రాహుల్ గాంధీ చేసిన “మనుస్మృతి మనస్తత్వం” అనే వ్యాఖ్యలు, విద్యార్థినులకు “పితృస్వామ్యాన్ని బద్దలు కొట్టండి” అని ఇచ్చిన పిలుపుపై విశ్వహిందూ పరిషత్ (వీహెచ్పీ) తీవ్రంగా మండిపడింది. ఇతర మతాలలో మహిళల గురించి చెప్పిన విషయాలను బహిరంగంగా ఉదహరించే ధైర్యం కూడా కాంగ్రెస్ నేతకు ఉందా? అని ప్రశ్నించింది.
శనివారం పూణేలో జరిగిన ‘ఛాత్రోన్ కీ గూంజ్’ (విద్యార్థుల గళం) కార్యక్రమంలో విద్యార్థినులతో సంభాషిస్తూ, గాంధీ మనుస్మృతిలోని ఒక శ్లోకాన్ని ప్రస్తావించారు. ఆ శ్లోకం ప్రకారం, స్త్రీ తన బాల్యంలో తండ్రికి, యవ్వనంలో భర్తకు, భర్త మరణానంతరం కుమారులకు లోబడి ఉండాలి. స్త్రీలు తమకు తామే చెందుతారని, తండ్రులు, భర్తలు లేదా కుమారులకు కాదని గాంధీ పేర్కొన్నారు.
జీవితంలోని ప్రతి దశలోనూ స్త్రీ తన పురుష బంధువుల ఆధీనంలోనే ఉండాలన్న మనుస్మృతి నిబంధనను ఆయన “అవమానకరం” అని అభివర్ణించారు. ఈ వ్యాఖ్యలపై స్పందిస్తూ, వీహెచ్పీ జాతీయ ప్రతినిధి వినోద్ బన్సాల్ ‘ఎక్స్’ వేదికగా ఇలా అన్నారు: “రాహుల్ గాంధీ గారూ, మనుస్మృతిని సరిగా అర్థం చేసుకోకుండా అందులోని ఒక శ్లోకాన్ని ఎంచుకుని హిందూ సమాజాన్ని నిందితులుగా నిలబెట్టడం మీకు చాలా సులభం. మీ అపవిత్రమైన ఆలోచనా విధానంతో దేశ యువత స్వచ్ఛమైన మనస్సులను విషపూరితం చేయకండి.”
ఖురాన్, బైబిల్, ఇతర అబ్రహమిక్ మత గ్రంథాలలో మహిళల గురించి చెప్పిన విషయాలను బహిరంగంగా ఉదహరించే ధైర్యం చూపాలని గాంధీకి సవాలు విసిరిన బన్సాల్, ఆయన ముందుగా పూర్తి మనుస్మృతిని చదవాలని, సాధువులు, వ్యాఖ్యాతల వద్ద కూర్చుని విషయాలు తెలుసుకోవాలని, ఆ తర్వాతే హిందూ సమాజంపై తీర్పులు ఇవ్వాలని హితవు చెప్పారు.
“ఎంపిక చేసిన ఉల్లేఖనాలు, వాటి వక్రీకరించిన అర్థాలు కలుషిత రాజకీయాలకు దారితీయవచ్చు, కానీ వాటి నుండి సత్యం బయటపడదు” అని ఆయన పేర్కొన్నారు. మనుస్మృతిలోని ఒక శ్లోకాన్ని ఉదహరిస్తూ, స్త్రీ శక్తి ఈ దేశ నాగరికతకు గుర్తింపుగా నిలిచిందని బన్సాల్ పేర్కొన్నారు. రాజకీయ ప్రసంగాల కోసం దీనిని “మనుస్మృతి వర్సెస్ రాజ్యాంగం” పోరాటంగా మార్చడం చరిత్ర, సంస్కృతి రెండింటికీ చేసే “అన్యాయం” అని ఆయన ధ్వజమెత్తారు.
More Stories
‘ఛాత్రోన్ కి గూంజ్’లో రాహుల్ వ్యాఖ్యలపై బిజెపి నేతల మండిపాటు
అయోధ్యలో కాంగ్రెస్ `చేపల విందు’ ఏర్పాటుపై దుమారం
పార్లమెంట్ సమావేశాలు ముగియలేదు, వాయిదానే వేశారు