పశ్చిమాసియాలో ఉద్రిక్తతలు పతాకస్థాయిలో కొనసాగుతున్న వేళ గల్ఫ్ ప్రాంతంలో ఈ సారి సంక్షోభం సముద్ర గర్భంలో ఉన్న ఇంటర్నెట్ కేబుళ్ల ద్వారా రావచ్చని ఆందోళన వ్యక్తం అవుతుంది. చమురు నిల్వలకు నిలయమైన పర్షియన్ గల్ఫ్ ప్రాంతం ఇప్పుడు ప్రపంచ డిజిటల్ ఆర్థిక వ్యవస్థకు ఒక కీలకమైన నాడల్ పాయింట్గా మారింది. హార్మూజ్ జలసంధి గుండా ప్రయాణించే సముద్రగర్భ కేబుల్స్ కేవలం తీగలు మాత్రమే కాదు, అవి గల్ఫ్ దేశాల ఆర్థిక ప్రాణవాయువును మోసుకెళ్లే ధమనులు.
ఇరాన్ అనుబంధ తస్నిమ్ న్యూస్ ఏజెన్సీ ఇటీవల ప్రచురించిన నివేదిక ఈ అదృశ్య మౌలిక సదుపాయాలపై పొంచి ఉన్న ముప్పును ఒక వ్యూహాత్మక హెచ్చరికగా ప్రపంచం ముందుకు తెచ్చింది. గల్ఫ్ ప్రాంతంలో భౌగోళిక రాజకీయ ఉద్రిక్తతలు పెరిగితే, తదుపరి పెద్ద అంతరాయం సముద్రపు అడుగున ఉన్న ఈ ఇంటర్నెట్ కేబుళ్ల నుండే సంభవించవచ్చని ఈ నివేదిక స్పష్టం చేస్తోంది.
ఈ చిన్న ప్రాంతం గుండానే ఫాల్కన్, ఎఎఈ-1, డిజిఎన్-గల్ఫ్, సీ-మీ-డబ్ల్యూఈ వంటి అంతర్జాతీయ డేటా కేబుల్ వ్యవస్థలు వెళ్తాయి. యూఏఈ, ఖతార్, బహ్రెయిన్, కువైట్, సౌదీ అరేబియా వంటి దేశాలు తమ డిజిటల్ పరివర్తనలో భాగంగా బ్యాంకింగ్, స్టాక్ మార్కెట్లు, క్లౌడ్ కంప్యూటింగ్, అంతర్జాతీయ కమ్యూనికేషన్ల కోసం ఈ కేబుళ్లపైనే పూర్తిస్థాయిలో ఆధారపడి ఉన్నాయి.
ఈ దేశాలు ఇరాన్ కంటే చాలా ఎక్కువగా ఈ డిజిటల్ మార్గాలపై ఆధారపడి ఉండటం వల్ల, ఇవి ఆ దేశాల బలహీనతలుగా మారాయి. ఒకవేళ ఉద్దేశపూర్వకంగా గానీ లేదా ప్రమాదవశాత్తు గానీ ఈ కేబుల్స్ తెగిపోతే, అది కేవలం ఇంటర్నెట్ స్లో అవ్వడమే కాకుండా, మొత్తం ఆర్థిక వ్యవస్థలను స్తంభింపజేస్తుంది. 2024, 2025లో ఎర్ర సముద్రంలో సంభవించిన కేబుల్ నష్టాలు దీనికి ప్రత్యక్ష ఉదాహరణలు.
ప్రాంతీయ యుద్ధాలు, తిరుగుబాటుదారుల చర్యల వల్ల కేబుల్స్ దెబ్బతిన్నప్పుడు, వాటిని బాగు చేయడం అసాధ్యంగా మారింది. సముద్రగర్భ కేబుల్ మరమ్మతు నౌకలు అక్కడికి వెళ్లాలంటే భద్రతాపరమైన ముప్పులు ఎదురవుతాయి. దీనివల్ల మరమ్మతులకు నెలల సమయం పడుతుంది. ఇరాన్ మద్దతు ఉన్న హౌతీ తిరుగుబాటుదారులు గతంలో ఇటువంటి మౌలిక సదుపాయాలను లక్ష్యంగా చేసుకుంటామని బెదిరించడం, ఈ ఆందోళనలను మరింత పెంచుతోంది.
తస్నిమ్ నివేదికలో కేబుల్ మార్గాల మ్యాపింగ్ మరియు ల్యాండింగ్ స్టేషన్ల వివరాలను ప్రముఖంగా ప్రస్తావించడం ఒక తటస్థ విశ్లేషణలా కాకుండా, భవిష్యత్తులో యుద్ధం వస్తే వేటిని లక్ష్యంగా చేసుకోవాలో సూచించే ఒక ‘టార్గెట్ లిస్ట్’ వలె కనిపిస్తోందని అంతర్జాతీయ నిపుణులు భావిస్తున్నారు.
More Stories
సీమైన్లను పెట్టే బోట్లను పేల్చేయండి… ట్రంప్
నావికుల భద్రతపై భారత్ ఆందోళన
చరిత్రలోనే అతిపెద్ద ఇంధన భద్రత ముప్పు