20 శాతం ఇథనాల్‌ కలిపిన ఈ20 పెట్రోల్‌పై వస్తున్న విమర్శల డబ్బులు తీసుకున్న వ్యక్తులు ఉన్నారని కేంద్ర రోడ్డు రవాణా, రహదారుల శాఖ మంత్రి నితిన్‌ గడ్కరీ ఆరోపించారు. భారత పరిశ్రమల సమాఖ్య (సీఐఐ) నిర్వహించిన కార్యక్రమంలో మంగళవారం ఆయన పాల్గొంటూ సుమారు మూడు నెలల క్రితం ఈ20 పెట్రోల్‌పై తీవ్ర వ్యతిరేకత వ్యక్తమైందని, ప్రస్తుతం ఆ ఆందోళనలు తగ్గాయని పేర్కొన్నారు.
పెట్రోల్‌లో 20 శాతం ఇథనాల్‌ను కలిపి తయారు చేసే ఇంధనాన్ని ఈ20గా పిలుస్తారు. ఈ ఏడాది ఏప్రిల్‌లో దేశవ్యాప్తంగా పెట్రోల్‌ పంపుల్లో ఈ20ని ప్రామాణిక ఇంధనంగా అందుబాటులోకి తీసుకురావాలన్న ప్రభుత్వ నిర్ణయంపై విమర్శలు వెల్లువెత్తాయి. ముఖ్యంగా వాహనదారులు తమ వాహనాల మైలేజీ తగ్గుతుందేమోనని, పాత వాహనాల ఇంజిన్లకు ఈ ఇంధనం అనుకూలంగా ఉంటుందా? అని ఆందోళన వ్యక్తం చేశారు.
ఈ అంశంపై ప్రతిపక్ష నాయకులు కూడా ప్రభుత్వ నిర్ణయాన్ని ప్రశ్నించారు. ఇదిలా ఉండగా, 100 శాతం వరకు ఇథనాల్‌ కలిగిన ఇంధనంతో నడిచే సామర్థ్యం ఉన్న ఫ్లెక్స్‌ ఫ్యూయల్‌ వాహనాలకు అనుమతించేలా కేంద్ర ప్రభుత్వం కీలక నిర్ణయం తీసుకుంది. ఈ మేరకు సెంట్రల్‌ మోటార్‌ వెహికల్స్‌ రూల్స్‌–1989లో మార్పులు చేస్తూ సోమవారం నోటిఫికేషన్‌ విడుదల చేసింది.
ఫ్లెక్స్‌ ఫ్యూయల్‌ వాహనాలు పెట్రోల్‌తో పాటు వివిధ నిష్పత్తుల్లో ఇథనాల్‌ కలిపిన ఇంధనంతోనూ నడిచేలా రూపొందిస్తారు. ఈ వాహనాల వినియోగాన్ని ప్రోత్సహించడం ద్వారా ప్రత్యామ్నాయ ఇంధనాల వినియోగం పెరుగుతుందని ప్రభుత్వం భావిస్తోంది. భారత్‌ విదేశాల నుంచి దిగుమతి చేసుకునే ముడి చమురు, ఇతర శిలాజ ఇంధనాలపై ఆధారపడటాన్ని తగ్గించేందుకు ఇథనాల్‌ వినియోగాన్ని పెంచాలని గడ్కరీ చాలాకాలంగా చెబుతున్నారు.
దేశీయంగా ఉత్పత్తి చేసే ఇథనాల్‌ను ఇంధనంలో కలపడం ద్వారా పెట్రోల్‌ దిగుమతులపై ఆధారపడటాన్ని తగ్గించవచ్చని ఆయన అభిప్రాయపడుతున్నారు. దీనివల్ల విదేశీ మారకద్రవ్యం ఆదా కావడంతో పాటు ప్రత్యామ్నాయ ఇంధన రంగానికి ప్రోత్సాహం లభిస్తుందని పేర్కొంటున్నారు. ఈ20 పెట్రోల్‌ వినియోగంపై వాహనదారుల్లో నెలకొన్న సందేహాలు ఇప్పటికీ చర్చనీయాంశంగానే ఉన్నాయి.
ఈ ఇంధనం వల్ల ఇంజిన్‌ లోహ భాగాలకు గణనీయమైన నష్టం వాటిల్లదని ప్రభుత్వం, ఆటోమొబైల్‌ పరిశ్రమకు చెందిన కొన్ని అధ్యయనాలను ప్రస్తావించాయి. అయితే, వాహనం తయారీ విధానం, మోడల్‌, ఇంధనానికి అనుకూలతను బట్టి మైలేజీ, పనితీరులో మార్పులు ఉండవచ్చని కూడా పేర్కొన్నాయి. మరోవైపు, వాహనాల మైలేజీ, పాత వాహనాలకు ఈ ఇంధనం అనుకూలత వంటి అంశాలపై వాహనదారులు వ్యక్తం చేసిన ఆందోళనలు ఈ వివాదంలో ప్రధానంగా నిలిచాయి.
About The Author
More Stories
గోప్యత చట్టాన్ని సవాల్ చేసిన అంబానీ, అదానీల మీడియా గ్రూప్ లు
‘మేధో నక్సల్స్’, ‘బొద్దింకల’ లను ఓడించేందుకు ప్రధాని మోదీకి అండగా
ప్రభాస్ ‘ఫౌజీ’ టీజర్ పై నేతాజీ కుటుంభం సభ్యుల ఆగ్రహం