ఆల్ ఇండియా తృణమూల్ కాంగ్రెస్ (ఎఐటిఎసి) విషయంలో ఎన్నికల సంఘం జారీ చేసిన మధ్యంతర ఉత్తర్వులపై ప్రతిపక్ష నాయకుడు రాహుల్ గాంధీ చేసిన విమర్శలను కేంద్ర మంత్రి కిరణ్ రిజిజు శుక్రవారం తీవ్రంగా తిప్పికొట్టారు. ఇతరులను నాశనం చేసే అసలైన పార్టీ కాంగ్రెస్సేనని ఆయన ఆరోపించారు.
బీజేపీ, ఎన్నికల సంఘం కలిసి ప్రతిపక్ష పార్టీలను చీలుస్తున్నాయని రాహుల్ గాంధీ చేసిన ఆరోపణలపై స్పందిస్తూ రిజిజు ఇలా పేర్కొన్నారు: “రాహుల్ గాంధీ, కాంగ్రెస్ బీజేపీ గురించి ఏమైతే అంటున్నారో, వాస్తవానికి అవి వారి గురించి వారు చెప్పుకోవాల్సిన విషయాలు. కాంగ్రెస్ పార్టీ ఒక ‘భస్మాసురుడు’ లాంటిది. తమతో సంబంధం పెట్టుకున్న ఏ పార్టీనైనా అది బూడిద చేస్తుంది…”
“కాంగ్రెస్ పార్టీ నుండే టిఎంసి ఆవిర్భవించింది, ఎన్సీపీ కూడా కాంగ్రెస్ నుండే పుట్టింది. కాంగ్రెస్ మాపై ఆరోపణలు చేస్తోంది కానీ, వాస్తవానికి వారు కూడా మరో పార్టీ నుండే విడిపోయి వచ్చారు. కాబట్టి, ఇతర పార్టీలను విడదీసి నాశనం చేసేది కాంగ్రెస్సే…,” అని ఆయన పేర్కొన్నారు.
బీజేపీ జాతీయ అధికార ప్రతినిధి సుధాన్షు త్రివేది సైతం రాహుల్ గాంధీ వ్యాఖ్యలు ఆయనకు “తన సొంత పార్టీ గురించి ఏమీ తెలియదని” రుజువు చేస్తున్నాయని ఎద్దేవా చేశారు. త్రివేది ఇలా పేర్కొన్నారు: “రాహుల్ గాంధీకి దేశం గురించి ఏమీ తెలియదనే అభిప్రాయం ప్రజల్లో ఉంది. ఈ రోజు ఆయన చేసిన ఒక ట్వీట్, ఆయనకు తన సొంత పార్టీ గురించి కూడా ఏమీ తెలియదని సూచిస్తోంది. శివసేన, ఎన్సీపీ తర్వాత బీజేపీ టిఎంసిని కూడా అంతం చేస్తోందని ఆయన ఆరోపించారు. అయితే, ఈ పార్టీలు కాంగ్రెస్ నుండే విడిపోయి ఏర్పడ్డాయని నేను ఆయనకు చెప్పదలుచుకున్నాను…”
పశ్చిమ బెంగాల్ ఉప ఎన్నికల నేపథ్యంలో ఎఐటిఎంసి పేరు, ఎన్నికల గుర్తును స్తంభింపజేస్తూ ఎన్నికల సంఘం జారీ చేసిన మధ్యంతర ఉత్తర్వులను రాహుల్ గాంధీ అంతకుముందు విమర్శించారు. ‘‘ఓటు చోరీ.. ప్రభుత్వం చోరీ.. ఇప్పుడు పార్టీ చోరీ’’ అని విమర్శించారు. బీజేపీ, ఎన్నికల సంఘం కలిసి ప్రాంతీయ పార్టీలను విచ్ఛిన్నం చేస్తున్నాయని మండిపడ్డారు.
“మొదట శివసేన, తర్వాత ఎన్సీపీ, ఇప్పుడు తృణమూల్ కాంగ్రెస్. ప్రతిసారీ ఒకే తరహా విధానం కనిపిస్తుంది — బీజేపీ, ఎన్నికల సంఘం కలిసి ఒక పార్టీని చీలుస్తాయి. ఆ తర్వాత దాని ఎన్నికల గుర్తును లాగేసుకుంటారు. ఒక పార్టీనే పూర్తిగా దొంగిలించగలిగినప్పుడు, లక్షలాది మంది భారతీయుల ఓట్లను కూడా దొంగిలించడంలో ఆశ్చర్యం లేదు. ఓట్ల దొంగతనం, ప్రభుత్వ దొంగతనం, ఇప్పుడు పార్టీ దొంగతనం — ఇవన్నీ మన ప్రజాస్వామ్య పతనానికి చిహ్నాలుగా మారాయి” అంటూ విమర్శించారు.
More Stories
జెన్ జెడ్ ధర్మం గురించి చర్చించడం పట్ల మోహన్ భగవత్ హర్షం
మమతా మద్దతు తర్వాత కాంగ్రెస్ నందిగ్రామ్ అభ్యర్థి అరెస్ట్
మమత పార్టీకి కొత్త ఎన్నికల గుర్తు