి జరిగిన ఈ అనాగరిక చర్య స్థానిక సిక్కు సమాజంలో తీవ్ర ఆగ్రహాన్ని రేకెత్తించింది. ఈ ఉదంతంపై భారత్ తీవ్ర ఆగ్రహం వ్యక్తం చేసింది. ఇది సిక్కుల పవిత్ర మందిరంపై పక్కా ప్రణాళికతో జరిగిన దాడి అని న్యూఢిల్లీలో భారత విదేశాంగ మంత్రిత్వ శాఖ అధికార ప్రతినిధి రణధీర్ జైస్వాల్ స్పష్టం  చేశారు.

ఇదిలా ఉండగా గురుద్వారా పునర్నిర్మాణ ప్రణాళికపై స్థానిక ముస్లిం వ్యాపారులు కొన్ని అభ్యంతరాలు వ్యక్తం చేస్తున్నారు. గత 80 ఏళ్లుగా ఈ గురుద్వారా ప్రాంగణం పూర్తిగా పాడుబడిపోయిందని, ఆ సమయంలోనే అనేక కుటుంబాలు ఇక్కడ స్థిరపడి దుకాణాలు ఏర్పాటు చేసుకున్నాయని వారు చెబుతున్నారు. ఇప్పుడు పునర్నిర్మాణం పేరిట తమను ఖాళీ చేయిస్తే ఉపాధి కోల్పోతామని, కాబట్టి ప్రత్యామ్నాయ వసతి కల్పించాలని కోరుతున్నారు.