ఢిల్లీ ముఖ్యమంత్రిగా రేఖా గుప్తా ప్రమాణం

రేఖా గుప్తా ప్రమాణ స్వీకారానికి హాజరైన ఏపీ సీఎం చంద్రబాబు ఢిల్లీలో కొత్త మార్పును చూడబోతున్నామని చెప్పారు. ఇక నుంచి ఢిల్లీ మరోలా ఉంటుందని ధీమా వ్యక్తం చేశారు. ఢిల్లీకి మహిళా ముఖ్యమంత్రి ఉండడం ఆనందంగా ఉందని చెబుతూ ఇప్పుడు దేశ రాజధానిలో కొత్త శకం మొదలైందని, ఇకపై అద్భుతమైన అభివృద్ధి, సంక్షేమం జరగబోతుందని వెల్లడించారు.

1974 జులై 19న హరియాణాలోని జుల్నాలో జన్మించారు రేఖా గుప్తా. డిల్లీ యూనివర్సిటీ పరిధిలోని దౌలత్‌ రామ్‌ కళాశాలలో బీకాం పూర్తి చేశారు. 1992లో ఏబీవీపీ ద్వారా విద్యార్థి రాజకీయాల్లో ప్రవేశించిన ఆమె 1995-96లో ఢిల్లీ వర్సిటీ విద్యార్థి సంఘం కార్యదర్శిగా పనిచేశారు. 1996-97లో అధ్యక్షురాలిగానూ సేవలు అందించారు. 

రేఖా గుప్తా ఢిల్లీకి నాలుగో మహిళా సీఎంగా సేవలు అందించనున్నారు. గతంలో సుష్మా స్వరాజ్‌ (బీజేపీ), షీలా దీక్షిత్‌ (కాంగ్రెస్‌), ఆతిశీ (ఆప్‌) ముఖ్యమంత్రులుగా పనిచేశారు. అలాగే బీజేపీ నుంచి సుష్మా స్వరాజ్, ఉమాభారతి, వసుంధర రాజే, ఆనందీబెన్‌ పటేల్‌ తర్వాత ముఖ్యమంత్రి బాధ్యతలు చేపట్టిన ఐదో మహిళగా రేఖా గుప్తా నిలిచారు. 

అలాగే దేశంలో విభిన్న పార్టీల నుంచి సీఎం పదవి చేపట్టిన 18వ మహిళగా రేఖా గుప్తా ఉన్నారు. మరోవైపు, రేఖా గుప్తాకు కేంద్ర ప్రభుత్వం జెడ్‌ కేటగిరీ భద్రత కేటాయించింది. అతిశీ సీఎంగా ఉన్న సమయంలో ఆమెకు కూడా జెడ్ కేటగిరీ సెక్యూరిటీని కేటాయించింది.