కాక్రోచ్ జనతా పార్టీ (సిజెపి) ఎక్స్ ఖాతాను వెంటనే  పునరుద్ధరించేందుకు ఢిల్లీ హైకోర్టు శుక్రవారం తిరస్కరించింది. భవిష్యత్ పరిణామాల దృష్ట్యా, ప్రభుత్వ వాదనలు విన్న తర్వాతనే అటువంటి ఉపశమనం కల్పించగలమని జస్టిస్ పురుషైంద్ర కుమార్ కౌరవ్ తెలిపారు. కేంద్రానికి నోటీసులు జారీ చేసి, తదుపరి విచారణను జూలై 6వ తేదీకి వాయిదా వేశారు.

జాతీయ భద్రతా కారణాల దృష్ట్యా తమ పార్టీకి చెందిన ఎక్స్ ఖాతాను నిలిపివేయడాన్ని సవాలు చేస్తూ అభిజిత్ దాఖలు చేసిన పిటిషన్‌పై, ఈ విషయం “సుదూర పరిణామాలను” కలిగి ఉందని, కేంద్రం వాదనలు విన్న తర్వాత సమగ్ర పరిశీలన అవసరమని కోర్టు వ్యాఖ్యానించింది.  ‘ఎక్స్’ సంస్థ వ్యవహారశైలిపై సొలిసిటర్ జనరల్ తుషార్ మెహతా కూడా ఆందోళన వ్యక్తం చేశారు. ఆ మధ్యవర్తి సంస్థ పిటిషనర్‌కు సహకరిస్తున్నట్లుగా కనిపిస్తోందని ఆయన ఆరోపించారు.