* విద్యార్థి నేత నిరాహార దీక్ష విరమణ, సిబిఐ దర్యాప్తుకు విద్యార్థుల పట్టు
రాంచీలో నెలకొన్న ఉద్రిక్త పరిస్థితుల మధ్య, దాదాపు నెల రోజులుగా సాగుతున్న వీధి నిరసనలకు తలొగ్గి, జార్ఖండ్ స్టాఫ్ సెలక్షన్ కమిషన్ కంబైన్డ్ గ్రాడ్యుయేట్ లెవెల్ (జేఎస్ఎస్సీ- జేసీజీఎల్) పరీక్షలను రద్దు చేస్తున్నట్లు ముఖ్యమంత్రి హేమంత్ సోరెన్ సోమవారం ప్రకటించారు. జార్ఖండ్ ప్రభుత్వ నిర్ణయం ఒక పరీక్షతోనే ఆగలేదు, టీడీపీఎల్ ఏజెన్సీ ప్రచురించిన ప్రతి నియామకం, ఫలితం కూడా చెల్లదని, రాష్ట్ర పరీక్షా వ్యవస్థలో ఇప్పుడు ఒక పెద్ద ప్రక్షాళన జరుగుతోందని హేమంత్ సోరెన్ ప్రకటించారు.
ఆందోళన చేస్తున్న విద్యార్థులతో జరిపిన తాజా విడత చర్చలు నిష్ఫలమైన అనంతరం మాట్లాడిన ముఖ్యమంత్రి, 24 రోజులుగా వేలాది మందిని వీధుల్లో నిలబెట్టిన వారి సమస్యలను ప్రభుత్వం విన్నదని పేర్కొన్నారు. ఒక మంత్రివర్గ కమిటీ ఇప్పటికే అనేక డిమాండ్లను అంగీకరించిందని, అయితే ఈ ప్రక్రియపై విశ్వాసం సన్నగిల్లడంతో, పూర్తి పునఃప్రారంభం (రీసెట్) మాత్రమే విశ్వసనీయతను పునరుద్ధరించగలదని ఆయన నొక్కి చెప్పారు.
జవాబుదారీతనం విషయంలో రెండు సమాంతర మార్గాలతో ఈ ప్రకటన వెలువడింది. 2014 నుంచి టీడీపీఎల్ నిర్వహించిన అన్ని పరీక్షలపై సీఐడీ విచారణ జరుపుతుందని, మరోవైపు అవకతవకలపై ఒక విశ్రాంత న్యాయమూర్తి నేతృత్వంలో ప్రత్యేక విచారణ జరుగుతుందని రాష్ట్ర మంత్రివర్గం నిర్ణయించింది. “టీడీపీఎల్ నిర్వహించిన అన్ని పరీక్షలు, ఫలితాల ప్రచురణ ఇప్పుడు రద్దు చేయబడ్డాయి. టీడీపీఎల్ ద్వారా నిర్వహించే పరీక్షలు, నియామకాలు రద్దు అవుతాయి,” అని ముఖ్యమంత్రి తెలిపారు.
ఝార్ఖండ్లో విద్యార్థుల డిమాండ్లకు ప్రభుత్వం దిగివచ్చిన నేపథ్యంలో, దీక్షను విరమిస్తున్నట్లు విద్యార్థి నాయకుడు దేవంద్ర నాథ్ మెహతో ప్రకటించారు. ఝార్ఖండ్ మంత్రులు దీపికా పాండే సింగ్, ఇర్ఫాన్ అన్సారీల సమక్షంలో ఆయన దీక్షను విరమించారు. ఈ సందర్భంగా, విలేకరులతో మాట్లాడిన మహతో, అభ్యర్థుల డిమాండ్లకు అంగీకరించినందుకు ముఖ్యమంత్రి సోరెన్, కాంగ్రెస్ అగ్రనేత రాహుల్ గాంధీ, రాష్ట్ర మంత్రులకు ధన్యవాదాలు తెలిపారు. పరీక్షలను పర్యవేక్షించడానికి, ప్రశ్నపత్రాల లీకేజీని అరికట్టడానికి కఠినమైన చట్టాలు, సంస్కరణలు తీసుకురావాలని ఆయన పిలుపునిచ్చారు.
అయితే, సీబీఐ విచారణ జరగాలన్న తమ డిమాండ్ అంగీకరించే వరకు ఆందోళన కొనసాగుతుందని విద్యార్థి నాయకులు స్పష్టం చేశారు. “సీబీఐ విచారణ డిమాండ్ను ఇంకా అంగీకరించలేదు. ఆ డిమాండ్ను అంగీకరించేంత వరకు మేము మా ఆందోళనను కొనసాగిస్తాము. మేము ఒక పెద్ద పోరాటంలో విజయం సాధించాము, కానీ ఇంకా పోరాడాల్సింది చాలా ఉంది,” అని విద్యార్థి నాయకుడు రవీంద్ర పాశ్వాన్ పేర్కొన్నారు.
హేమంత్ సోరెన్ విలేకరులతో మాట్లాడుతూ, సీఐడీ మరియు ప్రత్యేక దర్యాప్తు బృందం (ఎస్ఐటీ) జరిపిన విచారణలలో ఇప్పటికే “నేరారోపణ వాస్తవాలు” వెలుగులోకి వచ్చాయని తెలిపారు. ఫలితంగా, మోసం, రిగ్గింగ్ ఆరోపణలకు సంబంధించి 20 మందిని అదుపులోకి తీసుకున్నారు. వీరిలో మాజీ జేపీఎస్సీ ఛైర్మన్ ఎల్. ఖియాంగ్టే కూడా ఉన్నారు. ఆయన ప్రధాన కార్యదర్శిగా పదవీ విరమణ చేసి, ఫిబ్రవరి 2025లో నియమితులయ్యారు. నిరసనల మధ్య ముగ్గురు జేపీఎస్సీ సభ్యులు రాజీనామా చేసిన మరుసటి రోజే, అంటే ఆగస్టు 10న ఆయనను అరెస్టు చేశారు.
“2014 నుండి నిర్వహించిన అన్ని పరీక్షలను సీఐడీ విచారిస్తుంది,” అని ముఖ్యమంత్రి తెలిపారు. జూలైలో పార్లమెంటు ఆమోదించిన కేంద్రం యొక్క పబ్లిక్ ఎగ్జామినేషన్స్ (ప్రివెన్షన్ ఆఫ్ అన్ఫెయిర్ మీన్స్) సవరణ బిల్లు, 2026ను అమలు చేసే విషయాన్ని కూడా యంత్రాంగం పరిశీలిస్తుందని ఆయన చెప్పారు. ఈ చట్టం ప్రకారం, వ్యవస్థీకృత మోసానికి పాల్పడిన వారికి 10 సంవత్సరాల వరకు జైలు శిక్ష, రూ. 10 కోట్ల వరకు జరిమానా విధించవచ్చు.
More Stories
యూపీకి వినోద్ తావ్డే, పంజాబ్ కు సతీశ్ పూనియా, గుజరాత్ కు తరుణ్ చుగ్
పార్టీ కంటే అభ్యర్థే ప్రధానం అంటున్న తెలంగాణ పట్టభద్రులు
చెస్ క్రీడాకారులు విధిత్ గుజరాతీ, దివ్య దేశ్ముఖ్లకు అర్జున అవార్డు