జాతీయ సామాజిక సహాయ కార్యక్రమం ఐదేళ్లు పొడిగింపు

* దివ్యంగా ఫించన్ల అర్హత విస్తరింపు

కేంద్ర మంత్రివర్గం బుధవారం నాడు, జాతీయ సామాజిక సహాయ కార్యక్రమాన్ని (నేషనల్ సోషల్ అసిస్టెన్స్ ప్రోగ్రామ్) 2026-27 నుండి 2030-31 వరకు ఐదేళ్లపాటు కొనసాగించడానికి రూ.53,428 కోట్ల కేటాయింపుతో ఆమోదం తెలిపింది. అదే సమయంలో దివ్యాంగ పింఛను అర్హతను విస్తరిస్తూ, సహాయాన్ని కూడా పెంచింది. ఈ కార్యక్రమానికి ‘ప్రధాన మంత్రి సామాజిక సహాయ యోజన’గా పేరు మార్చనున్నారు.

ప్రధానమంత్రి నరేంద్ర మోదీ అధ్యక్షతన జరిగిన మంత్రివర్గ సమావేశంలో తీసుకున్న ఈ నిర్ణయం వల్ల 36 రాష్ట్రాలు, కేంద్రపాలిత ప్రాంతాలలోని 3.20 కోట్ల మంది లబ్ధిదారులు ప్రయోజనం పొందుతారు. ‘ప్రధాన మంత్రి దివ్యాంగ పింఛను యోజన’గా పేరు మార్చిన ఈ పథకం కింద, 79 ఏళ్లలోపు వయస్సు ఉన్న లబ్ధిదారులకు సహాయం రూ. 375కు, 80 ఏళ్లు పైబడిన వారికి రూ. 625కు పెరుగుతుంది. అర్హత సాధించడానికి అవసరమైన వైకల్య పరిమితిని 80% నుండి ప్రామాణిక వైకల్య స్థాయి అయిన 40%కి తగ్గించారు.

సవరించిన కనీస వయస్సు ప్రమాణం ప్రకారం, అర్హత పుట్టినప్పటి నుంచే ప్రారంభమవుతుంది. అర్హత, లబ్ధిదారుల సంఖ్య, సహాయ రేట్లలో మార్పులకు సంబంధించిన మార్గదర్శకాలను మూడు నెలల్లోగా జారీ చేసి, అమలు చేయడం జరుగుతుంది. వృద్ధాప్య మరియు వితంతు పింఛను పథకాలు, అలాగే కుటుంబ ప్రయోజన పథకం కొత్త పేర్లతో ప్రస్తుత రూపంలోనే కొనసాగుతాయి.

ఇందిరా గాంధీ జాతీయ వృద్ధాప్య పింఛను పథకం, ప్రధాన్ మంత్రి వృద్ధావస్థ పింఛను యోజనగా మారనుండగా, ఇందిరా గాంధీ జాతీయ వితంతు పింఛను పథకం పేరును ప్రధాన్ మంత్రి విధవా పింఛను యోజనగా మార్చడం జరుగుతుంది. జాతీయ కుటుంబ ప్రయోజన పథకం, ప్రధాన్ మంత్రి పరివార్ లాభ్ యోజనగా మారనుంది. 1995 ఆగస్టు 15న ప్రారంభించిన జాతీయ సాంఘిక సహాయ కార్యక్రమం, రాజ్యాంగంలోని నిర్దేశక విధాన సూత్రాలలోని ఆర్టికల్ 41 ప్రకారం కేంద్రం బాధ్యతలను నెరవేర్చడంలో భాగంగా పేద కుటుంబాలకు సహాయం అందిస్తుంది.

దేశవ్యాప్తంగా సహాయం ఏకరీతిగా అందుబాటులో ఉండేలా చూసేందుకు ఇది 100% కేంద్ర సహాయాన్ని పొందుతుంది. వికలాంగుల హక్కుల చట్టం, 2016 ప్రకారం, వైకల్య పింఛను అర్హతను 40% ప్రామాణికానికి అనుసంధానించడం తప్పనిసరి అని ప్రభుత్వం తెలిపింది. అలాగే, ఇతర వర్గాల వారికి అందించే తులనాత్మక పథకాలతో పోలిస్తే, వైకల్య సంబంధిత సహాయం కనీసం 25% ఎక్కువగా ఉండాలని కూడా ఈ చట్టం నిర్దేశిస్తోంది.