జెన్ జెడ్ ధర్మం గురించి చర్చించడం పట్ల మోహన్ భగవత్ హర్షం

జెనరేషన్ జెడ్ యువత ధర్మం గురించి చురుకుగా చర్చిస్తుండటం పట్ల  రాష్ట్రీయ స్వయంసేవక్ సంఘ్ (ఆర్ఎస్ఎస్) సర్ సంఘచాలక్ డా.  అధిపతి మోహన్ భగవత్ శుక్రవారం నాడు సంతోషం వ్యక్తం చేస్తూ, ఇలాంటి అంశాలు కేవలం “వృద్ధుల వ్యవహారం” అనే అభిప్రాయం నుండి ఇది ఒక స్వాగతించదగిన మార్పు అని తెలిపారు. 

ఉజ్జయిన్‌లోని గీతా భవన్‌లో జరిగిన యువ ధర్మ సంసద్‌లో సుమారు 1,700 మంది విద్యార్థులను ఉద్దేశించి ప్రసంగిస్తూ, ధర్మం మన డిఎన్ఏలో అంతర్లీనంగా ఉందని, అది మన ప్రవర్తనలో ప్రతిబింబిస్తూ, మన దైనందిన చర్యలకు మార్గనిర్దేశం చేస్తుందని భగవత్ చెప్పారు. ధర్మం అనేది వృద్ధాప్యానికి లేదా పదవీ విరమణ తర్వాత భగవద్గీత, రామాయణం వంటి గ్రంథాలను చదవడానికి మాత్రమే పరిమితం కాదని ఆయన నొక్కి చెప్పారు.

“ధర్మం ఉంది, అది సృష్టి ఆరంభం నుండి అంతం వరకు ఉంటుంది,” అని ఆయన పేర్కొన్నారు.  ‘ధర్మం’, ‘మతం’ ఒకటే కాదని పేర్కొన్న మోహన్ భగవత్, భారతీయ భావన అయిన ‘ధర్మానికి’ ఆంగ్ల భాషలో ఖచ్చితమైన సమానార్థక పదం లేదని, అందుకే పాశ్చాత్యులకు దీనిని వివరించడానికి చారిత్రక నేపథ్యం దృష్ట్యా ‘మతం’ అనే పదాన్ని ఉపయోగిస్తూ వచ్చారని తెలిపారు. 

భారతదేశం ఎప్పుడూ వివిధ విశ్వాసాల మధ్య వివక్ష చూపలేదని, లౌకికవాదం పట్ల దేశానికి ఉన్న అవగాహన ‘పంత్-నిరపేక్షత’ (వివిధ మత సంప్రదాయాల పట్ల తటస్థ వైఖరి)పై ఆధారపడి ఉందని ఆయన చెప్పారు. ధర్మం అన్ని మతాలకు అతీతంగా నిలుస్తుందని ఆయన పేర్కొన్నారు. 

‘ధర్మం’, మతం మధ్య వ్యత్యాసాన్ని వివరిస్తూ, ఆ రెండింటినీ పర్యాయపదాలుగా పరిగణించకూడదని ఆర్‌ఎస్‌ఎస్ అధినేత స్పష్టం చేశారు.   మతం కంటే ధర్మం ఉన్నతమైనదని చెబుతూ, మతం బంధిస్తుందని, కానీ ధర్మం విముక్తిని ప్రసాదించి ‘మోక్షం’ వైపు నడిపిస్తుందని ఆయన చెప్పారు. ధర్మాన్ని నిర్బంధించే నమ్మకాల సముదాయంగా కాకుండా, ఒక ఆచరణగా అభివర్ణిస్తూ, “మతం బంధిస్తుంది, ధర్మం విముక్తినిచ్చి మోక్షానికి దారి తీస్తుంది” అని ఆయన తెలిపారు. 

అధర్మం (దుష్ప్రవర్తన) వల్ల అడవులు నరికివేస్తున్నారని, ఇప్పుడు అది మానవ మనుగడకే ముప్పుగా పరిణమించిందని గమనిస్తూ, ఆయన దానిని పర్యావరణ నష్టంతో కూడా ముడిపెట్టారు. 

మానవ పరిమితులను నొక్కిచెబుతూ, సూర్యోదయం, సూర్యాస్తమయం వంటి కొన్ని సహజ ప్రక్రియలు వ్యక్తిగత సంకల్పం లేదా అహంకారంతో సంబంధం లేకుండా స్థిరంగా ఉంటాయని భగవత్ జోడించారు. ధర్మం అనేది ప్రవర్తనలో, సహజ స్వభావంలో నిరంతరం ఉండే ఒక మార్గదర్శక సూత్రమని, అది ఐచ్ఛికమైన లేదా వయస్సుతో ముడిపడిన అన్వేషణ కాదని భగవత్ నొక్కిచెప్పారు.

పాలకులకు, మత పెద్దలకు మధ్య జరిగిన సంఘర్షణల నుండి పాశ్చాత్య లౌకికవాద భావన ఉద్భవించిందని, అందువల్ల అది భారత సందర్భానికి అదే విధంగా సరిపోదని డా. భగవత్ స్పష్టం చేశారు. యువత తమ సొంత సంప్రదాయాలకు కట్టుబడి ఉంటూనే, ఇతర ఆరాధనా పద్ధతులను గౌరవించాలని ఆయన కోరారు.