రైల్వేస్టేషన్‌లో కూలిన ప్రవేశద్వారం పైకప్పు

రైల్వే అమృత్ భారత్ యోజన కింద మూడు స్టేషన్లను ఎంపిక చేసినట్లు రైల్వే బోర్డు సభ్యుడు సత్యేంద్ర ప్రతాప్ సింగ్ తెలిపారు. ఇందులో కన్నౌజ్ కూడా ఉంది. ఇక్కడ నిర్మాణంలో ఉన్న లింటెల్ అనుకోకుండా పడిపోయింది. వెంటనే సమాచారం తెలుసుకున్న అధికారులు చర్యలు తీసుకున్నారు. 

ప్రాథమిక సమాచారం ప్రకారం నిర్మాణంలో ఉన్న పైకప్పు షట్టరింగ్ కూలిపోవడంతో ఈ ఘటన సంభవించిందని జిల్లా మేజిస్ట్రేట్ శుభ్రాంత్ కుమార్ శుక్లా తెలిపారు. అయితే ఈ ప్రమాదం ఎందుకు జరిగిందనే విషయంపై దర్యాప్తు జరుగుతోంది. చిక్కుకున్న కార్మికులను రక్షించడమే మా మొదటి ప్రాధాన్యత అని ఆయన అన్నారు. సహాయక చర్యల కోసం తమ వద్ద ఉన్న అన్ని వనరులను ఉపయోగిస్తున్నామని చెప్పారు. 

ఈ క్రమంలో తీవ్రంగా గాయపడిన వారికి రూ. 50,000, స్వల్పంగా గాయపడిన వారికి రూ.5,000 పరిహారాన్ని రాష్ట్ర ప్రభుత్వం ప్రకటించింది. సహాయ, రక్షణ చర్యలు యుద్ధ ప్రాతిపదికన కొనసాగుతున్నాయని ఈశాన్య రైల్వే తెలిపింది. కన్నౌజ్ రైల్వే స్టేషన్‌లో నిర్మాణంలో ఉన్న ప్రయాణీకుల వేచి ఉండే గది కూడా కూలిపోవడంతో జరిగిన ప్రమాదంలో చాలా మంది గాయపడ్డారని స్థానికులు చెబుతున్నారు. గాయపడిన వారికి తక్షణ సహాయ చర్యలు చేపట్టాలని ఉత్తరప్రదేశ్ ప్రభుత్వం స్థానిక పరిపాలనను ఆదేశించింది. ప్రమాదంలో గాయపడిన వారు త్వరగా కోలుకోవాలని పలువురు కోరుతున్నారు.