గత వారాంతంలో ఒక హిందూ దేవాలయంలో సామూహిక కాల్పుల కుట్రను అమలు చేయడానికి ముందు అరెస్టుకు గురైన చికాగో శివారు ప్రాంతానికి చెందిన ఒక యువకుడు, రెండు సంవత్సరాలకు పైగా ఈ దాడికి ప్రణాళిక వేస్తున్నాడని కోర్టు పత్రాల ప్రకారం తెలుస్తోంది. కుక్ కౌంటీ స్టేట్ అటార్నీ కార్యాలయానికి చెందిన ప్రాసిక్యూటర్లు, నిందితుడు, 19 ఏళ్ల అలెగ్జాండ్రోస్ పాపరాకిస్, పాలటైన్‌లోని టాకో బెల్‌లో తన సహోద్యోగులతో “భారతీయ ప్రజలను చంపడానికి నేను ఆగలేకపోతున్నాను” అని చెప్పినట్లు తెలిపారు.
పాపరాకిస్ హత్య కుట్రకు ఉద్దేశించిన కచ్చితమైన ప్రదేశంపై ఇంకా దర్యాప్తు జరుగుతున్నప్పటికీ, ఇల్లినాయిస్‌లోని పాలటైన్ పోలీసు అధికారులు, ఎఫ్బిఐ దర్యాప్తుదారులు, ఆ యువకుడు చికాగోకు పశ్చిమాన సుమారు 40 మైళ్ల దూరంలో ఉన్న అరోరాలోని ఒక పెద్ద హిందూ దేవాలయంపై దాడికి ప్రణాళిక వేస్తున్నాడని తాము విశ్వసిస్తున్నట్లు తెలిపారు.
జామ్ అయిన తుపాకీ దాడిని ఎలా ఆపింది?
పాపరాకిస్ పేరు మీద రిజిస్టర్ చేసిన ఎరుపు రంగు అకురా ఆర్డీఎక్స్ కారు ఆదివారం మధ్యాహ్నం 12:25 గంటల ప్రాంతంలో ఒక దేవాలయం పార్కింగ్ స్థలంలోకి ప్రవేశించి, 15 నిమిషాల లోపే బయటకు వెళ్లిపోయిందని పాలటైన్ పోలీస్ చీఫ్ విలియం నార్డ్ తెలిపారు. మధ్యాహ్నం 2 గంటల ప్రాంతంలో మరొక శివారు ప్రాంతంలోని తన ఇంటి దగ్గర అతను కారులో ఒంటరిగా కనిపించాడు.
అధికారులు లక్ష్యం పేరును వెల్లడించలేదు, కానీ ఆ ప్రాంతంలోని అతిపెద్ద ఆలయమైన అరోరాలోని శ్రీ వెంకటేశ్వర స్వామి (బాలాజీ) ఆలయం, తరువాత తమ వెబ్‌సైట్‌లో ఒక ప్రకటన ద్వారా తమ సభ్యులకు భద్రతా ముప్పు గురించి తెలియజేసింది. ఆలయంలోని ఒక రిసెప్షనిస్ట్ (తన పేరు వెల్లడించలేదు) న్యూయార్క్ టైమ్స్‌కు ఫోన్‌లో మాట్లాడుతూ, విఫలమైన ఆ దాడి జరిగిన ప్రదేశం నిజంగానే తమ ఆలయమేనని చెప్పారు.
ఆ అమెరికన్ యువకుడి సహచరులలో ఒకరు అతని గురించి పోలీసులకు ఫిర్యాదు చేయడంతో, అతని రక్తపాత ప్రణాళికలు సకాలంలో విఫలమయ్యాయి. ఆ తర్వాత, మౌంట్ ప్రాస్పెక్ట్, పాలటైన్ పోలీస్ విభాగాలు సమన్వయం చేసుకుని, ఆదివారం మధ్యాహ్నం పాపరాకిస్ తన ఇంటి నుండి బయలుదేరుతుండగా గుర్తించి అరెస్టు చేశాయి. అదే రోజు అతను తన ప్రణాళికలను అమలు చేయాలని భావించాడని ప్రాసిక్యూటర్లు నమ్ముతున్నారు.
శ్వేతజాతి ఆధిపత్య భావజాలం
దాదాపు ఏడాదిగా తన తల్లితో కలిసి నివసిస్తున్న అతని ఇంట్లో సోదాలు నిర్వహించగా, పోలీసులకు ఒక రైఫిల్, తూటాలతో నింపిన అనేక రైఫిల్ మ్యాగజైన్లు, వందలాది అదనపు తూటాలు, శరీర రక్షణ కవచం ఉన్న ఒక టాక్టికల్ జాకెట్, శ్వేతజాతి ఆధిపత్య తీవ్రవాదానికి సంబంధించిన చిహ్నాలు ఉన్న ఒక ప్యాచ్ లభించాయని అధికారులు తెలిపారు. అతని ఇంట్లో స్వస్తిక్ చిహ్నాలతో సహా నాజీ చిహ్నాలు ఉన్న వస్తువులు, ‘జీత్ రిమూవర్’ అనే భారతీయ వ్యతిరేక దూషణతో కూడిన లేబుల్ ఉన్న ఒక గ్యాస్ క్యాన్ కూడా దొరికాయి.
ఒక కోర్టు పత్రం ప్రకారం, డిటెక్టివ్‌లు అతని ఎలక్ట్రానిక్ కమ్యూనికేషన్‌లను, పాపరాకిస్‌కు ఆపాదించిన “నేను ఎందుకు పోరాడాను: అకా: (అరోరా షూటర్ మేనిఫెస్టో)” అనే పత్రాన్ని కూడా పరిశీలించారు. ఆ పత్రంలో భారతీయ, యూదు, ఆఫ్రికన్ అమెరికన్ ప్రజలను “నీచ మానవులు”గా వర్ణించడంతో పాటు, వారిలో వీలైనంత ఎక్కువ మందిని చంపడానికి పన్నిన కుట్రను కూడా వివరించారు.
పాపరాకిస్ తీవ్రవాద బెదిరింపులకు పాల్పడటం, చట్టవిరుద్ధంగా రైఫిల్‌ను కలిగి ఉండటం వంటి తీవ్రమైన నేరారోపణలను ఎదుర్కొంటున్నాడు. టాకో బెల్‌లో క్యాషియర్‌గా పనిచేస్తున్న పాపరాకిస్, శ్వేతజాతి ఆధిపత్య భావాలను, సామూహిక కాల్పుల కుట్రను వివరిస్తూ తన సహోద్యోగికి టెక్స్ట్ సందేశం పంపినట్లు ప్రాసిక్యూటర్లు తెలిపారు.
ప్రత్యేక దినం ప్రణాళిక
ఆదివారం “ప్రత్యేక దినం” అవుతుందని అతను వారికి చెప్పాడు. ఆదివారం నాడు, సంఘటనా స్థలంలో తన తుపాకీ జామ్ అయిందని, అందుకే తాను పారిపోతున్నానని చెప్పడానికి అతను తన సహోద్యోగికి ఫోన్ చేసినట్లు పత్రాలు పేర్కొన్నాయి. అతను తన ఏఆర్-శైలి రైఫిల్ పేలడంలో విఫలమైన విధానాన్ని చూపిస్తూ ఒక వీడియోను తన సహోద్యోగికి పంపినట్లు కూడా సమాచారం.
తాను “మళ్లీ ప్రయత్నించడానికి” ఆయుధాన్ని సరిచేయడానికి ప్రయత్నిస్తున్నానని, “తాను కాల్చిన వ్యక్తి ఈ రోజు తన దేవుని దయ వల్ల ఖచ్చితంగా రక్షించబడ్డాడు” అని కూడా అతను చెప్పినట్లు కోర్టు పత్రం వెల్లడించింది. ప్రాసిక్యూటర్ల ప్రకారం, పాపరాకిస్ తన సహోద్యోగికి ఎనిమిది పేజీల పత్రాన్ని కూడా పంపాడు. అందులో అతను శ్వేతజాతేతరులను వర్ణించడానికి జాతిపరమైన దూషణలను ఉపయోగించాడు. వారిలో వీలైనంత ఎక్కువ మందిని చంపడానికి ఒక కుట్రను వివరించాడు. అతను తనను తాను శ్వేతజాత్యహంకారిగా, సామూహిక హత్యల గురించి కలలు కనే ఒక నియో-నాజీగా కూడా అభివర్ణించుకున్నాడు.
సహోద్యోగి 911కి ఫోన్ చేయడంతో అనుమానితుడి అరెస్టు
కోర్టు పత్రాల ప్రకారం, శనివారం నాడు పాపరాకిస్ ప్రవర్తన మరింత తీవ్రమైందని అతని సహోద్యోగులు తెలిపారు. అతను ఒక సహోద్యోగితో, “భారతీయ ప్రజలను చంపడానికి నేను ఆగలేకపోతున్నాను” అని చెప్పాడని, మరొక సహోద్యోగితో అరోరాలోని ఒక హిందూ దేవాలయంలో “ఆ పని” చేయడానికి ప్రణాళిక వేస్తున్నానని చెప్పాడని ఆ పత్రాలు వెల్లడించాయి. పాపరాకిస్ తాను రెండేళ్లుగా దాడికి ప్రణాళిక రచిస్తున్నానని, ఇటీవలి నెలల్లో ఒక నిర్దిష్ట ప్రదేశం కోసం వెతుకుతున్నానని తన సహోద్యోగికి లేఖ రాసినట్లు కూడా సమాచారం.
నిందితుడు తన ‘ఉద్యోగం చేస్తున్న కళాశాల విద్యార్థి అనే వ్యక్తిత్వం, తనలోని ద్వేషాన్ని, సామూహిక హత్యల గురించిన తరచు ఊహలను దాచిపెట్టే ఒక ముసుగు’ అని వర్ణించినట్లు కోర్టు పత్రాలు చూపించాయి.
‘జాతి వివక్ష, హిందూ వ్యతిరేక చర్య’గా అభివర్ణించిన భారత్
డొనాల్డ్ ట్రంప్ పరిపాలనలో అమెరికాలో దక్షిణాసియా ప్రజలపై, ముఖ్యంగా భారతీయులపై శారీరక, దూషణల దాడులు పెరిగాయన్న ఆందోళనలకు పాపరాకిస్ అరెస్టు మరింత ఆజ్యం పోసింది. ఈ నెల ప్రారంభంలో, క్లీవ్‌ల్యాండ్ వెలుపల ఒక హిందూ దేవాలయం కిటికీలోంచి గుర్తు తెలియని దుండగుడు ఇటుక విసిరి ధ్వంసం చేశాడు. సెప్టెంబర్‌లో, కొంతమంది వలసదారులను స్వచ్ఛందంగా దేశం విడిచి వెళ్ళిపోవాలని కోరుతూ ఒక సిక్కు వ్యక్తి చిత్రంతో కూడిన సందేశాన్ని సోషల్ మీడియాలో పోస్ట్ చేసిన తర్వాత హోంల్యాండ్ సెక్యూరిటీ విభాగం విమర్శల పాలైంది. ఆ చిత్రాన్ని అప్పటి నుండి తొలగించారు, కానీ ఆ పోస్ట్‌పై వచ్చిన విమర్శలను ఆ విభాగం “అర్థంలేని చెత్త” అని కొట్టివేసింది.
ఈ కుట్రను ‘జాతి వివక్ష, హిందూ వ్యతిరేక చర్య’గా అభివర్ణించిన భారత విదేశాంగ శాఖ ఇది ఎంతో ఆందోలనకు గురిచేస్తోందని పేర్కొంది. ఇల్లినాయిస్‌లోని అరోరా ప్రాంతంలో ఉన్న హిందూ ఆలయంపై దాడికి కుట్ర పన్నాడనే ఆరోపణలతో పాలటైన్‌కు చెందిన అలెగ్జాండ్రోస్ పాపోరాకిస్ అనే 19 ఏళ్ల యువకుడిని అమెరికా పోలీసులు అరెస్ట్ చేశారు. ‘‘ఇల్లినాయిస్‌లోని అరోరా ప్రాంతంలో ఉన్న హిందూ దేవాలయాన్ని లక్ష్యంగా చేసుకుని దాడులకు పన్నిన కుట్ర నివేదికలపై మేము తీవ్ర ఆందోళన చెందుతున్నాం. భారత సంతతికి చెందిన ప్రజలపై హింసకు ప్రేరేపించేలా ఉన్న ఈ కుట్రలోని హిందూ వ్యతిరేక, జాతి వివక్ష కోణాలు అత్యంత దిగ్భ్రాంతికరం’’ అని విదేశాంగ శాఖ అధికార ప్రతినిధి రణధీర్ జైస్వాల్ తెలిపారు. ‘
‘ఈ వ్యవహారంలో అనుమానితుడిని అరెస్ట్ చేయడం, చట్టపరమైన కేసులు నమోదు చేయడం సహా అమెరికా చట్ట అమలు సంస్థలు తీసుకున్న చర్యలను మేము గమనించాం’’ అని జైస్వాల్ పేర్కొన్నారు. అమెరికాలో పెరుగుతున్న జాతి వివక్ష, భారత్ పట్ల వ్యక్తమవుతున్న ద్వేషపూరిత ధోరణులపై ఆందోళన వ్యక్తం చేస్తూ ఇటువంటి ఘటనల పట్ల కఠిన చర్యలు తీసుకోవాలని భారత్ పిలుపునిచ్చింది.
‘‘ఈ ఘటన అమెరికాలో పెరుగుతున్న జాతి విద్వేషం, భారత్ వ్యతిరేక ధోరణులపై మరింత ఆందోళన కలిగిస్తోంది. భారతీయ సమాజ భద్రత, రక్షణను నిర్ధారించడానికి మరింత జాగ్రత్త వహించడం, ద్వేషపూరిత హింసపై కఠినంగా వ్యవహరించడం, నిర్ణయాత్మక చర్యలు తీసుకోవడం చాలా అవసరం’’ అని జైస్వాల్ స్పష్టం చేశారు. అమెరికా అధికారులు ఈ వ్యవహారంపై సమగ్ర విచారణ జరిపి న్యాయం చేస్తారని విదేశాంగ శాఖ ప్రకటన ఆశాభావం వ్యక్తం చేసింది. ‘‘అమెరికా అధికారులు ఈ అంశాన్ని సమగ్రంగా విచారించి, బాధ్యులను చట్టం ముందు నిలబెడతారని, ఇటువంటి ఘటనలు పునరావృతం కాకుండా అవసరమైన అన్ని చర్యలు తీసుకుంటారని మేము భావిస్తున్నాం’’ అని పేర్కొన్నారు.
About The Author
More Stories
టెండర్లు, బిల్లులు పొందాలంటే సీఎంకు 15 శాతం కమీషన్‌
నేహా బోరా ‘బంగ్లాదేశ్ మార్గం చూపింది’ వ్యాఖ్యలపై దుమారం
లక్షల కోట్ల రూ. భూకుంభకోణాలపై జ్యుడీషియల్ లేదా సీబీఐ విచారణ