టీవీ చర్చల్లో అధికార బీజేపీ తరపున తరచుగా కనిపించే ప్రముఖ ముఖాల్లో ఒకరైన షెహజాద్ పూనావాలా ఆ పార్టీకి రాజీనామా చేశారు. గురువారం నాడు, పూనావాలా తన ‘ఎక్స్’ ఖాతాలోని బయో (పరిచయ వివరాలు)లో మార్పులు చేశారు. అందులో “బీజేపీ జాతీయ అధికార ప్రతినిధి” అనే అంశాన్ని తొలగించినప్పటికీ, “ప్రధాన మంత్రి నరేంద్ర మోదీకి జీవితకాల అనుచరుడు” అనే అంశాన్ని మాత్రం అలాగే ఉంచారు.
“మతం: ఇస్లాం, సంస్కృతి: హిందూ, భావజాలం: భారతీయ, రచయిత: ‘జీఎస్టీ కి యాత్ర’, ప్రధాని నరేంద్ర మోదీకి జీవితకాల అనుచరుడు” అని ఆయన తన తాజా బయోలో పేర్కొన్నారు. వృత్తి రీత్యా న్యాయవాది అయిన షెహజాద్ పూనావాలా తన రాజకీయ ప్రస్థానాన్ని కాంగ్రెస్ పార్టీతో ప్రారంభించారు. రాహుల్ గాంధీని పార్టీ అధ్యక్షుడిగా నియమించేందుకు కాంగ్రెస్ అంతర్గత ఎన్నికల ప్రక్రియలో అక్రమాలు జరిగాయని బహిరంగంగా ఆరోపించి, సవాలు విసరడం ద్వారా ఆయన 2017లో వార్తల్లో నిలిచారు.
కాంగ్రెస్ నుంచి బయటకు వచ్చిన తర్వాత ఆయన బీజేపీలో చేరారు. ఆ పార్టీ జాతీయ అధికార ప్రతినిధిగా నియమితులయ్యారు. తాను క్రియాశీల రాజకీయాల నుంచి తప్పుకోవాల్సిన సమయం ఆసన్నమైందని పేర్కొంటూ, ఒక టీవీ ఛానెల్కు గతంలో ఇచ్చిన ఇంటర్వ్యూ క్లిప్ను పూనావాలా ఇటీవల సోషల్ మీడియాలో పంచుకున్నారు. షెహజాద్ పూనావాలా ప్రముఖ రాజకీయ విశ్లేషకుడు తెహసీన్ పూనావాలాకు తమ్ముడు.
షెహజాద్ కాంగ్రెస్ పార్టీని వీడి, టీవీ చర్చల్లో ఆ పార్టీని, దాని నాయకత్వాన్ని విమర్శించడం ప్రారంభించిన తర్వాత ఈ సోదరుల మధ్య బహిరంగ విభేదాలు తలెత్తాయి. తెహసీన్ పూనావాలా తరచుగా టీవీ చర్చల్లో కాంగ్రెస్ మద్దతుదారుగా, ప్రధాని నరేంద్ర మోదీ ప్రభుత్వ విమర్శకుడిగా కనిపిస్తుంటారు.
భావజాలపరంగా భిన్న ధృవాల్లో ఉన్న ఈ సోదరులు తరచుగా వార్తా ఛానెళ్ల లైవ్ చర్చల్లో ముఖాముఖి తలపడుతుంటారు. ఈ సందర్భంగా వారు ఒకరిపై ఒకరు తీవ్ర వాదనలు, రాజకీయ విమర్శలు, వ్యంగ్య వ్యాఖ్యలు చేసుకుంటూ ఉంటారు. ఆయన రాజీనామాకు గల కారణాల గురించి “వ్యక్తిగత కారణాలు” అనే ప్రస్తావన తప్ప, బీజేపీ లేదా పూనావాలా నుండి ఎటువంటి అధికారిక ధృవీకరణ రాలేదు. దీనిపై త్వరలోనే అధికారిక ప్రకటన వెలువడే అవకాశం ఉంది.
More Stories
రక్తసిక్తమైన యూనిఫాంలు, పగిలిన హెల్మెట్లు
పటిష్టమైన పరీక్షా విధానం.. ప్రధాని మోదీ హామీ
రాహుల్ గాంధీపై సభాహక్కుల ఉల్లంఘన తీర్మానం