పార్లమెంటులో ‘పేపర్ లీక్ నిరోధక బిల్లు’ ఆమోదం పొందడాన్ని స్వాగతిస్తూ, భారతదేశ పరీక్షా విధానాన్ని మరింత పటిష్టం చేస్తామని ప్రధాని నరేంద్ర మోదీ గురువారం హామీ ఇచ్చారు. దేశంలో పేపర్ లీక్ ముఠాలపై కఠిన చర్యలు తీసుకునేందుకు తమ ప్రభుత్వం కట్టుబడి ఉందని ఆయన పునరుద్ఘాటించారు. తన సోషల్ మీడియా ఖాతాలలో పోస్ట్ చేసిన మరో వీడియోలో, పేపర్ లీక్ నిరోధక బిల్లు ఆమోదం పొందడం భారతదేశానికి ఒక చారిత్రాత్మక ఘట్టమని ప్రధాని పేర్కొన్నారు.
పరీక్షా విధానాన్ని మరింత బలోపేతం చేయడానికి మరిన్ని చర్యలు తీసుకుంటామని, ‘వికసిత్ భారత్’ కలను సాకారం చేసుకునేందుకు దేశం మొత్తం కలిసి ముందుకు సాగాలని ఆయన కోరారు. దశాబ్దాలుగా వరుసగా వచ్చిన రాష్ట్ర, కేంద్ర ప్రభుత్వాలు పేపర్ లీక్ ఘటనలను ఎదుర్కొంటూనే ఉన్నాయని, అందుకే పరీక్షా విధానంలో సంస్కరణలు తీసుకురావడం అవసరమైందని ఆయన గుర్తుచేశారు.
“దీన్ని ఎదుర్కోవడానికి మనకు కఠినమైన చట్టాలు అవసరం. మేము పార్లమెంటులో ఒక బిల్లును ప్రవేశపెట్టాము. నేను మీకు ఇచ్చిన హామీ మేరకు, పార్లమెంటు ఉభయ సభలు – భారీ సంఖ్యలో ఎంపీల భాగస్వామ్యంతో – దీనిపై సమగ్ర చర్చలు జరిపాయి,” అని ప్రధాని తన 2.26 నిమిషాల వీడియోలో చెప్పారు.
“నేడు, కఠినమైన చట్టపరమైన నిబంధనలతో కూడిన ఈ బిల్లును ఉభయ సభలు ఆమోదించాయి. విశ్వసనీయమైన పరీక్షా విధానాన్ని సాధించే దిశగా ఇప్పుడు ఒక కీలక అడుగు పడింది. ఈ కృషి కొనసాగుతుంది. ఇటువంటి పరిస్థితిని ఎక్కువ కాలం కొనసాగనివ్వము. ఈ దృఢ సంకల్పంతో, మిత్రులారా, ‘వికసిత్ భారత్’ కలను సాకారం చేసుకునేందుకు మనం భుజం భుజం కలిపి ముందుకు సాగుదాం,” అని ఆయన జోడించారు.
“పిల్లల భవిష్యత్తు అనిశ్చితిలో పడింది. కేంద్రం, అన్ని రాష్ట్రాలకు విద్యా సంస్కరణలు తప్పనిసరి. దీనికి సాంకేతికత వినియోగం అవసరం. పేపర్ లీక్లకు పాల్పడే ఏ ముఠా అయినా, దేశంలోని పిల్లల భవిష్యత్తుతో ఆడుకునే వారు ఎవరైనా సరే, శిక్ష తప్పించుకోలేరు,” అని ప్రధాని స్పష్టం చేశారు. పేపర్ లీక్లకు పాల్పడే ముఠాలను అడ్డుకోవడంలోనూ, దేశానికి నమ్మదగిన విద్యా విధానాన్ని అందించడంలోనూ ఈ కఠిన చర్యలు తమ లక్ష్యాన్ని నెరవేరుస్తాయని ప్రధాని మోదీ భరోసా వ్యక్తం చేశారు.
“ఈ కృషి కొనసాగుతుంది,” అని చెబుతూ, “ఇటువంటి పరిస్థితిని కొనసాగనివ్వము. ఆ విశ్వాసంతో, అభివృద్ధి చెందిన భారతదేశం అనే కలను సాకారం చేసుకునేందుకు మనమందరం కలిసి ముందుకు సాగుదాం,” అని ఆయన పేర్కొన్నారు.
More Stories
రాహుల్ గాంధీపై సభాహక్కుల ఉల్లంఘన తీర్మానం
ప్రొఫెసర్ కామకోటిపై `గోమూత్ర నిపుణుడు’ వ్యాఖ్యలపై దుమారం
పంజాబ్లో పేపర్ లీకేజీలపై ఆప్ కార్యాలయం ఎదుట బీజేపీ ఆందోళన