సర్పంచ్ ఎన్నికలంటే కాంగ్రెస్ నేతల్లో కంగారు!

క్షేత్రస్థాయిలో వాస్తవ పరిస్థితిని అంచనా వేయడం కోసం ఏప్రిల్‌ చివరి వారం నుంచి మే చివరి వారం వరకు కాంగ్రెస్‌ వ్యూహకర్త సునీల్‌ కనుగోలు బృందం గ్రామాల్లో సర్వే చేసినట్టు తెలిసింది. ఇందులో ఐదుగురు మంత్రులు, 32 మంది ఎమ్మెల్యేల పనితీరు ఏమాత్రం బాగాలేదని తేలిందట. 52 శాతం మంది ఎమ్మెల్యేలు సొంత నియోజకవర్గాల కంటే సొంత పనుల మీదే ఎక్కువ దృష్టి పెట్టినట్టు ప్రజలు తేల్చి చెప్పారట.

రాష్ట్రవ్యాప్తంగా మే 25 నుంచి జూన్‌ 10 వరకు ఐవీఆర్‌(ఇంటరాక్టివ్‌ వాయిస్‌ రెస్పాన్స్‌) సర్వే జరిగింది. ప్రభుత్వమే థర్డ్‌ పార్టీ ఏజెన్సీతో సర్వే చేయిస్తున్నట్టు చర్చ జరుగుతున్నది. ప్రధానంగా సీఎం కార్యాలయం ఒక ప్రైవేటు ఏజెన్సీతో సర్వే చేయించిందని చెబుతున్నారు. నియోజకవర్గాలవారీగా ఓటర్లకు ఫోన్‌ చేశారని, కాల్‌ రిసీవ్‌ చేసుకోగానే  ‘మీ ఎమ్మెల్యే పనితీరు ఎలా ఉంది?’ అని అడిగి, బాగుంది, పర్వాలేదు, బాగాలేదు, చెప్పలేం అనే 4 ఆప్షన్లతో సమాధానాలు సేకరించినట్టు పేర్కొన్నారు. ఈ సర్వే ఫలితాల్లో 47శాతం నియోజకవర్గాల్లో ఎమ్మెల్యే పనితీరు బాగా లేదని ప్రజలు తేల్చిచెప్పినట్టు సమాచారం.