ఫ్రాన్స్ లో హిందూ సంస్కృతి, సంప్రదాయాలకు పెద్దపీట వేస్తూ మొట్టమొదటి భారీ హిందూ దేవాలయాన్ని నిర్మించారు. ఈ దేవాలయం ప్రారంభోత్సవానికి సిద్ధమైంది. పారిస్ లోని బుస్సీ-సెయింట్-జార్జెస్ ప్రాంతంలో బోచాసన్వాసి అక్షర్ పురుషోత్తం స్వామినారాయణ్ సంస్థ నిర్మించిన ఈ స్వామినారాయణ్ హిందూ మందిరాన్ని సెప్టెంబర్లో అంగరంగ వైభవంగా ప్రారంభించనున్నారు.
చారిత్రక ఘట్టాన్ని పురస్కరించుకుని సెప్టెంబర్ 2 నుంచి 14వ తేదీ వరకు 13 రోజులపాటు ‘ఫెస్టివల్ ఆఫ్ కల్చర్’ పేరిట ప్రత్యేక సాంస్కృతిక ఉత్సవాలు నిర్వహించనున్నారు. ఈ ప్రారంభోత్సవ వేడుకలను బీఏపీఎస్ ఆధ్యాత్మిక గురువు మహంత్ స్వామి మహరాజ్ తన ఆశీస్సులతో పర్యవేక్షించనున్నారు. ప్రపంచవ్యాప్తంగా ఉన్న భక్తులు, శ్రేయోభిలాషులు ఈ కార్యక్రమానికి పెద్ద సంఖ్యలో హాజరవుతారని అంచనా వేస్తున్నారు.
ఈ ఆలయ ప్రారంభోత్సవం, సాంస్కృతిక ఉత్సవాల గురించి ప్రపంచవ్యాప్తంగా ఉన్న సత్సంగ సభల్లో మార్చి, ఏప్రిల్ నెలల్లోనే బీఏపీఎస్ అధికారికంగా ప్రకటించింది. యూకే, ఐరోపా దేశాల బీఏపీఎస్ హెడ్ యోగవివేక్దాస్ స్వామి ప్రత్యేక వీడియో సందేశం ద్వారా ఈ ఆలయ చారిత్రక ప్రాధాన్యతను, ఉత్సవాల వివరాలను తెలియజేశారు.
ప్రపంచవ్యాప్తంగా ఉన్న హిందూ సమాజం ఈ ఆలయాన్ని సందర్శించాలని బీఏపీఎస్తో అనుబంధం ఉన్న మరో ప్రవాస భారతీయుడు ఆహ్వానించారు. సెప్టెంబర్లో జరిగే 13 రోజుల కార్యక్రమాలకు అందరూ హాజరు కావాలని ఆయన కోరారు. ఆలయ ప్రారంభోత్సవానికి ఇప్పటికే శిఖరాలు, మధ్య గోపురంపై ‘కలశ’, ‘ధ్వజ దండ పూజలు’ వంటి పవిత్ర కార్యక్రమాలను నిర్వహించారు. వేద మంత్రోచ్ఛారణల మధ్య శాంతి, సామరస్యం, శ్రేయస్సు కోసం ప్రత్యేక ప్రార్థనలు చేశారు.
ఈ సందర్భంగా మహంత్ స్వామి మహరాజ్, సీనియర్ స్వాములు, భక్తులు ‘పారిస్ మందిర్ మహోత్సవని జై!’ అంటూ తమ సంతోషాన్ని పంచుకున్నారు. ఈ ఆలయ ప్రారంభంతో ఫ్రాన్స్లోని హిందూ సమాజ చరిత్రలో ఒక నూతన అధ్యాయం ప్రారంభం కానుండగా.. ఇది సందర్శకులకు గొప్ప ఆధ్యాత్మిక, సాంస్కృతిక అనుభూతిని అందిస్తుందని భావిస్తున్నారు.
ఈ మందిరం కథ 1970లో ప్రారంభమైంది. ఆ సమయంలో బిఎపిఎస్ గురు యోగిజీ మహారాజ్ ప్యారిస్ను సందర్శించి, ఫ్రాన్స్లో ఒక హిందూ దేవాలయం నిర్మించాలన్న తన ఆశయాన్ని వ్యక్తం చేశారు. ఆ తర్వాత ప్రముఖ స్వామి మహారాజ్ ఈ ప్రాజెక్టును ముందుకు నడిపించారు. ఆయన ప్యారిస్ను పలుమార్లు సందర్శించి, హెలికాప్టర్ నుండి నగరంపై ప్రతీకాత్మకంగా పూల రేకులను కురిపించారు.
ఐదు దశాబ్దాలకు పైగా సాగిన ప్రార్థనలు, ఆధ్యాత్మిక కృషికి ఈ కొత్త మందిరం పరాకాష్ట అని బిఎపిఎస్ చెబుతోంది. ఈ ప్రాజెక్టుకు 2021లో భూమి పూజ జరిగింది. దాని తర్వాత 2022 సెప్టెంబర్లో శంకుస్థాపన కార్యక్రమం జరిగింది. జూన్ 4, 2024న బస్సీ-సెయింట్-జార్జెస్ స్థలంలో 126 పునాది పైల్స్లో మొదటి పైల్ను వేయడంతో నిర్మాణం అధికారికంగా పునాది దశలోకి ప్రవేశించింది.
ఈ ప్రాజెక్టును ప్రత్యేకంగా ఆకట్టుకునేలా చేసేది దాని నిర్మాణ తత్వమే. భారతదేశంలో తయారు చేసి ఫ్రాన్స్కు రవాణా చేసిన, క్లిష్టమైన శిల్పాలు చెక్కిన రాళ్లను ఉపయోగించి, సాంప్రదాయ హిందూ వాస్తు నిర్మాణ సూత్రాలతో ఈ మందిరాన్ని నిర్మిస్తున్నారు. నోట్రే-డామ్ కేథడ్రల్ పునరుద్ధరణతో సంబంధం ఉన్న హస్తకళాకారులతో సహా, నైపుణ్యం కలిగిన భారతీయ కళాకారులు ఫ్రెంచ్ రాతి శిల్పులతో కలిసి పనిచేస్తున్నారు.
అంటే ఈ ఆలయం భారతదేశంలో తయారై ఫ్రాన్స్లో నిర్మించబడింది. ఇది తమకు ఎంతో గర్వకారణమని ఫ్రాన్స్లోని ప్రవాస భారతీయురాలు భావి పరేఖ్ ఆనందం వ్యక్తంచేశారు. ప్రధాని నరేంద్ర మోదీ పర్యటన తర్వాత ఇప్పుడు ఈ ఆలయ ప్రారంభోత్సవం తమకు మరో ముఖ్యమైన సందర్భమని ఆమె తెలిపారు.
భారతదేశం నుండి మొదటి రాళ్లు సాంప్రదాయ పద్ధతులలో సిద్ధం చేసి, చేతితో చెక్కిన తర్వాత 2026 జనవరిలో వచ్చాయి. వాటిని ప్రతిష్ఠించడంతో, నిర్మాణ దశ నుండి ఆలయ శోభాయమాన వాస్తుశిల్పం స్పష్టంగా ఆవిర్భవించడం వైపు ఒక ప్రధాన పరివర్తన జరిగింది. భారతదేశంలో చేతితో చెక్కిన చెక్క స్తంభాలు కూడా నిర్మాణ స్థలానికి చేరుకుంటున్నాయి. అక్కడ స్వచ్ఛంద సేవకులు వాటికి ఆకృతిని ఇవ్వడం, నునుపు చేయడం, సీల్ చేయడంలో సహాయపడ్డారు.
అందువల్ల ఈ సహకారం కేవలం ఒక వాస్తుశిల్ప ప్రదర్శన కంటే ఎక్కువ. ఇది భారతీయ పవిత్ర కళా సంప్రదాయాలు, ఫ్రెంచ్ ఇంజనీరింగ్, హస్తకళల కలయికకు ప్రతీక. ఈ మందిరాన్ని కేవలం ఒక మతపరమైన భవనంగానే కాకుండా, విశ్వాసం, విజ్ఞానం, సంస్కృతి, సామాజిక సేవకు కేంద్రంగా భావిస్తున్నారు. ఇది అన్ని మతాలు, నేపథ్యాల ప్రజలను స్వాగతిస్తుందని, హిందూ సంప్రదాయాలు, ఆచారాలు, తత్వాన్ని ప్రదర్శిస్తుందని భావిస్తున్నారు.
More Stories
తారిఖ్ రెహమాన్పై ఇస్లామిక్ వాదుల ఒత్తిడి.. ఉగ్రవాదుల ప్రభావం
‘ఛాత్రోన్ కి గూంజ్’లో రాహుల్ వ్యాఖ్యలపై బిజెపి నేతల మండిపాటు
అయోధ్యలో కాంగ్రెస్ `చేపల విందు’ ఏర్పాటుపై దుమారం