అమెరికాలో విదేశీ విద్యార్థి వీసాల విషయంలో ట్రంప్ సర్కార్ వెనక్కి తగ్గింది. 1200 మందికి పైగా విదేశీ విద్యార్థుల వీసాలు, చట్టబద్ధ హోదాను రద్దు చేస్తున్నట్లు తీసుకున్న నిర్ణయాన్ని ఉపసంహరించుకుంది. న్యాయపరమైన సవాళ్లు, కోర్టు ఆదేశాల అనంతరం అమెరికా ప్రభుత్వం ఈ నిర్ణయం తీసుకుంది. ఈ నిర్ణయంతో బహిష్కరణను ఎదుర్కొంటున్న విదేశీ విద్యార్థులకు తాత్కాలికంగా భారీ ఉపశమనం లభించినట్లయింది.
విద్యార్థుల రికార్డుల రద్దుపై అమెరికా ప్రభుత్వం కొత్త విధానాలను పరిశీలిస్తున్న సమయంలోనే వారి హోదాను పునరుద్ధరించాలని నిర్ణయించింది. ఈ నేపథ్యంలోనే దాదాపు 1200 మంది స్టూడెంట్స్ లీగల్ స్టేటస్‌ను పునరుద్ధరిస్తున్నట్లు అమెరికా ప్రభుత్వ లాయర్ తాజాగా కోర్టుకు వెల్లడించారు. అమెరికాలో అధ్యక్ష పదవిలోకి వచ్చినప్పటి నుంచి అక్రమ వలసదారులపై ఉక్కుపాదం మోపుతున్న డొనాల్డ్ ట్రంప అంతకుముందు వివిధ కారణాలతో 187 కళాశాలలకు చెందిన 1200 మందికి పైగా విదేశీ విద్యార్థుల వీసాలను, వారి చట్టబద్ధ హోదాలను రద్దు చేస్తూ సంచలన నిర్ణయం తీసుకున్నారు. ఈ నిర్ణయంతో తీవ్ర ఆందోళనకు గురైన వందల మంది విదేశీ విద్యార్థులు న్యాయపోరాటం చేశారు.
కాలిఫోర్నియా, బోస్టన్‌లోని కోర్టుల్లో ట్రంప్ తీసుకున్న నిర్ణయానికి వ్యతిరేకంగా పిటిషన్లు దాఖలు చేశారు. ఈ క్రమంలోనే వారి పిటిషన్లను స్వీకరించి విచారణ జరిపిన ఆయా కోర్టులు.. విదేశీ విద్యార్థుల వీసా రద్దును నిలిపివేయాలని ట్రంప్ సర్కార్‌కు ఆదేశాలు జారీ చేశాయి. ఈ నేపథ్యంలోనే ఇమిగ్రేషన్ అండ్ కస్టమ్స్ ఎన్‌ఫోర్స్‌మెంట్ (ఐసీఈ) ఆ 1200 మంది విద్యార్థుల చట్టబద్ధ హోదాను తాత్కాలికంగా పునరుద్ధరిస్తున్నట్లు ప్రకటించింది.
సాధారణంగా వీసా లేదా చట్టబద్ధ హోదా రద్దు అయినప్పుడు విదేశీ విద్యార్థుల వివరాలు ఉండే స్టూడెంట్ అండ్ ఎక్స్ఛేంజ్‌ విజిటర్‌ ఇన్ఫర్మేషన్‌ సిస్టమ్స్‌ (ఎస్ఈవీఐఎస్) డేటాబేస్ నుంచి ఆయా స్టూడెంట్స్ రికార్డులను తొలగిస్తారు. అయితే ఈ రికార్డుల టెర్మినేషన్‌కు సంబంధించి డొనాల్డ్ ట్రంప్ ప్రభుత్వం కొత్త విధానం తీసుకురానున్నట్లు తెలుస్తోంది. అప్పటివరకు తొలగించిన విద్యార్థుల రికార్డులన్నింటినీ తిరిగి యాక్టివేట్ చేస్తున్నట్లు ప్రభుత్వ లాయర్ కోర్టుకు తెలిపారు.
ఇక ఈ వీసాలు రద్దయిన 1200 మంది విదేశీ విద్యార్థుల్లో కొంతమంది భారతీయ విద్యార్థులు కూడా ఉన్నారని తెలుస్తోంది. ట్రాఫిక్ ఉల్లంఘనలు వంటి చిన్న కారణాలతో కూడా ఆయా విద్యార్థుల చట్టబద్ధ హోదాను తొలగించారని అమెరికన్ ఇమిగ్రేషన్ లాయర్స్ అసోసియేషన్ కోర్టులో ఆరోపించింది. అయితే ట్రంప్ ప్రభుత్వం కొత్తగా ఏం విధానం తీసుకువస్తుందో వేచి చూడాలి.
More Stories
సింధు కాల్వలపై తిరగబడుతున్న సింధూ ప్రాంత ప్రజలు
ఆఫ్ఘన్ వరకు చైనా- పాకిస్థాన్ ఆర్థిక కారిడార్!
బలూచ్‌ బాంబ్‌ దాడిపై పాక్‌ ఆరోపణలు తోసిపుచ్చిన భారత్