మమతా మేనల్లుడు అభిషేక్ పై రాళ్లు, చెప్పులు, కోడిగుడ్లతో దాడి

అంతేకాదు, ‘‘ఘటనా స్థలంలో పోలీసుల ఉనికి లేదు. వారు మమ్మల్ని చంపాలనుకుంటున్నారు. చంపనివ్వండి.. నేను చావనైనా చస్తాను కానీ ఇక్కడ నుంచి కదలను’’ అని ఆయన విమర్శించారు. తగిన భద్రతా ఏర్పాట్లు చేసే వరకు తాను వెళ్లబోనని తేల్చిచెప్పారు. ఉద్రిక్తతల నడుమ పోలీసు సిబ్బంది, కేంద్ర బలగాలు ఘటనా స్థలానికి చేరుకుని బెనర్జీని రక్షించారు,

బీజేపీ ప్రభుత్వంపై తన విమర్శలను తీవ్రతరం చేస్తూ, బెనర్జీ ఇంకా ఆరోపిస్తూ, “స్వాతంత్య్రం తర్వాత ఏ ముఖ్యమంత్రి కూడా డబ్బులు తీసుకుంటూ కనిపించలేదు. కానీ ఒక బీజేపీ ముఖ్యమంత్రి డబ్బులు తీసుకుంటూ కనిపించారు. నన్ను చంపాలనుకుంటే చంపనివ్వండి. నా మృతదేహాన్ని ఇక్కడి నుంచే వెలికి తీయాలి. నేను ఈ తల్లిదండ్రులను ఒంటరిగా వదిలిపెట్టను. నేను హైకోర్టును, గవర్నర్‌ను ఆశ్రయిస్తాను” అని స్పష్టం చేశారు. 

“వారు (బాధితురాలి ఇంటి) తలుపు పగలగొట్టడానికి ప్రయత్నిస్తున్నారు, ఇక్కడ పోలీసు బలగాలు లేవు. భద్రతా దళాలు వచ్చే వరకు నేను ఇక్కడి నుంచి వెళ్ళను. వారు ఆ కుటుంబాన్ని బెదిరించి, నన్ను ఇక్కడికి రానివ్వవద్దని చెప్పారు. వారెందుకు అంత భయపడుతున్నారు?” అంటూ ప్రశ్నించారు.

బిజెపి మద్దతుదారుల నిరసనలు, నినాదాలు 

ఇదిలా ఉండగా, పటులి సమీపంలోని ధలాయ్ వంతెన నుంచి సోనార్‌పూర్‌లోని కమ్రాబాద్ వరకు పలుచోట్ల బీజేపీ మద్దతుదారులు టీఎంసీ నాయకురాలికి వ్యతిరేకంగా నినాదాలు చేస్తూ నిరసనలు చేపట్టారు. పలువురు మహిళా నిరసనకారులు చీపుర్లు పట్టుకుని ఇంటి బయట గుమిగూడి బెనర్జీకి వ్యతిరేకంగా నినాదాలు చేశారు. ఆర్‌జీ కార్ మెడికల్ కాలేజ్ అండ్ హాస్పిటల్ అత్యాచారం-హత్య కేసులో టీఎంసీ నాయకత్వం పాత్రను కొందరు ప్రశ్నించారు.

 “వారు దోషులను రక్షించారు. ఆర్.జి. కార్ బాధితుడికి యావత్ దేశం సంఘీభావం తెలుపుతున్నప్పుడు వారెక్కడ ఉన్నారు?” అని నిరసనకారులలో ఒకరు ఆరోపించారు. నిరసనలు తీవ్రతరం కావడంతో, ప్రదర్శనకారులు నినాదాలు కొనసాగిస్తుండగా, కేంద్ర సాయుధ పోలీసు బలగాలు మరియు స్థానిక పోలీసు సిబ్బందితో కూడిన భారీ బృందం సంఘటనా స్థలానికి చేరుకుంది. అనంతరం భద్రతా సిబ్బంది బెనర్జీని ఆ ప్రాంతం నుండి బయటకు తీసుకువెళ్లారు. 

బెనర్జీ తన వాహనం వద్దకు తిరిగి నడిచి వెళ్లిన దాదాపు ఒక కిలోమీటరు మేర పోలీసులు, కేంద్ర బలగాలు భారీ భద్రతను కల్పించాయి. ఈ ఘటన తర్వాత, బెనర్జీని చికిత్స కోసం ఈఎం బైపాస్‌లోని ఒక ప్రైవేట్ ఆసుపత్రికి తరలించారు. మాజీ ముఖ్యమంత్రి, టీఎంసీ చైర్‌పర్సన్ మమతా బెనర్జీ ఇతర కుటుంబ సభ్యులతో కలిసి ఆసుపత్రికి తరలిరావడం కనిపించింది.

పాలకులు హంతకులయ్యారని, బీజేపీకి ఇది సిగ్గు చేటు అని పేర్కొంటూ టిఎంసి అధినేత్రి మమతా బెనర్జీ  విమర్శించారు.  దాడిని కాంగ్రెస్ పార్టీ జాతీయ అధ్యక్షుడు మల్లికార్జున్‌ ఖర్గే తీవ్రంగా ఖండిస్తూ రాజకీయ భేదాభిప్రాయాలున్నంత మాత్రాన హింసకు దిగడం ఎంతమాత్రం సమర్థనీయం కాదని తప్పుపట్టారు.