కెటిఆర్ వ్యాపార భాగస్వామి కేదార్ మృతిపై అనుమానం

సినీ నిర్మాత కేదార్ ఆకస్మిక మృతి పట్ల అనుమానాలు వ్యక్తం అవుతున్నాయని, మరణించిన కేదా ర్ మాజీ మంత్రి, బీఆర్‌ఎస్ అధ్యక్షులు కేటీఆర్‌కు సన్నిహితులంటూ ముఖ్యమంత్రి రేవంత్‌రెడ్డి సంచలన వ్యాఖ్యలు చేసారు. తెలంగాణలో ఇటీవల మూడు అనుమానాస్పద మరణాలు చోటు చేసుకున్నాయని తెలిపారు.

వీరిలో ఒకరు కాళేశ్వరం ప్రాజెక్టుపై (మేడిగడ్డ) కేసులు వేసిన రాజలింగమూర్తి, రెండవది సినీ నిర్మాత కేదార్, మూడవది వీరిద్దరి కేసులను వాదిస్తున్న సంజీవరెడ్డి అనే అడ్వకేట్ అని సీఎం వివరించారు. దుబాయిలో అనుమానాస్పదంగా మరణించిన సినీ నిర్మాత కేదార్, కేటీఆర్ బిజినెస్ పార్టనర్ అని సీఎం రేవంత్‌రెడ్డి ఆరోపించారు. 

ఈ మరణాలపై జ్యూడిషియల్ విచారణను కేటీఆర్ ఎందుకు కోరడం లేదని సీఎం ప్రశ్నించారు. దుబాయిలో కేదార్ మృతి చెందిన హోటల్లో బీఆర్‌ఎస్ పార్టీకి చెందిన ఓ మాజీ ఎమ్మెల్యే ఎందుకు ఉన్నారని కూడా సీఎం ప్రశ్నించారు. డ్రగ్స్ కేసులు త్వరలో విచారణకు వస్తున్న సమయంలో ఇలాంటి మరణాలు అనుమానాస్పదంగా ఉన్నాయని పేర్కొన్నారు. 

తన వ్యాపార భాగస్వామి మరణంపై కేటీఆర్ ఎందుకు స్పందించడం లేదని రేవంత్‌రెడ్డి ప్రశ్నించారు. ఈ మరణాలపై కేటీఆర్ కోరితే తాము విచారణ చేయిస్తామని కూడా సీఎం రేవంత్‌రెడ్డి స్పష్టం చేసారు. కేదార్ మరణంతో లింక్ ఉన్న డ్రగ్స్ కేసు బయటికి తీసి విచారణ జరిపిస్తామని స్పష్టం చేశారు. త్వరలోనే కేదార్ మృతదేహం రానున్నట్లు చెప్పారు.

తెలుగు సినీ నిర్మాత కేదార్ సెలగంశెట్టి దుబాయ్‌లో ఆకస్మికంగా మృతి చెందినట్టు మీడియాలో వార్తలు వచ్చాయి. తెలుగు సినీ ఫైనాన్షియర్ కుమారుడి వివాహానికి సంబంధించిన ప్రీ వెడ్డింగ్ వేడుక దుబాయిలో జరిగింది. దీనికి సినీ ప్రముఖులు అనేక మంది హాజరయ్యారు. వీరిలో నిర్మాత కేదార్ కూడా ఉన్నారు. 

సోమవారం రాత్రి మిత్రులతో పార్టీకి హాజరైన కేదార్ అనంతరం తన ఫ్లాట్‌లో నిద్రపోయారు. నిద్రలోనే అతను మృతి చెందినట్టు సమాచారం. కేదార్ బస చేసిన హోటల్ లో మాజీ ఎమ్మెల్యే ఉన్నట్టు ప్రచారం జరిగింది. అయితే తనపై వచ్చిన ఆరోపణలను ఖండిస్తూ సదరు మాజీ ఎంఎల్‌ఎ తాను హైదరాబాద్‌లోనే ఉన్నట్టు బుధవారం సెల్ఫీ వీడియో విడుదల చేశారు. 

కాగా ఏడాది క్రితం గచ్చిబౌలిలో రాడిసన్ హోటల్‌లో జరిగిన డ్రగ్స్ పార్టీపై పోలీసులు దాడి చేయగా, కొకైన్ తో కేదార్ పట్టుబడ్డారు. హీరో విజయ్ దేవరకొండ సోదరుడు ఆనంద్ దేవరకొండతో ‘గం గం గణేశా’ పేరుతో కేదార్ సినిమా తీశారు.