రెండు రోజుల్లో 10 విమానాలకు బాంబు బెదిరింపులు

దేశీయంగా నడిచే, విదేశాలకు వెళ్లే పలు విమానాలకు వరుస బాంబు బెదిరింపులు రావడం ప్రస్తుతం తీవ్ర కలకలం రేపుతోంది. మంగళవారం ఒక్కరోజే ఏకంగా ఏడు విమానాలకు ఎక్స్‌(ట్విటర్‌) వేదికగా బాంబు బెదిరింపులు రావడంతో అధికారులు అప్రమత్తమయ్యారు. దీంతో దేశ వ్యాప్తంగా పలు విమానాశ్రయాల్లో భద్రతా సంస్థలు, ఉగ్రవాద నిరోధక డ్రిల్స్​ను నిర్వహించారు.

ఈ బాంబు బెదిరింపుల కారణంగా విమానాల రాకపోకల్లోనూ ఆలస్యం, షెడ్యూల్లో మార్పులు జరికాయి. మదురై – సింగపూర్‌, డిల్లీ – షికాగో, జైపుర్‌ – బెంగళూరు, సహా ఏడు విమానాలకు గంటల వ్యవధిలోనే ఈ బాంబు బెదిరింపులు వచ్చాయి. దీంతో ఈ విమానయాన సంస్థల సిబ్బంది సహా ప్రయాణికులు భయాందోళనకు గురయ్యారు. ఈ ఘటన కలకలం రేపడంతో అప్రమత్తమైన బ్యూరో ఆఫ్ సివిల్ ఏవియేషన్ సెక్యూరిటీ (బీసీఏఎస్) – సైబర్‌ సెక్యూరిటీ ఏజెన్సీలకు ఫిర్యాదు​ చేసింది. అనంతరం సంబంధిత ఎక్స్‌ ఖాతాను తాత్కాలికంగా నిలిపివేసినట్లు సమాచారం. ఈ బాంబు బెదిరింపులు రావడంతో కొన్ని విమానాలు అత్యవసర ల్యాండింగ్‌ కూడా అయ్యాయి.

“డెహ్రాదూన్‌ నుంచి బయలు దేరిన మా విమానంకు బాంబు బెదిరింపులు వచ్చాయి. ఈ విమానానికి భద్రతా ముప్పు పొంచి ఉందని ఆన్‌లైన్‌లో పోస్ట్​ కనిపించింది. దీంతో తక్షణమే అప్రమత్తమైన మా ఎయిర్‌లైన్స్‌ విమానాన్ని ముంబయి ఎయిర్‌పోర్టులోనే సురక్షితంగా ల్యాండింగ్‌ చేసింది. ప్రయాణికులను సురక్షిత ప్రాంతానికి తరలించి బాంబు స్క్వాడ్‌ వారికి సమాచారం ఇచ్చాం.” అని స్పైస్‌జెట్​కు చెందిన ఓ ప్రతినిధి తెలిపారు.