దేశంలో గ్యాస్ సరఫరా పరిస్థితిని సమీక్షించేందుకు, వాణిజ్య ఎల్పీజీ సరఫరాలో అంతరాయం కారణంగా సంక్షోభాన్ని ఎదుర్కొంటున్న ఆతిథ్య రంగ సమస్యలను పరిష్కరించేందుకు ముగ్గురు సభ్యుల కమిటీని కేంద్రం నియమించింది. ఈ కమిటీ సరఫరాలో ఏర్పడిన అంతరాయం తీవ్రతను అంచనావేసి హోటల్‌, రెస్టారెంట్‌ అసోసియేషన్లతో చర్చలు జరుపుతుంది.

అసలైన వాణిజ్య వినియోగదారుల అవసరాలను తీర్చేందుకు తగిన చర్యలు తీసుకుంటుందని సంబంధిత వర్గాలు తెలిపాయి. ఈ కమిటీలో ఇండియన్‌ ఆయిల్‌ కార్పొరేషన్‌(ఐఓసీ), భారత్‌ పెట్రోలియం కార్పొరేషన్‌(బీపీసీఎల్‌), హిందుస్థాన్‌ పెట్రోలియం కార్పొరేషన్‌(హెచ్‌పీసీఎల్‌)కు చెందిన ఎగ్జిక్యూటివ్‌ డైరెక్టర్లు సభ్యులుగా ఉంటారు. కాగా, ఎల్పీజీ అక్రమ నిల్వ, అవకతవకలను నివారించడానికి అదనంగా పాలనాపరమైన చర్యలు చేపట్టినట్లు ప్రభుత్వ వర్గాలు తెలిపాయి.

ప్రస్తుతం దేశంలో గృహ అవసరాలకు ఉపయోగించే వంట గ్యాస్ సరఫరాకే కేంద్ర ప్రభుత్వం అత్యధిక ప్రాధాన్యం ఇస్తోంది. గ్లోబల్ ఇంధన సరఫరాలో ఏర్పడిన అంతరాయం కారణంగా గ్యాస్ వినియోగంపై నియంత్రణ అవసరమైందని ప్రభుత్వం చెబుతోంది. దీనివల్ల మార్కెట్ ధరలకు అందించే వాణిజ్య ఎల్‌పీజీ సిలిండర్ల సరఫరా కొన్ని నగరాల్లో తీవ్రంగా తగ్గింది.

8 రాష్ట్రాల్లో వాణిజ్య ఎల్పీజీ సరఫరాపై తాత్కాలిక నిషేధం

మధ్యప్రదేశ్‌, రాజస్థాన్‌, మహారాష్ట్ర, ఉత్తరప్రదేశ్‌, ఛత్తీస్‌గఢ్‌, ఢిల్లీ సహా అనేక రాష్ర్టాల్లో వాణిజ్య ఎల్పీజీ సరఫరాపై తాత్కాలిక నిషేధం అమలులోకి వచ్చింది. ఈ నిషేధంతో అనేక నగరాల్లోని రెస్టారెంట్లు, హోటళ్లు మూతపడగా సరఫరాను పునరుద్ధరించాలంటూ హోటల్‌ యజమానులు ప్రభుత్వాన్ని వేడుకున్నారు.

 సరఫరా సంక్షోభం కొనసాగితే మనం తినే మసాలా దోస నుంచి మిరపకాయ బజ్జీ దాకా ఆహార పదార్థాలన్నీ ఖరీదైనవిగా మారిపోయే అవకాశం ఉంది. ఇప్పటికీ చాలా రెస్టారెంట్లలో పీఎన్‌జీ కనెక్షన్లు లేదా విద్యుత్తు వంట వ్యవస్థలు వంటి ప్రత్యామ్నాయ ఏర్పాట్లు లేవు.  చమురు సరఫరాపై దేశ ప్రజల్లో ఆందోళన అవసరం లేదని కేంద్ర ప్రభుత్వ వర్గాలు అంటున్నాయి. దేశీయ అవసరాలకు తగ్గట్లుగా చమురును 40 దేశాల నుంచి దిగుమతి చేసుకుంటున్నట్లు ప్రభుత్వం తెలిపింది. 

గతంలో 27 దేశాల నుంచే చమురును కొనుగోలు చేయగా, ప్రస్తుత పరిస్థితుల నేపథ్యంలో 40 దేశాల నుంచి చమురు దిగుమతి చేసుకుంటున్నట్లు కేంద్రం వెల్లడించింది.  ఈ అంశంపై ఇప్పటికే చమురు సరఫరా దేశాలతో కేంద్ర పెట్రోలియం శాఖ మంత్రి హర్దీప్ సింగ్ పూరి సంప్రదింపులు జరిపినట్లు సంబంధిత వర్గాలు తెలిపాయి. వీలైనంత త్వరగా చమరు సరఫరా చేయాలని కోరినట్లు సమాచారం. కొన్ని దేశాలు ఇప్పటికే సరఫరా మొదలుపెట్టినట్లు తెలుస్తోంది.

మరోవైపు, పరిశ్రమల నుంచి గ్యాస్‌ను మళ్లించడం ద్వారా ప్రజలకు గ్యాస్ కొరత ఏర్పడకుండా చర్యలు తీసుకుంటున్నారు. గతంలో ఇరవై ఒక్క రోజుల తర్వాత బుకింగ్‌లు జరిగేవి, ఇప్పుడు25 రోజులకు పొడిగిస్తూ కేంద్రం నిర్ణయం తీసుకుంది. అలానే ఎల్పీజీ ఉత్పత్తిని 10 శాతం పెరిగిందని కేంద్ర వర్గాలు తెలిపాయి.