* మారు వేషంలో ప్రవేశించి ప్రధాన నిందితుని అరెస్ట్ చేసిన ఏడుగురు మహిళా పోలీసు అధికారులు
ఏడుగురు మహిళా పోలీసు అధికారులు మారువేషంలో నాసిక్లోని ఒక బహుళజాతి సంస్థలోకి ప్రవేశించి, లైంగిక వేధింపుల కేసులో ప్రధాన నిందితుడు మహిళా ఉద్యోగులతో అనుచితంగా ప్రవర్తించడాన్ని ప్రత్యక్షంగా చూశారు. దీంతో పలువురిని అరెస్టు చేశారు. కంపెనీలో జరుగుతున్న ఒక సమావేశంలోకి మహిళలు ప్రవేశించినప్పుడు, నిందితుడు మహిళలతో దురుసుగా, అనుచితంగా ప్రవర్తిస్తూ రెడ్ హ్యాండెడ్గా పట్టుబడ్డాడు.
ఆ సంస్థ ఉన్నతాధికారుల, సహోద్యోగులు వారిని లైంగికంగా, మానసికంగా, మతం పేరుతో వేధించడంతోపాటు కొందరిపై అత్యాచారానికి పాల్పడ్డారు. గత నాలుగేళ్లుగా తాము లైంగిక, మానసిక వేధింపులతోపాటు, మతరపరంగా, వ్యక్తిగతంగా దూషణలు ఎదుర్కొన్నట్లు నాసిక్లోని ఆ ఎంఎన్సీలో పని చేసే పలువురు మహిళా ఉద్యోగులు ఆరోపించారు.
మత మార్పడికి బలవంతం చేశారని, బలవంతంగా మాంసాహారం తినిపించారని కొందరు, ఒక సహోద్యోగి పెళ్లి పేరుతో లోబర్చుకుని అత్యాచారం చేశాడని మరో మహిళ ఆరోపించారు. టీమ్ లీడర్లు, హెచ్ఆర్ ఉద్యోగితో సహా ఆరుగురిపై తొమ్మిది మంది బాధితులు ఫిర్యాదు చేశారు. మరోవైపు మహిళా సిబ్బందిపై వేధింపులకు సంబంధించి గత నాలుగేళ్లలో పలు పోలీస్ స్టేషన్లలో 9 కేసులు నమోదయ్యాయి.
దీంతో వీటిపై దర్యాప్తు కోసం ప్రత్యేక దర్యాప్తు బృందం (సిట్) ఏర్పాటు చేశారు. ఏడుగురు మహిళా పోలీసులు మారువేషంలో నాసిక్లోని ఆ సంస్థలోకి ప్రవేశించారు. మహిళా ఉద్యోగులు ఎదుర్కొంటున్న లైంగిక వేధింపులు, అనుచిత ప్రవర్తనను ప్రత్యక్షంగా చూశారు. కొందరు వ్యక్తులను రెడ్ హ్యాండెడ్గా పట్టుకున్నారు. నిందితుడికి వ్యతిరేకంగా పక్కా ఆధారాలు సేకరించేందుకు పోలీసులు ప్రస్తుతం 40కి పైగా సీసీటీవీ ఫుటేజ్ క్లిప్లను పరిశీలిస్తున్నారు.
ఫిర్యాదులు చేస్తున్న మహిళలు సాధారణంగా 18 నుంచి 25 ఏళ్ల మధ్య వయస్సు గలవారని సమాచారం. ఈ కేసులో తొమ్మిది ఎఫ్ఐఆర్లు దాఖలయ్యాయి. వాటిలో లైంగిక వేధింపులు, పెళ్లి చేసుకుంటానని వాగ్దానం చేసి పదేపదే శారీరక సంబంధాలు పెట్టుకోవడం, మత మార్పిడికి ప్రయత్నించడం, ఉద్యోగులను నమాజ్ చేయమని, మాంసాహారం తినమని బలవంతం చేయడంతో సహా మతపరమైన అవమానాలకు పాల్పడటం వంటి ఆరోపణలు ఉన్నాయి.
“ఈ సంఘటనల గురించి ఫిర్యాదుదారురాలు కంపెనీ అధిపతికి పదేపదే మౌఖికంగా ఫిర్యాదు చేసినప్పటికీ, అతను ఆమె వేధింపుల ఫిర్యాదులను పట్టించుకోలేదు. దానికి బదులుగా, వారి చర్యలకు పరోక్షంగా సహకరించాడు,” అని పోలీసులు ఒక ప్రకటనలో తెలిపారు.
కేసు 1 (జూలై 2022 – ఫిబ్రవరి 2026)
నిందితులు – డానిష్ షేక్, తౌసిఫ్ అత్తర్, నిదా ఖాన్ – హిందూ దేవతల గురించి అవమానకరమైన వ్యాఖ్యలు చేసి ఒక మహిళా ఉద్యోగిని మతపరమైన మనోభావాలను దెబ్బతీశారని ఆరోపణలు ఉన్నాయి. నిందితుడు, తౌసిఫ్ అత్తర్, పెళ్లి చేసుకుంటానని తప్పుడు సాకుతో బాధితురాలితో శారీరక సంబంధం పెట్టుకోగా, డానిష్ షేక్ ఆఫీస్ లాబీలో ఆమెతో అసభ్యకరమైన చర్యలకు పాల్పడి ఆమె పరువుకు భంగం కలిగించడానికి ప్రయత్నించాడు.
కేసు 2 (మే 2023 – మార్చి 19, 2026)
నిందితులు – రజా మెమన్, షారుఖ్ ఖురేషి – ఒక మహిళా ఉద్యోగినిని కామంతో చూడటం, ఆమెను అనుచితంగా తాకడం, ఆమె వ్యక్తిగత వైవాహిక జీవితం గురించి అవమానకరమైన వ్యాఖ్యలు చేయడం వంటి ఆరోపణలు ఎదుర్కొంటున్నారు. అధికారికంగా ఫిర్యాదు చేసినప్పటికీ, కంపెనీ హెడ్ ఆఫీసర్ చర్య తీసుకోవడానికి బదులుగా, నిందితులను ప్రోత్సహించారని ఆరోపణలు ఉన్నాయి.
కేసు 3 (2022 – ఫిబ్రవరి 2026)
నిందితుడు షఫీ షేక్, బాధితురాలిని అసభ్యకరమైన రీతిలో తేరిపార చూశాడని, సమావేశాల సమయంలో ఆమెను ఎగతాళికి గురిచేశాడని ఆరోపణలు ఉన్నాయి. ఇంతలో, తౌసిఫ్ బాధితురాలి వైవాహిక జీవితంలో పిల్లలు లేకపోవడం గురించి అత్యంత సిగ్గుచేటైన వ్యాఖ్యలు చేశాడు. అంతేకాక ఆమెతో శారీరక సాన్నిహిత్యం పెంచుకోవడానికి ప్రయత్నించి ఆమెను అవమానించాడు.
కేసు 4 (మే 4, 2025 – డిసెంబర్ 2025)
నిందితుడు తౌసిఫ్ అత్తర్, బాధితురాలి వ్యక్తిగత జీవితం గురించి అసభ్యకరమైన ప్రశ్నలు అడిగాడు. అసభ్యకరమైన హావభావాలు ప్రదర్శించాడు. అంతేకాకుండా, కార్యాలయంలో ఇతర హిందూ మహిళా ఉద్యోగుల సమక్షంలో హిందూ దేవుళ్ల గురించి అవమానకరమైన వ్యాఖ్యలు చేయడం ద్వారా అతను మతపరమైన మనోభావాలను దెబ్బతీశాడు.
ఐదవ సంఘటన (2022 – మార్చి 23, 2026)
నిందితులు – తౌసిఫ్ అత్తర్, డానిష్, షారుఖ్ షేక్, రజా మెమన్ – బాధితురాలి మతాన్ని అవమానించారు. ఆమెను నమాజ్ చేయమని బలవంతం చేశారు. ఆమెకు బలవంతంగా మాంసాహారం తినిపించడం ద్వారా ఆమె మతమార్పిడికి ప్రయత్నాలు జరిగాయి. అంతేకాక ఒక నిర్దిష్ట మతానికి చెందిన మహిళల పట్ల అసభ్యకరమైన భాష ఉపయోగించారు.
ఆరవ సంఘటన (సెప్టెంబర్ 6, 2024 – ఫిబ్రవరి 2026)
నిందితులు – ఆసిఫ్ అన్సారీ, షఫీ షేక్ – ఆ మహిళా ఉద్యోగి శరీరం గురించి అసభ్యకరమైన వ్యాఖ్యలు చేశారు. ఉద్దేశపూర్వకంగా ఆమెను అనుచితంగా తాకారు. ఈ సంఘటనలో కూడా, నిందితుడు తౌసిఫ్ అత్తర్ బాధితురాలి మతానికి సంబంధించిన దేవుళ్ల పట్ల అవమానకరమైన భాషను ఉపయోగించాడు.
ఏడవ సంఘటన (2025 – మార్చి 2026)
నిందితులు – ఆసిఫ్ అన్సారీ, షారుఖ్ ఖురేషి, రజా మెమన్, తౌసిఫ్ అత్తర్, షఫీ షేక్ – బాధితురాలిని వెంబడించడం, అసభ్యకరమైన వ్యాఖ్యలు చేయడం, దురుద్దేశంతో ఆమెను తాకడం వంటి ఆరోపణలను ఎదుర్కొంటున్నారు. వీరందరూ కుమ్మక్కై, బాధితురాలి మతం పట్ల దూషణాత్మక భాషను ఉపయోగించడం ద్వారా అక్కడి వాతావరణాన్ని కలుషితం చేయడానికి ప్రయత్నించారు.
ఎనిమిదవ సంఘటన (జనవరి 2025 – ప్రస్తుతం)
నిందితులు – రజా మెమన్, షఫీ షేక్ – బాధితురాలి ఇష్టానికి విరుద్ధంగా ఆమెతో శారీరక సాన్నిహిత్యం పెంచుకోవడానికి ప్రయత్నించారు. నిందితుడు షఫీ బలవంతంగా ఆమెకు తన ప్రేమను వ్యక్తం చేయగా, రజా మెమన్ ఆమె శరీరం గురించి అసభ్యకరమైన వ్యాఖ్యలు చేస్తూ, ఆమెను అనుచితంగా తాకడానికి ప్రయత్నించాడు.
తొమ్మిదవ సంఘటన (జనవరి 2026 – ఏప్రిల్ 1, 2026)
నిందితులు — రజా మెమన్, షారుఖ్ ఖురేషి — బాధితురాలితో అసభ్యకరమైన సంభాషణలకు దిగి, అసభ్య చేష్టలకు పాల్పడ్డారు. బాధితురాలు నిరాకరించినప్పటికీ, వారు ఆమె వ్యక్తిగత జీవితంలోకి చొరబడటం కొనసాగించారు. ఆమెపై నిఘా ఉంచారు. ఆమె శరీరం గురించి అసభ్యకరమైన వ్యాఖ్యలు చేస్తూ, ఆమెను మానసిక, శారీరక వేధింపులకు గురిచేశారు.
నిందితులలో ఐదుగురిని మంగళవారం అరెస్టు చేసి, మరుసటి రోజు స్థానిక కోర్టులో హాజరుపరిచారు. వారికి ఏప్రిల్ 10 వరకు పోలీసు కస్టడీ విధించారు. నిందితులలో ఒకరు జ్యుడీషియల్ కస్టడీలో ఉన్నారు. అరెస్టు అయిన ఏడవ వ్యక్తి హెచ్ఆర్ విభాగానికి చెందిన మహిళ. లైంగిక వేధింపుల నివారణకు సంబంధించిన నిబంధనల ప్రకారం చర్యలు తీసుకోవడంలో విఫలమైనట్లు ఆమెపై ఆరోపణలు ఉన్నాయి.
పోలీస్ కమిషనర్ సందీప్ కర్ణిక్ ఆదేశాల మేరకు, ఈ కేసుల దర్యాప్తు కోసం ఏసీపీ (క్రైమ్) సందీప్ మిట్కే నేతృత్వంలో ఒక ప్రత్యేక దర్యాప్తు బృందాన్ని (ఎస్ఐటీ) ఏర్పాటు చేసినట్లు తెలిపారు. ఈ పద్ధతిలో పెద్ద ఎత్తున రాకెట్ పనిచేస్తోందా? అనే కోణంలో కూడా ఈ బృందం దర్యాప్తు చేస్తోంది. వేధింపులకు గురైన ఇతర మహిళలు ముందుకు రావాలని, వాట్సాప్ ద్వారా తమను సంప్రదించమని పోలీసులు కోరారు.
More Stories
యుపి ఎస్ఐఆర్ లో 84 లక్షల మంది పెరిగిన ఓటర్లు!
యుద్ధాన్ని వ్యాపారంగా మార్చుకున్న వైట్హౌస్
సామాజిక విప్లవకారుడు మహాత్మా జ్యోతి రావు ఫూలే