22ఏపై దిగొచ్చిన ప్రభుత్వం…  భూముల రిజిస్ట్రేషన్లకు అనుమతి 

త్వరలోనే జీహెచ్‌ఎంసీ ఎన్నికలు జరుగనున్నాయి. సరిగ్గా ఈ సమయంలోనే 22ఏ నిషేధిత భూముల జాబితా వివాదం తెరపైకి వచ్చింది. దీంతో సర్కార్‌ గుండెల్లో గుబులు రేగింది. ఈ సమస్య ఇలాగే ఉంటే జీహెచ్‌ఎంసీ ఎన్నికల్లో ప్రజలు తిరస్కరించడం ఖాయమనే భయం అధికారపార్టీ నేతల్లో ఆవహించింది. ఫిరాయింపు ఎమ్మెల్యే దానం నాగేందర్‌పై వేటుపడటంతో ఖైరతాబాద్‌ ఉప ఎన్నిక అనివార్యమైంది. 

ఈ నేపథ్యంలో రంగారెడ్డి, జీహెచ్‌ఎంసీ పరిధిలోని మరికొంత మంది ఫిరాయింపు ఎమ్మెల్యేలపైనా వేటు తప్పదనే భయం పట్టుకుంది. ఈ నేపథ్యంలో ఎన్నికల భయంతో సర్కార్‌ ఈ నిర్ణయం తీసుకున్నట్టుగా తెలిసింది. మరోవైపు 22ఏ భూములకు సంబంధించి అక్రమాలు, నిబంధనల ఉల్లంఘనలపై సమగ్ర విచారణ చేపట్టేందుకు రేవంత్ రెడ్డి సర్కార్ ఒక ప్రత్యేక కమిటీని నియమించింది. 

టెక్నికల్‌ ఎడ్యుకేషన్‌ కమిషనర్‌ శ్రీదేవసేన ఛైర్‌పర్సన్‌గా వ్యవహరించే ఈ కమిటీలో రాజీవ్‌గాంధీ హనుమంతు, సందీప్‌కుమార్‌ ఝా, ఆయా జిల్లాల కలెక్టర్లు సభ్యులుగా ఉంటారు.  అయితే, ఈ విచారణ కేవలం 22ఏ భూములకే పరిమితం కాకుండా భూ అక్రమాలపై నిగ్గు తేల్చేందుకు ప్రభుత్వం కమిటీని నియమించిన్నట్లు,  రాష్ట్రంలోని వివిధ జిల్లాల్లో జరిగిన భూముల కొనుగోళ్లలో జరిగిన అక్రమాలపై, అంశాలపై సమగ్ర విచారణ కోసం ప్రత్యేకం గా ఈ కమిటీని ఏర్పాటు చేసిన్నట్లు తెలిపింది.